Mensahe sang Unang Panguluhan, Septyembre 2017
Mga Propeta nga Maggiya sa Aton
Mga pila katuig ang nagligad, nagapungko ako sa isa ka kuwarto sang Salt Lake Temple sa diin ang Unang Panguluhan kag ang Korum sang Napulo‘g Duha ka mga Apostoles nagatipon makaisa sa isa ka semana. Nagtangla ako sa dingding nga nagaatubang sa Unang Panguluhan, kag didto ginlantaw ko ang mga litrato sang tagsa ka Pangulo sang Simbahan.
Samtang ginatulok ko sila nga mga nauna sa akon—humalin sa Propetang si Joseph Smith (1805–44) pakadto kay Pangulong Gordon B. Hinckley (1910–2008)—nagpanumdum ako, “Daw ano kadako sang akon pagpasalamat sa paggiya sang kada isa.”
Mga tawo ini sila nga wala gid nagduha-duha, wala gid nagpangalag-ag, kag wala gid nagpaslaw. Mga tawo ini sila sang Dios. Sang ginapanumdum ko ang mga propeta sa moderno nga panahon nga akon nakilala kag ginpalangga, nadumduman ko ang ila mga kabuhi, ang ila mga kinaiya, kag ang ila inspirado nga mga panudlo.
Si Pangulong Heber J. Grant (1856–1945) amo ang Pangulo sang Simbahan sang natawo ako. Sa pagbinag-binag ko sang iya kabuhi kag mga panudlo, nagapati ako nga isa ka kinaiya nga pirme ginapakita ni Pangulong Grant amo ang kapisan—kapisan sa sinang mga butang nga maayo kag talahuron.
Si Pangulong George Albert Smith (1870–1951) amo ang Pangulo sang Simbahan sang panahon nga nag-alagad ako bilang bishop sang akon ward sa Salt Lake City. Naghambal sia nga may daku nga pag-agaway nga nagaluntad sa tunga sang Ginuo kag sang kaaway. “Kon magpabilin ka sa hubon sang Ginuo,” panudlo niya, “mangin yara ka sa idalom sang iya impluwensya kag wala sing mangin huyog nga maghimo sang indi husto.”1
Gintawag ako nga mag-alagad bilang miyembro sang Korum sang Napulo‘g Duha ka mga Apostoles sang 1963 ni Pangulong David O. McKay (1873–1970). Nagpanudlo sia sang pagpasunaid sa iban paagi sa iya kaugalingon nga pagpangabuhi. “Ang matuod-tuod nga pagka-Kristiyano,” siling niya, “paghigugma sa buhat.”2
Si Pangulong Joseph Fielding Smith (1876–1972), nga isa sang may pinakamadamo nga mga sinulatan sa mga manululat sang Simbahan, naghimo sang pagtuon sang ebanghelyo bilang iya giya nga prinsipyo sa kabuhi. Wala untat ang iya pagbasa sang balaan nga mga kasulatan kag wala na ako sang iban pa nga nakilal-an nga nakasayod sang mga panudlo kag mga doktrina nga makita sa mga pamihak sini pareho sa iya.
Si Pangulong Harold B. Lee (1899–1973) nag-alagad bilang akon stake president sang bata pa ako. Isa sang iya paborito nga dinalan amo ang “Magtindog kamo sa balaan nga mga lugar, kag indi kamo malingkang.”3 Ginpaisog niya ang mga Santos nga mangin nagakaangay, kag handa sa pagbaton, sang mga paghutik sang Balaan nga Espiritu.
Nagapati ako nga isa ka giya nga prinsipyo sa kabuhi ni Pangulong Spencer W. Kimball (1895–1985) amo ang dedikasyon. Lubos sia kag indi manegar nga dedikado sa Ginuo. Dedikado man sia sa pagpangabuhi sang ebanghelyo.
Sang si Pangulong Ezra Taft Benson (1899–1994) nangin Pangulo sang Simbahan, gintawag niya ako nga mag-alagad bilang iya Ikaduhang Manuglaygay sa Unang Panguluhan. Ang iya giya nga prinsipyo amo ang pagpalangga, nga yara sa iya paborito nga dinalan, nga ginhambal sang Manluluwas: “Ano nga sari sang tawo kamo mangin dapat? Sa pagkamatuod ginasiling ko sa inyo, bisan subong man sa akon.”4
Si Pangulong Howard W. Hunter (1907–95) isa nga pirme makita ang kaayo sa iban. Pirme sia matinahuron; pirme sia mapainubuson. Pribelihiyo ko nga mag-alagad bilang iya Ikaduhang Manuglaygay.
Si Pangulong Gordon B. Hinckley nagtudlo sa aton sa paghimo sang tanan naton nga masarangan. Naghatag sia sang mabaskog nga panaksihon parte sa Manluluwas kag sa Iya misyon. Gintudloan niya kita sing may pagpalangga. Ang mag-alagad bilang iya Unang Manuglaygay isa ka dungog kag bugay para sa akon.
Ang Manluluwas nagapadala sang mga propeta bangod palangga Niya kita. Sa pangkabilugan nga komperensya sining Oktubre, ang mga General Authority sang Simbahan sa liwat makaangkon sang pribelihiyo sa pagpaambit sang Iya pulong. Ginahikot namon ining responsibilidad nga may daku nga pagtahod kag pagpaubos.
Daw ano kita ka bulahan nga ang ginpanumbalik nga Simbahan ni Jesucristo yari sa duta kag ang Simbahan napasad sa bato sang rebelasyon. Ang nagapadayon nga rebelasyon amo ang pinakaimportante nga bahin sang ebanghelyo ni Jesucristo.
Kabay nga maghanda kita sa pagbaton sang personal nga rebelasyon nga nagaabot sing bugana sa tion sang pangkabilugan nga komperensya. Kabay nga ang aton mga tagipusuon mapuno sang hugot nga pagtinguha samtang ginaalsa naton ang aton mga kamot agud itib-ong ang buhi nga mga propeta kag mga apostoles. Kabay nga masanagan kita, mainspirar, mapasulhay kag mapabakod sa aton pagpamati sa ila mga mensahe. Kag kabay nga mangin handa kita sa pagdedikar liwat sang aton mga kaugalingon sa Ginuong Jesucristo—sa Iya ebanghelyo kag Iya buluhaton—kag sa pagpangabuhi nga may dugang nga kabakod sa pagtuman sang Iya mga kasugoan kag paghimo sang Iya pagbuot.
© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipnas. Petsa sang pagtugot sa Ingles: 6/17 Petsa sang pagtugot sa paglubad: 6/17. Paglubad sang First Presidency Message, September 2017. Hiligaynon 97929 861