ຂ່າວສານການຢ້ຽມສອນ, ເດືອນສິງຫາ 2017
ການດຳລົງຊີວິດທີ່ອຸທິດຖວາຍ
ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາການດົນໃຈເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈຈຸດປະສົງຂອງສະມາຄົມສະຕີສົງເຄາະ ຕຽມທິດາຂອງພຣະເຈົ້າ ສຳລັບພອນແຫ່ງຊີວິດນິລັນດອນແນວໃດ?
ສັດທາ ຄອບຄົວ ສົງເຄາະ
“ການອຸທິດຖວາຍຄືການແຕ່ງຕັ້ງເປັນທາງການ ຫລື ການອຸທິດບາງສິ່ງວ່າສັກສິດ, ອຸທິດແກ່ຈຸດປະສົງທີ່ສັກສິດ,” ແອວເດີ ດີ ທອດ ຄຣິສໂຕເຟີສັນ ແຫ່ງກຸ່ມອັກຄະສາວົກສິບສອງ ໄດ້ກ່າວ. “ຄວາມສຳເລັດທີ່ແທ້ຈິງໃນຊີວິດນີ້ ມາຈາກການອຸທິດຖວາຍຊີວິດຂອງເຮົາ—ນັ້ນຄື, ເວລາ ແລະ ການເລືອກຂອງເຮົາ—ຕໍ່ຈຸດປະສົງຂອງພຣະເຈົ້າ.”1
ແອວເດີນຽວ ເອ ແມ໊ກສະແວວ (1926–2004) ແຫ່ງກຸ່ມອັກຄະສາວົກສິບສອງ ໄດ້ກ່າວວ່າ, “ເຮົາມັກຄິດເຖິງການອຸທິດຖວາຍ ພຽງແຕ່ເປັນການຍິນຍອມມອບຊັບສິນຂອງເຮົາເທົ່ານັ້ນ, ເມື່ອໄດ້ຮັບການດົນໃຈຈາກສະຫວັນ. ແຕ່ການອຸທິດຖວາຍທີ່ສຸດຍອດ ຄືການຍິນຍອມຖວາຍຕົນໃຫ້ແກ່ພຣະເຈົ້າ.”2
ເມື່ອເຮົາອຸທິດຖວາຍຕົວເອງຕໍ່ຈຸດປະສົງຂອງພຣະເຈົ້າ, ສັດທາຂອງເຮົາ ໃນພຣະເຢຊູຄຣິດ ແລະ ໃນການຊົດໃຊ້ຂອງພຣະອົງ ຈະເພີ່ມທະວີຂຶ້ນ. ເມື່ອເຮົາດຳລົງຊີວິດດ້ວຍການອຸທິດຖວາຍ, ເຮົາສາມາດຖືກເຮັດໃຫ້ສັກສິດ ໂດຍຜ່ານການກະທຳເຫລົ່ານັ້ນ.
ແຄວໂຣ ເອັມ ສະຕີບເວັນສ໌, ທີ່ປຶກສາທີໜຶ່ງໃນຝ່າຍປະທານສະມາຄົມສະຕີສົງເຄາະສາມັນ, ໄດ້ກ່າວວ່າ: “ແອວເດີ ຣໍເບີດ ດີ ແຮວສ໌ ໄດ້ສອນວ່າ, ‘ເມື່ອເຮົາເຮັດ ແລະ ຮັກສາພັນທະສັນຍາ, ເຮົາໄດ້ອອກມາຈາກໂລກ ແລະ ເຂົ້າໄປໃນອານາຈັກຂອງພຣະເຈົ້າ.’
“ເຮົາໄດ້ປ່ຽນໄປ. ເຮົາເບິ່ງແຕກຕ່າງ, ແລະ ເຮົາກໍປະພຶດແຕກຕ່າງ. ສິ່ງທີ່ເຮົາຟັງ ແລະ ອ່ານ ແລະ ເວົ້າ ແມ່ນແຕກຕ່າງ, ແລະ ສິ່ງທີ່ເຮົານຸ່ງຖືແມ່ນແຕກຕ່າງ ເພາະເຮົາກາຍເປັນທິດາຂອງພຣະເຈົ້າ ແລະ ຖືກຜູກມັດໄວ້ກັບພຣະອົງ ໂດຍພັນທະສັນຍາ.”3
ການອຸທິດຖວາຍ ເປັນພັນທະສັນຍາ ທີ່ພຣະເຈົ້າໄດ້ເຮັດ “ໄວ້ກັບເຊື້ອສາຍອິດສະຣາເອນ, ພຣະຜູ້ເປັນເຈົ້າໄດ້ກ່າວວ່າ ເມື່ອເວລານັ້ນມາເຖິງ ເຮົາຈະຕັ້ງກົດບັນຍັດຂອງເຮົາໄວ້ພາຍໃນພວກເຂົາ, ແລະ ຂຽນກົດບັນຍັດນັ້ນໄວ້ທີ່ຫົວໃຈຂອງພວກເຂົາ; ແລະ ເຮົາຈະເປັນພຣະເຈົ້າຂອງພວກເຂົາ, ແລະ ພວກເຂົາຈະເປັນປະຊາຊົນຂອງເຮົາ” (ເຢເຣມີຢາ 31:33). ການດຳລົງຊີວິດດ້ວຍການອຸທິດຖວາຍ ເປັນສິ່ງສອດຄ່ອງກັບແຜນຂອງພຣະເຈົ້າສຳລັບເຮົາ.
ຂໍ້ພຣະຄຳພີເພີ່ມເຕີມ
1 ເທສະໂລນິກ 1:3; Doctrine and Covenants 105:5; reliefsociety.lds.org
© 2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Visiting Teaching Message, August 2017. Laotian. 97928 331