Mulwol ko Bin Somm’on e Presidency, August 2017
Yafas ko pi Gachalpen
Napan guyey e duw ni ke yan u Ghana, ma bay ba bitir u college ni kanog Doe ngak ni yan nga langgin e tafen e moolung ko LDS ni ireram e som’on rok. Ba fager rok Doe e ire pining ni nge ‘un ngak, me Doe e ri ba’adag ni nge nang ko uw rogon ere Glasia nem.
Pi girdii nem e ri yad ba gol ma ri yad ba manigil ni daryog ma be lemnag ko, “Mang glasia e arogon?”
Doe e kari lemnag ni nge fil marangagen ere Glasia nem nge gothon, ni yad be par nib sug ko falfalan’. Ma napan ni tabab nag, ma bo’or e tabinaw nge fager ni rib tagan ni ri yad be nonnon ngak ni gubin yang ni ra chel ngay. Yad be gathibthib nag e re Glasia nem ma yad be guy rogon ni ngay taleged u rogon ni rayog.
Me Doe ni ke yib e mich rok.
Bay e mich rok, ma kari adag e gospel, ni ire be suguy ko falfalan’. Aram rogon, me yan nga fithik e rran ko tawfe.
Tomuren, mari gel nag ir nge fil boch banen ma be meibil. Ma be balay nage domunmun rok ma be pining e Kan Thothup nga lane yafas rok. Me yani m’ug ni, kari gel e mich rok nge testimony rok ni be mon’og. Ma aram me lemnag ni nge par ni nge mang ba tamachib ni gubin ngiyal’ ngak fare Samol.
Napan ni sul ko mission rok, ma aram me un ngak ba tamachib ni kafini sul ko mission rok ni ireram e cha’ ni tawfe nag—ni gonopan boch e duw nga tomur—ma aram mani seal nag row u Johannesburg South Africa Temple.
Bo’or e duw ni ke yan u napan ni chaney I Doe Kaku e nang rogon fare falfalan’ ko gospel rok Yesus Kristus. Napan e ngiyal nem, ma gathi rib fel’ rogon e yafas rok. Mari athamagiliy e pi daliban’ nga kireban’ rok, ni kub mu’un la’agruw I bitir—ni ke yim’ ni ri kireban’ nib gel ni aram rogon ni kari tomal nag gumircha’en.
Machane yoew e pumoon rok, Anthony, ri yoew be rin’ ni rogon ni ngar chuchugur gow ngorow nge ngak e Chitamangiy nu Tharmiy, ni rib tu’uf rorow u polo’ I gumircha’en row.
Chiney, 30 e duw u napan ni kani tawfe nag, Sister Kaku u kafini mu’ nag rebe mission—rok ni gubin e ngiyal ni yoew e pumoon rok, ni ire ba mission president u Nigeria.
Pi’in ni yad manang Sister Kaku e yad be yoeg ni bay banen rok ni rib manigil. Be galgal. Rib momaw’ rogon ni ngam pirew ni dab mu thamiy e falfalan’ ni ke yib ngom.
Ma fare testimony rok e rib dugil: “ Gumanang ni fare Tabiyul e ma guyeg ni gaag rebe bitir rok nge fager rok. friend (muguy ko Mosiah 5:7; Ether 3:14),” ni yoeg. “Ma gue fil ma gube gay rogon ni rib gel ni ngug mang fager rok boch—ni gathi kemus ni n’en ni gube yoeg ma u rogon ni gube mithmith.”
Gadad pi Gachapen
Marangagen Sister Kaku e ta’areb rogon ngak boche girdii’. Ma bay ba ‘ar’ar rok ni nge nang e tin riyul, ma ke yib pilwon ngak ma ke yib ra’en ngak, ma be dag rogon e adag rok Got nge pi walagen, ma be yan ma be nang rogon e pi momaw’ nge pi kireban’.
Machane demutrug ko mang e pi n’en ni be taleg, fa pi kireban’, ma be yan nga m’on u fithik e mich. Ma rib gaa’ fan, ri be par nib falfalan. Ma ke pir’eg rebe kanawo’ ni nge athamgil ko pi momaw’ ko yafas ma nge gel nag ir ni demutrug rogon!
Marangagen e chaney e ta’areb rogon ngom nge ngog.
Fin munmun ni gabe yan u fithik e pi munguy fa ridariy e magagawon.
Ra bagadad ma bay e pi amith u gumircha’en, pi kireban rodad, pi daliban’.
Ma ku bay ni kari tagananum ma ku boche ngiyal ni dakmur nang anum riy.
Machane pi cha ni be par ni boed rogon e yafas ko pi gachalpen—ni yad be par u fithik e mich ma yad be yan nga m’on u fithik e mich; ma be pagan’ rad ngak Got ma yad be fol ko pi motochiel rok;1 ma be fol ko gospel ni gubin e rran ni gubin e awa; ma be pii’ e ayuw ni boed—Kristus ngak boch e girdii’, ma bin ni tha’abe fel e pi cha’ ni yad be rin’ nochi banen ma be thil nib gaa’.
Pi’in ni yad ba gol boch’uw, ma n’ag fan boch’uw, ma ri ma kireban’ nib gel e yad e yira kireban’ ngorad.2 Pi cha’ ni yad be fal’eg ere fayleng ney ni nge fel’ rogon e par riy, ni u fithik e adag nge tu’ufeg u biyay nge biyay, ma yad be gay rogon ni ngar pired ni yad ba yal’uw, u rogon ni rayog, nge rogon e yafas nib fel’ ni boed e pi gachalpen Yesus Kristus e ireram e pi’in ni yad ra pir’eg e falfalan’.
Yad ra nang ni “adag rok Got, ni ke pu’og nga lan gumircha’en e pi gidii’ … e ireram e n’en ni th’abi fel’ ko gubin banen … ma tha’abi gel e falfalan’ riy ko pi ya’al.”3
© 2017 rok Intellectual Reserve, Inc. All rights reserved. Kan yoloey u Mariken. Kan micheg nag ko thin nu Ngalis: 6/17. Micheg nag i pilyeg: 6/17. Pilyeg thin ko First Presidency Message, August 2017. Yapese. 97928 905