ຂ່າວສານຈາກຝ່າຍປະທານສູງສຸດ, ເດືອນສິງຫາ 2017
ຊີວິດຂອງສານຸສິດ
ໂດຍ ປະທານດີເດີ ແອັຟ ອຸກດອບ
ທີ່ປຶກສາທີສອງໃນຝ່າຍປະທານສູງສຸດ
ເມື່ອສາມສິບປີກ່ອນ ໃນປະເທດການາ, ນັກສຶກສາວິທະຍາໄລຄົນໜຶ່ງ ຊື່ ໂດ ໄດ້ຍ່າງເຂົ້າໄປໃນຕຶກໂບດຂອງຊາວມໍມອນ ເປັນເທື່ອທຳອິດ. ເພື່ອນຄົນໜຶ່ງໄດ້ເຊື້ອເຊີນນາງໂດ ໃຫ້ໄປໂບດກັບນາງ, ແລະ ນາງໂດກໍສົນໃຈຢາກຮູ້ວ່າ ສາດສະໜາຈັກເປັນຈັ່ງໃດ.
ຜູ້ຄົນຢູ່ທີ່ນັ້ນ ກໍດີ ແລະ ອົບອຸ່ນ ຈົນວ່ານາງອົດສົງໄສບໍ່ໄດ້ວ່າ, “ສາດສະໜາຈັກນີ້ ເປັນສາດສະໜາຈັກແບບໃດ?”
ນາງໂດຮູ້ສຶກປະທັບໃຈຫລາຍ ຈຶ່ງໄດ້ຕັດສິນໃຈ ທີ່ຈະຮຽນຮູ້ເພີ່ມເຕີມອີກ ກ່ຽວກັບສາດສະໜາຈັກ ແລະ ສະມາຊິກ, ຜູ້ທີ່ເຕັມໄປດ້ວຍຄວາມສຸກຫລາຍແທ້ໆ. ແຕ່ທັນທີທີ່ນາງເລີ່ມຕົ້ນເຮັດແນວນັ້ນ, ຄອບຄົວທີ່ຫວັງດີ ແລະ ໝູ່ເພື່ອນກໍເລີ່ມຕົ້ນຕໍ່ຕ້ານນາງ ໃນທຸກວິທີທາງ. ເຂົາເຈົ້າໄດ້ເວົ້າສິ່ງບໍ່ດີກ່ຽວກັບສາດສະໜາຈັກ ແລະ ໄດ້ເຮັດທຸກສິ່ງທຸກຢ່າງ ເພື່ອຫ້າມປາມນາງ.
ແຕ່ນາງໂດໄດ້ມີປະຈັກພະຍານແລ້ວ.
ນາງມີສັດທາ, ແລະ ນາງຮັກພຣະກິດຕິຄຸນ, ຊຶ່ງເຮັດໃຫ້ຊີວິດຂອງນາງເຕັມໄປດ້ວຍຄວາມສຸກ. ແລະ ສະນັ້ນ, ນາງຈຶ່ງໄດ້ລົງໄປໃນນ້ຳແຫ່ງບັບຕິສະມາ.
ຫລັງຈາກນັ້ນ, ນາງໄດ້ຕັ້ງໜ້າຕັ້ງຕາໃນການສຶກສາ ແລະ ອະທິຖານ. ນາງໄດ້ຖືສິນອົດເຂົ້າ ແລະ ສະແຫວງຫາອິດທິພົນຂອງພຣະວິນຍານບໍລິສຸດ ໃນຊີວິດຂອງນາງ. ຜົນກໍຄື, ປະຈັກພະຍານ ແລະ ສັດທາຂອງນາງໂດ ໄດ້ເຂັ້ມແຂງ ແລະ ເລິກຊຶ້ງຫລາຍຂຶ້ນ. ໃນທີ່ສຸດ ນາງໄດ້ຕັດສິນໃຈຮັບໃຊ້ສອນສາດສະໜາເຕັມເວລາ ສຳລັບພຣະຜູ້ເປັນເຈົ້າ.
ຫລັງຈາກໄດ້ກັບມາຈາກການສອນສາດສະໜາຂອງນາງ, ນາງໄດ້ພົບຮັກກັບຊາຍໜຸ່ມ ຜູ້ໄດ້ໄປສອນສາດສະໜາ ແລະ ໄດ້ແຕ່ງງານກັນ—ເປັນຊາຍໜຸ່ມຄົນດຽວກັນກັບທີ່ໃຫ້ບັບຕິສະມານາງ—ແລະ ຕໍ່ມາ ໄດ້ຜະນຶກເຂົ້າກັນ ຢູ່ພຣະວິຫານ ໂຈຮານເນັດສະເບີກ ອາຟຣິກາໃຕ້.
