Te Rongorongo man te Moan Beretitentii, Tebetembwa 2017
Burabeti a na Kairiira
Tabeua te ririki n nako, I tekateka n ruun te Tembora i Salt Lake n aia tabo are a boboowi iai ni katoa wiiki kain te Moan Beretitentii ao te Kooram n Abotoro are Tengaun ma Uoman. I katokai matau n tara te oo are e kaitaraia kain te Moan Beretitentii, ao ikeke I noori tamneia Beretitenti n te Ekaretia n tatabemaniia nako.
Ngke I taraiia, naake a onomwi—man te Burabeti Iotebwa Timiti (1805–44) ni karokoa Beretitenti Gordon B. Hinckley (1910–2008)—I iango, “Ai kakabwaiara ngai ibukin aia kairiiri n tatabemaniia nako.”
Aikai mwaane aika korakora aika aki nano tiotio, aki bwarannano, ao n aki kona ni bwaaka. Aikai ana aomata te Atua. Ngke I iangoa te burabeti ni boong aikai are I a tia ni kina ao n tangiria, I kauring aron maiuia, annuaia, ao aia reirei aika a anainano.
Beretitenti Heber J. Grant (1856–1945) bon te Beretitenti n te Ekaretia ngke I bungiaki. Ngke I iangoa maiuna ao ana reirei, I kakoaua bwa anuan maiun Beretitenti Grant n tainako e kaotia bwa te aomata ae teimatoa—teimatoa ni bwaai ake a raraoi ao a kakannato.
Beretitenti George Albert Smith (1870–1951) bon te Beretitenti n te Ekaretia n te tai are I riki iai bwa te bitiobi n au uoote n te Kaawa are Salt Lake. E noria bwa iai te kaiangatoa ae korakora imarenan te Uea ao taan kakaitara. “Ngkana ko na tiku n ana itera te Uea iaon te rain,” e reirei, “ko a mena iaan ana kairi ao a na bon akea nanom ni karaoa ae bure.”1
I weteaki bwa N na riki bwa kain te Kooram n Abotoro n te Tengaun ma Uoman n 1963 iroun Beretitenti David O. McKay (1873–1970). E reirei mwannanoaia tabeman n arona ni maiuakinan maiuna. “Kiritian ni Koaua,” e taku, “bon karaoan nanon te tangira.”2
Beretitenti Joseph Fielding Smith (1876–1972), temanna mai buakoia kain te ekaretia ae korakora ana koroboki ni bookin te Ekaretia, n iai ana reirei ni kairi inanon maiuna n te euangkerio ike e reke iai ana tikaoratibu. E aki toki ni wareki koroboki aika a tabu ao kanga I a taneiai ma ana reirei ao ana koaua ake e korei inanon ana iteraniba bon temanna ibuakoia ake i rang ataia.
Beretitenti Harold B. Lee (1899–1973) e riki bwa au titeiki beretitenti ngke I ataeinimwane. Ana koroboki ae I tatangiria bon “Tei n tabo aika a tabu, ao n aki kamwaingaki.”3 E kaungaia Aika Itiaki bwa a na itiaki ao n tatauraoi, ni kaeka nakon, ana wirikiriki te Tamnei ae Raoiroi.
I kakoaua bwa te reirei are kaira maiu te Beretienti ae Spencer W. Kimball (1895–1985) bon te mwakuri korakora ae mamate iai nanom. Bon te aomata ae bane arona, n akea ana nanououa ni bane nanona nakon te Uea. E mwakuri korakora naba ni maiuakina te euangkerio.
Ngke Beretitenti Ezra Taft Benson (1899–1994) e riki bwa te Beretitenti n te Ekaretia, e weteai bwa N na riki bwa ana Kauoman ni Kauntira n te Moan Beretitentii. Te tangira bon ana reirei ni kairi, are e rabwatanaki n ana taeka are e tatangiria, are taekinaki iroun te Tia Kamaiu: “Aekaki n aomata raa ngkami? E koaua ae I tuangkami, kam na riki n ai Arou.”4
Beretitenti Howard W. Hunter (1907–95) bon ngaia are e tatara tamaroaia tabeman. N tainako e mwamwannano; ao e nanorinano. E reke au tai n riki bwa ana Kauoman ni Kauntira.
Beretitenti Gordon B. Hinckley e reireiniira bwa ti na kakaraoa ara kabanea n tamaroa. E kaota ana kakoaua ae korakora iroun te Tia Kamaiu ao Ana mition. E reireiniira ma te tangira. N riki bwa ana Moan Kauntira bon te tibwanga ae karineaki ao te kakabwaia nakoiu.
Te Tia Kamaiu e kanakoia burabeti ibukina bwa E tangiriira. N tain te maungatabu ni kabuta n Okitobwa aei, Mataniwi ni Kabuta n te Ekaretia e reke aia tai n tibwai Ana taeka. Ti butimwaea te tibwanga aei ma te tauannano ae korakora ao te nanorinano.
Ai kakabwaiara ngaira ngkai e kaokaki ana Ekaretia Iesu Kristo nakon te aonaaba ao e kateaki te Ekaretia iaon te kaotioti ae te ba. Kaotioti aika reitinako bon maiun ana euangkerio ae moan te kakaawaki Iesu Kristo.
Tina katauraoira ni karekei oin ara kaotioti ake a mwaiti n roroko n tain te maungatabu ni kabuta. E na kaonaki nanora ma te nanomatoa ae nano ngkai ti katei baira ni kamatoaia ara burabeti aika a maiu ao abotoro. Tina kaotaaki, tabekakirake, karauaki nanora, ao ni kakorakoraaki ngkai ti kakauongo nakon aia rongorongo. Ao ti bia katauraoira bwa tina kabaei nanora nakon te Uea Iesu Kristo—Ana euangkerio ao Ana mwakuri—ao ni maiu ni manga kabouaki ni kawakinakin Ana tua ao ni karaoan Ana kantaninga.
© 2017 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki n te USA. Kariaiakaki n te Ingiriti: 6/17. Kariaiakaki rairana: 6/17. Rairan te First Presidency Message, September 2017. Kiribati 97929 859