សារលិខិតបង្រៀនសួរសុខទុក្ខប្រចាំខែ សីហា ឆ្នាំ ២០១៧
ការរស់នៅក្នុងជីវិតដែលបានថ្វាយ
សូមសិក្សាអត្ថបទនេះប្រកបដោយការអធិស្ឋាន និងស្វែងរកការបំផុសគំនិត ដើម្បីដឹងពីអ្វីដែលត្រូវចែកចាយ ។ តើការយល់ដឹងអំពីគោលបំណងនៃសមាគមសង្គ្រោះ នឹងរៀបចំបុត្រីទាំងឡាយរបស់ព្រះ ឲ្យទទួលបានពរជ័យនៃជីវិតដ៏នៅអស់កល្បជានិច្ចយ៉ាងដូចម្ដេច ?
សេចក្ដីជំនឿ ក្រុមគ្រួសារ ការសង្គ្រោះ
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ថា « ការថ្វាយ គឺជាការញែក ឬ ឧទ្ទិសអ្វីមួយចេញជាបរិសុទ្ធ ថ្វាយចំពោះគោលបំណងដ៏បរិសុទ្ធ ។ « ជោគជ័យដ៏ពិតក្នុងជីវិតនេះ កើតមាននៅក្នុងការថ្វាយជីវិតរបស់យើង — ដែលជាពេលវេលា និង ជម្រើសរបស់យើង — ថ្វាយចំពោះគោលបំណងរបស់ព្រះ » ។១
អែលឌើរ នែល អេ ម៉ាក់ស្វែល ( ១៩២៦–២០០៤ ) ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ថា « យើងបែរទៅគិតអំពីការថ្វាយសំដៅទៅលើតែការថ្វាយទ្រព្យសម្បត្តិរបស់យើងនៅពេលមានការដឹកនាំមកពីស្ថានសួគ៌ប៉ុណ្ណោះ ។ ប៉ុន្តែការថ្វាយដ៏ឧត្តុង្គឧត្តមបំផុត គឺជាការថ្វាយខ្លួនរបស់បុគ្គលម្នាក់ចំពោះព្រះ » ។២
នៅពេលយើងថ្វាយខ្លួនយើងចំពោះព្រះរាជបំណងរបស់ព្រះ នោះយើងមានសេចក្ដីជំនឿកាន់តែខ្លាំងទៅលើព្រះយេស៊ូវគ្រីស្ទ និង ដង្វាយធួនរបស់ទ្រង់ ។ នៅពេលយើងរស់នៅក្នុងជីវិតដែលបានថ្វាយ នោះយើងអាចបានបរិសុទ្ធតាមរយៈទង្វើទាំងនោះ ។
ខារូល អិម ស្ទីហ្វិន ជាទីប្រឹក្សាទីមួយក្នុងគណៈប្រធានសមាគមសង្គ្រោះ បានមានប្រសាសន៍ដូចនេះ ៖ « អែលឌើរ រ៉ូបឺត ឌី ហែល បានបង្រៀនថា ‹ នៅពេលយើងចុះ ហើយរក្សាសេចក្ដីសញ្ញា នោះយើងកំពុងដើរចេញពីលោកិយ ហើយដើរចូលទៅក្នុងនគរព្រះ › ។
យើងបានផ្លាស់ប្ដូរ ។ « យើងមានភាពខុសប្លែក ហើយយើងប្រព្រឹត្តខុសពីមុន ។ អ្វីដែលយើងស្ដាប់ ហើយអាន ហើយថ្លែងមានភាពខុសប្លែក ហើយសម្លៀកបំពាក់ដែលយើងស្លៀកពាក់មានភាពខុសប្លែក ព្រោះយើងក្លាយជាបុត្រីរបស់ព្រះ ដែលបានភ្ជាប់នឹងទ្រង់តាមរយៈសេចក្ដីសញ្ញា » ។៣
ការថ្វាយគឺជាសេចក្ដីសញ្ញាដែលព្រះធ្វើចំពោះ « ពួកវង្សអ៊ីស្រាអែល ក្នុងពេលក្រោយគ្រានោះ គឺយ៉ាងដូច្នេះ យើងនឹងដាក់ក្រឹត្យវិន័យរបស់យើង នៅខាងក្នុងខ្លួនគេ ទាំងចារឹកទុកក្នុងចិត្តគេ នោះយើងនឹងធ្វើជាព្រះដល់គេ ហើយគេនឹងបានជារាស្ត្ររបស់យើង » ( យេរេមា ៣១:៣៣ ) ។ ការរស់នៅក្នុងជីវិតដែលបានថ្វាយ គឺមានភាពចុះសម្រុងទៅនឹងផែនការដែលព្រះមានសម្រាប់យើង ។
បទគម្ពីរបន្ថែម
© 2017 by Intellectual Reserve, Inc. All rights reserved. បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ 6/17 ។ អនុមតិបកប្រែ ៖ 6/17 ។ ការបកប្រែនៃ Visiting Teaching Message, August 2017 ។ Cambodian. 97928 258