ຫລາຍປີໄດ້ຜ່ານໄປ ນັບຕັ້ງແຕ່ນາງໂດ ຄາຄູ ໄດ້ປະສົບກັບຄວາມສຸກ ຂອງພຣະກິດຕິຄຸນຂອງພຣະເຢຊູຄຣິດ. ໃນໄລຍະນັ້ນ, ຊີວິດບໍ່ໄດ້ຫວານຊື່ນຕະຫລອດເວລາສຳລັບນາງ. ນາງໄດ້ອົດທົນກັບບັນຫາທີ່ເຈັບປວດໃຈ ແລະ ຄວາມໝົດຫວັງ, ຮ່ວມທັງການສູນເສຍລູກໄປສອງຄົນ—ຄວາມໂສກເສົ້າຢ່າງຫລວງຫລາຍ ຂອງປະສົບການເຫລົ່ານັ້ນ ຍັງໜັກໜ່ວງຢູ່ໃນໃຈຂອງນາງຢູ່.
ແຕ່ນາງ ແລະ ສາມີຂອງນາງ, ແອນຕະນີ, ໄດ້ພະຍາຍາມເຂົ້າໃກ້ຊິດກັນ ແລະ ເຂົ້າໃກ້ຊິດພຣະບິດາເທິງສະຫວັນທີ່ຊົງຮັກຂອງເຂົາເຈົ້າ, ຜູ້ທີ່ເຂົາເຈົ້າຮັກດ້ວຍສຸດຫົວໃຈ.
ມື້ນີ້, 30 ປິ ຫລັງຈາກນາງໄດ້ລົງໄປໃນນ້ຳແຫ່ງບັບຕິສະມາ, ຊິດສະເຕີ ຄາຄູ ໄດ້ສຳເລັດການສອນສາດສະໜາເຕັມເວລາຂອງນາງອີກເທື່ອໜຶ່ງ ເມື່ອບໍ່ດົນມານີ້—ເທື່ອນີ້ ຄຽງຂ້າງກັບສາມີຂອງນາງ, ຜູ້ໄດ້ເປັນປະທານເຜີຍແຜ່ໃນປະເທດ ນີເຊເຣຍ.
ຜູ້ຄົນທີ່ຮູ້ຈັກຊິດສະເຕີ ຄາຄູ ໄດ້ບອກເຖິງບາງສິ່ງທີ່ພິເສດກ່ຽວກັບນາງ. ນາງສ່ອງໄສ. ມັນຍາກທີ່ຈະໃຊ້ເວລາກັບນາງ ໂດຍທີ່ບໍ່ຮູ້ສຶກຄວາມສຸກຫລາຍຂຶ້ນ.
ປະຈັກພະຍານຂອງນາງແມ່ນແນ່ນອນ ທີ່ວ່າ: “ຂ້າພະເຈົ້າຮູ້ວ່າ ພຣະຜູ້ຊ່ວຍໃຫ້ລອດເຫັນຂ້າພະເຈົ້າ ວ່າເປັນທິດາ ແລະ ເປັນເພື່ອນຂອງພຣະອົງ (ເບິ່ງ ໂມໄຊຢາ 5:7; ອີເທີ 3:14),” ນາງກ່າວ. “ແລະ ຂ້າພະເຈົ້າໄດ້ຮຽນຮູ້ ແລະ ພະຍາຍາມຫລາຍທີ່ສຸດ ທີ່ຈະເປັນເພື່ອນຂອງພຣະອົງເຊັ່ນດຽວກັນ—ບໍ່ພຽງແຕ່ໂດຍສິ່ງທີ່ຂ້າພະເຈົ້າກ່າວເທົ່ານັ້ນ ແຕ່ໂດຍສິ່ງທີ່ຂ້າພະເຈົ້າກະທຳດ້ວຍ.”
ເຮົາເປັນສານຸສິດ
ເລື່ອງລາວຂອງຊິດສະເຕີ ຄາຄູ ແມ່ນຄ້າຍຄືກັນກັບເລື່ອງລາວຂອງຫລາຍຄົນ. ນາງມີຄວາມປາດຖະໜາຢາກຮູ້ຄວາມຈິງ, ນາງໄດ້ເສຍສະລະຫລາຍຢ່າງ ເພື່ອແລກກັບຄວາມສະຫວ່າງທາງວິນຍານ, ນາງໄດ້ສະແດງຄວາມຮັກຂອງນາງທີ່ມີຕໍ່ພຣະເຈົ້າ ແລະ ຕໍ່ເພື່ອນມະນຸດດ້ວຍກັນ, ແລະ ໃນຊີວິດ ນາງກໍປະເຊີນກັບຄວາມຫຍຸ້ງຍາກ ແລະ ຄວາມໂສກເສົ້າ.
