Ennaan eo an Būreejtōnji eo Kein Kajuon, O̧kwōj 2017
Mour An Juon Rikaļoor
Jiln̄uuļ iiō ko remootļo̧k ilo Ghana, juon rijikuuļ in kaļōj etan Doe ekar deļo̧n̄eļo̧k juon m̧ōnjar an LDS kein kajuon ilo mour eo an. Juon leddik m̧ōttan ekar karuwaineneik Doe bwe en ilo̧k ippān, im Doe ekar kōņaan jeļā kōn Kabun̄ in.
Armej ro ijōņ rekar lukkuun em̧m̧an im jouj jon̄an liin eaar ejjeļo̧k men eaar wōjake ak bwilōn̄ wōt, “Kain kabun̄ rot in?”
Doe ekar lukkuun bwilōn̄ jon̄an ekar pepe ippān n̄an katak eļapļo̧k kōn Kabun̄ in im armej ro an, ro raar obrak kōn lan̄lōn̄. Ak iien eo wōt ekar jino kōm̧m̧ane menin, jet uwaan baam̧le eo an im ro m̧ōttan rekar jum̧ae an ekkatak kōn Kabun̄ in ilo jabdewōt wāween. Rekar kōnono kōn men ko renana kōn Kabun̄ in im kar kōm̧m̧ane aolep men remaron̄e n̄an kareel e bwe en jab kobaļo̧k ie.
Ak Doe ekar bōk juon naan in kam̧ool.
Ekar wōr an tōmak, im ekar iakwe gospel in, eo ekar kobrak mour eo an kōn lan̄lōn̄. Kōn menin, ekar wanlaļļo̧k ilo dān in peptaij.
Tokālik, ekar leļo̧k e make ilo ekkatak im jar. Ekar jitlo̧k im pukot im̧we eo an Jetōb Kwojarjar ilo mour eo an. Āinwōt juon uwaak, naan in kam̧ool eo an Doe im tōmak eo an rekar kajoorļo̧k im m̧wilaļļo̧k. Im āliktata ekar pepe ippān n̄an an etal im jerbal e juon mijen aolep raan n̄an Irooj.
Ālkin an kar ro̧o̧ltok jān mijen eo an, ekar jerāiki im m̧areiki bar juon eo ekar bar ro̧o̧l jān an mijinede—ejja e eo wōt ekar peptaij liin iiō ko m̧oktaļo̧k—im tokālik rekar liāp ilo Johannesburg South Africa Temple.
Elōn̄ iiō em̧ōj aer mootļo̧k jān iien eo Doe Kaku ekar jinointata en̄jake lan̄lōn̄ eo an gospel eo an Jisōs Kraist. Jān tōre eo, mour ekar jab aolep iien em̧m̧an n̄an e. Liin eaar niknik ilo ijo an kōn rup bōro im ebbwer, ekoba mej eo an ajri ro ruo nejin—būrom̧ōj eo epen an en̄jake kein rej eddo wōt ilo būruwōn.
Bōtaab e im ļeo pāleen, Anthony, rekar kajjieon̄ epaake wōt doon im Jemāer Ilan̄, Eo rej iakwe kōn aolepān būruweer.
Rainin, 30 iiō ko remootļo̧k ālkin an kar peptaij, Sister Kaku ej kab m̧ōj an kadedeikļo̧k bar juon mijen—iien in kar e im ļeo pāleen, eo ekar juon mijen būreejtōn ilo Nigeria.
Ro rejeļā kajjeen Sister Kaku rej ba bwe ewōr juon men eo ejeno̧lo̧k ippān. Elukkuun alikkar an m̧ōņōņō. Elukkuun pen joļo̧k ad iien ippān im jab maron̄ en̄jake an ļapļo̧k am̧ m̧ōņōņō.
Naan in Kam̧ool eo an elukkuun kajoor: “Ijeļa bwe Rilo̧mo̧o̧r eo ej kalimjōk e āinwōt leddik eo Nejin im m̧ōttan (lale Mosaia 5:7; Ether 3:14),” Ej ba. “Im ij ekkatak im kajjieon̄ bwe in erom Jeran barāinwōt—jab wōt kōn ta ko ij ba ak barāinwōt kōn ta ko ij kōm̧m̧ani.”
Jej Rikaļoor ro
Bwebwenato eo an Kaku ejjeļo̧k oktak jān ko an ro rellōn̄. Ekar wōr an ikdeelel n̄an jeļā m̧ool eo, ekar kōļļā wōņāān eo n̄an bōk meram in jetōb eo, ekar kōmeļeļeik an iakwe n̄an Anij im ro riturin, im ilo iaļ in an ekar ioon wāween ko reppen im kabūrom̧ōjm̧ōj.
Bōtaab jekdo̧o̧n ta jum̧ae eo, jekdo̧o̧n ta būrom̧ōj, ekar wōnm̧aanļo̧k wōt ilo tōmak. Im ejja āinwōt an aorōk, liin eaar dāpij wōt lan̄lōn̄ eo an. Ekar loe juon wāween bwe en jab kijenmej wōt kōn wāween ko reppen an mour in bōtaab n̄an kajjieon̄ tiljek mekarta ke reppen.
Bwebwenato eo an ejjeļo̧k oktak jān eo am̧ im n̄a.
Ejeja an iaļ in ad metal ak an jab wōr mālijjon̄.
Kōj ewōr ippād metak bōro, ebbeer, būrom̧ōj.
Jemaron̄ en̄jake ad ebbeer im ilo jet iien tōrjān jon̄an.
Bōtaab ro rej mour mour an juon rikaļoor—ro rej tiljek im wōnm̧aanļo̧k wōt ilo tōmak; ro rej lōke Anij im kōjparok kien ko An;1 ro rej mour kōn gospel eo raan n̄an raan im awa n̄an awa; ro rej leļo̧k jerbal in jipan̄ an āinwōt an Kraist n̄an ro ipeļaakier, juon jerbal em̧m̧an ilo juon iien—rej ro me kōm̧m̧an ko aer reddik emakijkij aer kōm̧m̧ane juon oktak eļap.
Ro me eļapļo̧k jidik aer jouj, eļapļo̧k aer jeorļo̧k bōd, im kwaļo̧k eļapļo̧k tiraimo̧ kake rej ro retiraimo̧ kake renaaj bōk tiriam̧o kake.2 Ro me rej kōm̧m̧an bwe laļ in en juon jikin em̧m̧anļo̧k, rej kōm̧m̧ane juon jerbal in kea im iakwe kajjojo iien, im er ro rej kajjieon̄ in mour juon mour ejeraam̧m̧an, im eanōm̧m̧an an juon rikaļooren Jisōs Kraist rej ro renaaj lo lan̄lōn̄.
Renaaj jeļā bwe “iakwe eo an Anij, eo kajeeded e ijoko jabdewōt ilo būruōn ro nejin armej … elukkuun ļap kōttōpare jān men ko otemjej … im kam̧ōņōņō tata n̄an jetōb.”3
© 2017 jān Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/17. Kōmālim an ukook: 6/17. Ukook eo an First Presidency Message, August 2017. Marshallese. 97928 874