សារលិខិតគណៈប្រធានទីមួយប្រចាំ ខែ សីហា ឆ្នាំ ២០១៧
ជីវិតជាសិស្សម្នាក់
ដោយប្រធាន ឌៀថើរ អេស្វ អុជដូហ្វ
ទីប្រឹក្សាទីពីរក្នុងគណៈប្រធានទីមួយ
កាលពីសាមសិបឆ្នាំមុននៅប្រទេស ហ្គាណា និស្សិតសាកលវិទ្យាល័យម្នាក់ឈ្មោះ ដូ បានឈានជើងចូលសាលាប្រជុំ អិល.ឌី.អេស ជាលើកដំបូង ។ មិត្តម្នាក់របស់ ដូ បានអញ្ជើញគាត់ឲ្យទៅព្រះវិហារជាមួយនាង ហើយ ដូ បានមានចម្ងល់ចង់ដឹងថាតើសាសនាចក្រយ៉ាងម៉េចទៅ ។
សមាជិកនៅព្រះវិហារមានភាពរាក់ទាក់ ហើយផ្ដល់ភាពកក់ក្ដៅ ដែលធ្វើឲ្យនាងទប់សរសើរមិនបាន ប៉ុន្តែឆ្ងល់ថា « តើនេះគឺជាសាសនាចក្រអ្វីទៅ ? »
ដូ បានទទួលអារម្មណ៍បំផុសគំនិតឲ្យសម្រេចចិត្តរៀនបន្ថែម អំពីសាសនាចក្រ និង សមាជិកនៃសាសនាចក្រ ដែលជាមនុស្សពោរពេញទៅដោយអំណរច្រើនក្រៃលែងនោះ ។ ប៉ុន្តែខណៈដែលនាងបានសម្រេចចិត្តធ្វើដូច្នេះក្រុមគ្រួសារ និង មិត្តភក្ដិល្អរបស់នាង បានចាប់ផ្ដើមជំទាស់នឹងនាងគ្រប់ជំពូក ។ ពួកគេបានពោលរឿងអាក្រក់ៗអំពីសាសនាចក្រ ហើយបានធ្វើរឿងគ្រប់យ៉ាងដើម្បីពួកគេអាចឃាត់ឃាំងនាង ។
ប៉ុន្តែ ដូ បានទទួលទីបន្ទាល់មួយ ។
នាងមានសេចក្ដីជំនឿ ហើយនាងស្រឡាញ់ដំណឹងល្អ ដែលបំពេញជីវិតរបស់នាងដោយអំណរ ។ ដូច្នេះហើយ នាងបានទទួលពិធីបុណ្យជ្រមុជទឹក ។
ពេលក្រោយមកទៀត នាងបានតាំងចិត្តខិតខំសិក្សា ហើយអធិស្ឋាន ។ នាងបានតមអាហារ ហើយបានស្វែងរកឥទ្ធិពលនៃព្រះវិញ្ញាណបរិសុទ្ធនៅក្នុងជីវិតរបស់នាង ។ ជាលទ្ធផល ទីបន្ទាល់ និង សេចក្ដីជំនឿរបស់ ដូ កាន់តែរឹងមាំ ហើយរីកចម្រើនឡើង ។ នៅទីបំផុត នាងបានសម្រេចចិត្តបម្រើបេសកកម្មពេញម៉ោងថ្វាយព្រះអម្ចាស់ ។
បន្ទាប់ពីនាងត្រឡប់ពីបេសកកម្មវិញ នាងបានដើរលេងជាគូ ហើយរៀបការជាមួយអ្នកត្រឡប់ពីបេសកកម្មវិញ—ជាបុរសម្នាក់ដែលបានជ្រមុជទឹកឲ្យនាងកាលពីប៉ុន្មានឆ្នាំមុន—ហើយបន្ទាប់មក ពួកគេបានផ្សារភ្ជាប់នៅក្នុងព្រះវិហារបរិសុទ្ធ យ៉ូហាណែស្បើក អាហ្វ្រិកខាងត្បូង ។
