Mensahe sa Visiting Teaching, Septyembre 2017

Isa sang Tagipusuon

Tun-i sing mainampuon ining materyal kag magpangamuyo agud mahibaloan kon ano ang ipaambit. Paano bala ang paghangop sang katuyuan sang Relief Society nagahanda sa mga anak nga babayi sang Dios para sa mga bugay sang kabuhi nga wala’y katapusan?

“Kag ang Ginuo nagtawag sang iya katawhan nga Sion, kay isa sila sa tagipusuon kag isa sa hunahuna, kag nagpuyo sa pagkamatarong; kag wala sing imol sa tunga nila” (tan-awa sa Moses 7:18). Paano kita mangin isa?

Si Elder M. Russell Ballard sang Korum sang Napulo‘g Duha ka mga Apostoles nagsiling: Sa tunga sang Ingles nga tinaga nga atonement (pagpasag-uli) amo ang tinaga nga one (isa). Kon ang bug-os nga katawhan nakaintiendi sini, wala sing bisan isa nga indi naton pagkabalakhan, wala sapayan sang edad, rasa, kasarian, relihiyon, ukon sosyal o pinansyal nga kahimtangan. Magapaninguha kita nga sundon ang Manluluwas kag indi gid mangin mapintas, wala‘y labot, di-matinahuron, ukon insensitibo sa iban.”¹

Si Pangulong Henry B. Eyring, Unang Manuglaygay sa Unang Panguluhan nagpanudlo: “Kon sa diin kaupod sang mga tawo [ang] Espiritu, makapaabot [sila] sang maayo nga pagsinalayo. … Ang Espiritu sang Dios wala nagatuga sang pagbinaisay (tan-awa sa 3 Nefi 11:29). … Nagadala ini sang katawhay sa kaugalingon kag balatyagon sang pag-isa sa iban.”²

Nga nagahambal parte sa mga hangkat sang pamilya, si Carole M. Stephens, nga nag-alagad bilang Unang Manuglaygay sa Pangkabilugan nga Panguluhan sang Relief Society nagsiling: “Wala ako nakaagi sang diborsyo, sang kasakit kag kawala‘ y kompiyansa nga kaupod sang pagbiya, ukon sang responsibilidad mahiangot sa pagka-solo nga ginikanan. Wala ako nakaagi nga napatyan sang isa ka anak, pagkabaw-as, ukon kaluyag sa pareho ko nga babaye. Wala ako nakaagi sang pag-abuso, malawig nga pagmasakit, ukon adiksyon. Indi nangin amo sini ang mga higayon nga mainat ako.

“… Apang paagi sa kaugalingonko nga mga pagsulay kag pagtilaw … nakilala ko gid ang Isa nga nakaintiende. … Kag dugang pa, naagyan ko ang tanan nga mga pagtilaw sang kabuhi nga bag-o ko lang namitlang paagi sa salaming sang isa ka anak, iloy, lola, utod, tiya, kag abyan.

“Ang aton mga oportunidad bilang mga nagatuman-kasugtanan nga mga anak nga babayi sang Dios indi lang ang magtuon halin sa aton mga hangkat; kundi ang makig-isa sa pag-intiendi kag pagkaluoy samtang ginasakdag naton ang iban pa nga mga miyembro sang pamilya sang Dios sa ila mga pagpangabudlay.” ³

Dugang nga Balaan nga mga Kasulatan kag Impormasyon

Juan 17:20–23; Mga Taga-Efeso 4:15; Mosias 18:21–22; 4 Nefi 1:15;

reliefsociety.lds.org

© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipnas. Petsa sang pagtugot sa Ingles: 6/17 Petsa sang pagtugot sa paglubad: 6/17. Paglubad sang Visiting Teaching Message, September 2017. Hiligaynon 97929 861