ບໍ່ວ່າຈະມີສິ່ງໃດກີດກັນກໍຕາມ, ບໍ່ວ່າຈະໂສກເສົ້າຫລາຍພຽງໃດ, ແຕ່ນາງກໍໄດ້ກ້າວເດີນໄປໜ້າດ້ວຍສັດທາ. ແລະ ສິ່ງສຳຄັນຄື ນາງຮັກສາຄວາມສຸກໄວ້. ນາງໄດ້ພົບເຫັນ ບໍ່ພຽງແຕ່ວິທີ ທີ່ຕ້ອງອົດທົນກັບບັນຫາຫຍຸ້ງຍາກໃນຊີວິດເທົ່ານັ້ນ ແຕ່ຍັງໄດ້ພົບເຫັນວິທີທີ່ຈະ ຈະເລີນເຕີບໂຕນຳອີກ!
ເລື່ອງລາວຂອງນາງກໍຄ້າຍຄືກັນກັບເລື່ອງລາວຂອງທ່ານ ແລະ ຂ້າພະເຈົ້າ.
ສ່ວນຫລາຍແລ້ວ ການເດີນທາງຂອງເຮົາຈະບໍ່ຮາບພຽງ ຫລື ປາດສະຈາກການທົດລອງ.
ເຮົາແຕ່ລະຄົນກໍມີເວລາທີ່ຕ້ອງເຈັບປວດໃຈ, ຜິດຫວັງ, ໂສກເສົ້າ.
ເຮົາອາດຮູ້ສຶກແມ່ນແຕ່ທໍ້ຖອຍໃຈ ແລະ ໜັກໃຈເປັນບາງຄັ້ງ.
ແຕ່ບຸກຄົນທີ່ດຳລົງຊີວິດຕາມວິທີການເປັນສານຸສິດ—ຜູ້ທີ່ຊື່ສັດ ແລະ ເດີນໜ້າຕໍ່ໄປດ້ວຍສັດທາ, ຜູ້ໄວ້ວາງໃຈໃນພຣະເຈົ້າ ແລະ ຮັກສາພຣະບັນຍັດ;1 ຜູ້ດຳລົງຊີວິດຕາມພຣະກິດຕິຄຸນໃນແຕ່ລະວັນ ແລະ ໃນແຕ່ລະຊົ່ວໂມງ, ຜູ້ໃຫ້ການຮັບໃຊ້ຢ່າງພຣະຄຣິດ ຕໍ່ຜູ້ທີ່ຢູ່ອ້ອມຮອບເຂົາເຈົ້າ, ເຮັດຄວາມດີງາມໄປເທື່ອລະຢ່າງ—ເປັນບຸກຄົນທີ່ ການກະທຳອັນເລັກນ້ອຍ ໄດ້ສ້າງຄວາມແຕກຕ່າງອັນໃຫຍ່ຫລວງ.
ບຸກຄົນທີ່ມີຄວາມກະລຸນາຈັກເລັກຈັກໜ່ອຍ, ໃຫ້ອະໄພຈັກເລັກຈັກໜ່ອຍ, ແລະ ມີຄວາມເມດຕາຈັກເລັກຈັກໜ່ອຍ ຈະເປັນຜູ້ມີເມດຕາ ທີ່ຈະໄດ້ຮັບຄວາມເມດຕາ.2 ບຸກຄົນທີ່ເຮັດໃຫ້ໂລກນີ້ເປັນສະຖານທີ່ ທີ່ດີກວ່າເກົ່າ, ໂດຍການກະທຳຢ່າງເປັນຫ່ວງເປັນໃຍ ແລະ ຮັກຫອມເທື່ອລະຢ່າງ, ແລະ ຜູ້ທີ່ພະຍາຍາມດຳລົງຊີວິດ ທີ່ເປັນພອນ, ເພິ່ງພໍໃຈ, ແລະ ສະຫງົບສຸກ ຂອງການເປັນສານຸສິດຂອງພຣະເຢຊູຄຣິດ ເປັນບຸກຄົນທີ່ໃນທີ່ສຸດ ຈະພົບຄວາມສຸກ.
ເຂົາເຈົ້າຈະຮູ້ວ່າ “ຄວາມຮັກຂອງພຣະເຈົ້າ, ຊຶ່ງແຜ່ຂະຫຍາຍໄປຢ່າງກວ້າງໄກ ໃນໃຈຂອງລູກຫລານມະນຸດ … ເປັນສິ່ງທີ່ໜ້າເພິ່ງປາດຖະໜາ ເກີນກວ່າທຸກສິ່ງທັງປວງ … ແລະ ເປັນສິ່ງທີ່ໜ້າຊື່ນຊົມທີ່ສຸດ ຕໍ່ຈິດວິນຍານ.”3
© 2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ First Presidency Message, August 2017. Laotian. 97928 331