ច្រើនឆ្នាំបានកន្លងផុតទៅ ចាប់តាំងពីពេលដែល ដូ កាគូ បានទទួលបទពិសោធន៍អំណរនៃដំណឹងល្អរបស់ព្រះយេស៊ូវគ្រីស្ទជាលើកដំបូង ។ អំឡុងពេលច្រើនឆ្នាំនេះ ជីវិតមិនមែនរីករាយជានិច្ចកាលចំពោះនាងនោះទេ ។ នាងបានអត់ទ្រាំនឹងការខូចចិត្ត និង ការអស់សង្ឃឹម រួមមានការបាត់បង់កូនពីរនាក់ — ដែលទុក្ខព្រួយដ៏សោកសៅនៃបទពិសោធន៍ទាំងនោះ បន្តជាបន្ទុកយ៉ាងធ្ងន់ធ្ងរក្នុងដួងចិត្តរបស់នាង ។
ប៉ុន្តែ នាង និង ស្វាមីរបស់នាង អាន់តូនី បានខិតខំធ្វើការជាមួយគ្នា និង ជាមួយព្រះវរបិតាសួគ៌ជាទីស្រឡាញ់ ដែលពួកគេស្រឡាញ់ទ្រង់ដោយអស់ពីចិត្ត ។
សព្វថ្ងៃនេះគឺមានរយៈពេល ៣០ ឆ្នាំ ហើយបន្ទាប់ពីនាងបានទទួលពិធីបុណ្យជ្រមុជទឹក ស៊ិស្ទើរ កាគូ កំពុងបម្រើបេសកកម្មពេញម៉ោងមួយទៀត — ពេលនេះនាងបម្រើជាមួយស្វាមីរបស់នាង ដែលជាប្រធានបេសកកម្មនៅប្រទេស នីហ្សេរីយ៉ា ។
មនុស្សដែលស្គាល់ ស៊ិស្ទើរ កាគូ និយាយថា នាងមានអ្វីមួយពិសេស ។ នាងមានសុភមង្គលដ៏រុងរឿង ។ ពេលចំណាយពេលជាមួយនឹងគាត់ នោះអ្នកនឹងមានអារម្មណ៍កាន់តែរីករាយ ។
ទីបន្ទាល់របស់នាងមានភាពច្បាស់លាស់ ។ នាងថ្លែងដូចនេះ ៖ « ខ្ញុំដឹងថា ព្រះអង្គសង្គ្រោះទតមើលមកខ្ញុំ ថាជាបុត្រី និង ជាមិត្តសំឡាញ់របស់ទ្រង់ ( សូមមើល ម៉ូសាយ ៥:៧ អេធើរ ៣:១៤ ) ។ « ហើយខ្ញុំក៏កំពុងរៀន ព្រមទាំងព្យាយាមយ៉ាងខ្លាំងក្លា ដើម្បីធ្វើជាមិត្តសំឡាញ់របស់ទ្រង់ដែរ — មិនគ្រាន់តែតាមរយៈពាក្យសម្ដីដែលខ្ញុំថ្លែងប៉ុណ្ណោះទេ គឺតាមរយៈទង្វើដែលខ្ញុំធ្វើផងដែរ » ។
យើងគឺជាពួកសិស្ស
ប្រវត្តិរបស់ស៊ិស្ទើរ កាគូ មានលក្ខណៈស្រដៀងទៅនឹងប្រវត្តិរបស់មនុស្សជាច្រើនដែរ ។ នាងមានបំណងស្គាល់សេចក្ដីពិត នាងបានបង់ថ្លៃដើម្បីបានពន្លឺខាងវិញ្ញាណ នាងបានបង្ហាញសេចក្ដីស្រឡាញ់ចំពោះព្រះ និង មនុស្សជុំវិញខ្លួនរបស់នាង ហើយកាលកំពុងធ្វើដូចនោះ នាងបានជួបប្រទះនឹងភាពលំបាក និងទុក្ខព្រួយ ។
ប៉ុន្តែទោះជាមានការប្រឆាំង ទោះជាមានទុក្ខព្រួយយ៉ាងណាក្ដី នាងនៅតែបន្តឆ្ពោះទៅមុខដោយសេចក្ដីជំនឿ ។ ហើយវាមានសារៈសំខាន់ដូចគ្នាទៅនឹងការរក្សាអំណររបស់នាងដែរ ។ នាងបានរកឃើញរបៀបដែលមិនគ្រាន់តែដើម្បីអត់ទ្រាំក្នុងភាពលំបាកនៃជីវិតនោះទេ ប៉ុន្តែក៏ដើម្បីភាពរីកចម្រើនផងដែរ ទោះជាមានភាពលំបាកទាំងនោះក្ដី !
