Rongorongo n Reirei ni Kakawari, Aokati 2017
Maiuakina te Maiu ae Tabu
Tataromwaaka ni kamatebwaia te bwai n reirei aei ao n ukoria bwa ko aonga n ataia bwa tera ae ko na tibwaia. E kanga ataakin ana botoniango te bootaki n aine ni katauraoiia natin te Atua aine ibukin kakabwaia n te maiu ae akea tokina?
Onimaki, Utu, Buoka
“Ni katabua ke ni kaokoroa ke n anga te bwai teuana ni katabua, n anga nakon kantaninga aika uaana man tabu,” e taku Unimwaane D. Todd Christofferson man te Kooram n Abotoro n te Tengaun ma Uoman. “Te tokanikai ni koaua n te maiu aei e roko man katabuan maiura—are, ara tai ao ara rinerine—nakon ana kantaninga te Atua.”1
Unimwaane Neal A. Maxwell (1926–2004) man te Kooram n Abotoro n te Tengaun ma Uoman e taku, “Ti riai ni iangoa ti te kan angabwai ngkana e tuangira te Atua, bwa ti na anga ara bwai. Ma te kabanea n angabwai ae moan te bubura bon te anga ngaiira nakon te Atua.”2
Ngkai ti katabui maiura nakon ana kantaninga te Atua, ara onimaki iroun Iesu Kristo ao n Ana mwakuri ni kamaiu a na rikirake. Ngkai ti maiuakina te maiu ae tabu, ti na kona ni kamimitongaki rinanon mwakuri akanne.,
Carole M. Stephens, te Moan Kauntira n te Beretitentii n te Bootaki n Aine, e taku: “Unimwane Robert D. Hales e reirei, ‘Ngkana ti karaoi ao ni kawakin berita, ti a otinako man te aonaaba ao n rin inanon uean te Atua.’
“Ti a bitaki. Ti taraa ni bitaki, ao ara mwakuri a bitaki. Bwaai ake ti ongoraeakin ao ni wareki ao n taekini a bitaki, ao bwaai ake ti bwaini a bitaki ibukina bwa ti riki bwa natin te Atua aika aine are a kabaeaki nakoina ni berita aika a tabu. ”3
Maiuakinan ae tabu bon te berita ae tabu are e karaoia te Atua “ma autin Iteraera; Imwiin boong akekei, e taku te Uea, N na karina au tua inanoia, ao N na koreia inanoia; ao N na riki bwa Atuaia, ao ngaiia ana riki bwa au aomata” (Ieremia 31:33). Maiuakinan te maiu ae tabu bon te maiu ae bootau ma ana baire te Atua ibukira.
Rakan riki Booki aika Tabu
© 2017 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/17. Kariaiakaki rairana: 6/17. Rairan te Visiting Teaching Message, August 2017. Kiribati. 97928 859