ប្រវត្តិរបស់នាងមានលក្ខណៈស្រដៀងនឹងប្រវត្តិរបស់បងប្អូន និង ខ្ញុំដែរ ។
វាកម្រណាស់ដែលដំណើរជីវិតរបស់យើងមានដំណើររលូន ឬ គ្មានការសាកល្បងនោះ ។
យើងម្នាក់ៗមានដំបៅដួងចិត្ត ការខកចិត្ត និង ទុក្ខព្រួយ ។
យើងក៏នឹងអាចមានអារម្មណ៍បាក់ទឹកចិត្តនៅគ្រាដែលមានភាពលំបាកពន់ពេកដែរ ។
ប៉ុន្តែអ្នកទាំងឡាយណាដែលរស់នៅក្នុងជីវិតជាសិស្សម្នាក់ — គឺជាបុគ្គលដែលបន្តមានចិត្តស្មោះត្រង់ ហើយបន្តឆ្ពោះទៅមុខដោយសេចក្ដីជំនឿ ជាបុគ្គលដែលទុកចិត្តលើព្រះ ហើយគោរពតាមព្រះបញ្ញត្តិទាំងឡាយរបស់ទ្រង់១ ជាបុគ្គលដែលរស់នៅតាមដំណឹងល្អជារៀងរាល់ថ្ងៃ និងជារៀងរាល់ម៉ោង ជាបុគ្គលដែលធ្វើការបម្រើដូចព្រះគ្រីស្ទទៅដល់មនុស្សជុំវិញខ្លួន ដែលជាទង្វើល្អម្ដងមួយៗ — ជាអ្នកទាំងឡាយណាដែលធ្វើកិច្ចការតូចតាចៗរបស់ពួកគេ តែងធ្វើឲ្យមានភាពខុសប្លែកមួយដ៏ធំ ។
អ្នកទាំងឡាយដែលមានសណ្ដានចិត្តកាន់តែល្អ ដែលកាន់តែចេះអភ័យទោស និង ដែលកាន់តែមានក្តីមេត្តាករុណា នោះនឹងទទួលបានក្តីមេត្តាករុណាវិញ ។២ អ្នកទាំងឡាយណាដែលធ្វើឲ្យពិភពលោកនេះក្លាយជាទីកន្លែងកាន់តែមានភាពស្រស់បំព្រង ជាអ្នកដែលមានទង្វើខ្វល់ខ្វាយ មានក្ដីស្រឡាញ់ និងជាអ្នកដែលព្យាយាមរស់នៅក្នុងជីវិតនៃភាពជាសិស្សរបស់ព្រះយេស៊ូវដ៏មានពរ ដ៏ជាទីពេញចិត្ត និង ភាពសុខសាន្ដគឺជាអ្នកទាំងឡាយណាដែលនឹងរកឃើញអំណរនៅទីបំផុត ។
ពួកគេនឹងដឹងថា « សេចក្ដីស្រឡាញ់នៃព្រះ ដែលមានសាយសព្វនៅក្នុងចិត្តនៃកូនចៅមនុស្ស … គឺជាសេចក្ដីស្រឡាញ់ ដែលគួរឲ្យប្រាថ្នាដ៏លើសលប់ជាងអ្វីៗទាំងអស់ … គឺជាសេចក្ដីរីករាយបំផុតដល់ព្រលឹង » ។៣
© 2017 by Intellectual Reserve, Inc. All rights reserved. បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ 6/17 ។ អនុមតិបកប្រែ ៖ 6/17 ។ ការបកប្រែនៃ First Presidency Message, August 2017 ។ Cambodian. 97928 258