Mensahe ti Umuna a Panguluen, Septiembre 2017
Dagiti Propeta a Mangiwanwan Kadatayo
Sumagmamano a tawen ti napalabas, nagtugtugawak iti siled ti Salt Lake Temple a pagmimitingan ti Umuna a Panguluen ken ti Korum dagiti Sangapulo-ket-dua nga Apostol iti maminsan ti makalawas. Minatmatak ti diding a sumango iti Umuna a Panguluen, ket idiay a napaliiwko dagiti ladawan ti tunggal Presidente ti Simbaan.
Iti panangmatmatko kadakuada, dagiti immun-una kaniak—manipud ken ni Propeta Joseph Smith (1805–44) agingga ken ni Gordon B. Hinckley (1910–2008)—napanunotko, “Dakkel ti panagyamanko iti panangiwanwan ti tunggal maysa.”
Dagitoy dagiti naindaklan a lallaki a di pulos nagduadua, di pulos nagpangngadua, ken di pulos naupay. Dagitoy dagiti tattao ti Dios. Kabayatan ti panangpampanunotko maipapan kadagiti propeta iti agdama nga aldaw a naam-ammok ken inay-ayat, nalagipko dagiti panagbiagda, dagiti nasayaat a kababalinda, ken dagiti naparegta a pannursuroda.
Ni Presidente Heber J. Grant (1856–1945) ti Presidente ti Simbaan idi mayanakak. Kabayatan ti panangutobko iti biag ken dagiti pannursurona, mamatiak a ti kababalin a kanayon nga impagwadan ni Presidente Grant ket ti panagpursigi—panagpursigi kadagiti banag a nasayaat ken natakneng.
Ni Presidente George Albert Smith (1870–1951) ti President ti Simbaan iti panawen a panagserbik a kas maysa a bishop iti wardko iti Salt Lake City. Napaliiwna nga adda dakkel a panagbalubal a maar-aramid iti nagbaetan ti Apo ken ti kabusor. “No agtalinaedka iti abay ti Apo iti linia,” insurona, “addaka iti impluensiana ken awanto ti tarigagaymo nga agaramid iti biddut.”1
Inaawagannak nga agserbi kas maysa a miembro ti Korum dagiti Sangapulo-ket-dua idi 1963 ni Presidente David O. McKay (1873–1970). Insurona ti pannakaibilang dagiti dadduma babaen ti wagas a panagbiagna. “Ti Pudno a Kristiano,” kinunana, “ket ayat nga adda aramidna.”2
Ni Presidente Joseph Fielding Smith (1876–1972), maysa kadagiti kalaingan a managpartuat a mannurat ti Simbaan, ket addaan iti pangiwanwan a prinsipio iti biagna iti panagadalna iti ebanghelio. Agbasbasa kadagiti nasantuan a kasuratan nga awan sardayna ken ammona dagiti pannursuro ken doktrina a masarakan kadagiti panid dagitoy kas iti asino man a naam-ammokon.
Ni Presidente Harold B. Lee (1899–1973) ket nagserbi a kas stake presidentko idi ubingak. Paggugustona a pagsasao ti “Agtakderkayo kadagiti nasantuan a lugar, ket di aggaraw.”3 Pinaregtana dagiti Santo nga agbalinda a mannakitunos, ken managdengngeg, kadagiti arasaas ti Espiritu Santo.
Mamatiak iti pangiwanwan a prinsipio iti biag ni Presidente Spencer W. Kimball (1895–1985) ket dedikasion. Naan-anay nga indatonna ti bagina iti Apo. Indatonna ti bagina iti panagbiag iti ebanghelio.
Idi nagbalin a Presidente ti Simbaan ni Presidente Ezra Taft Benson (1899–1994), inawagannak nga agserbi a kas Maikadua a Mammagbagana iti Umuna a Panguluen. Ayat ti pangiwanwan a prinsipiona, a naikabil iti paggugustona nga adaw, nga insao ti Mangisalakan: “Ania a kita ti tao ti nasken a pagbalinanyo? Pudno kunak kadakayo, kas kaniak.”4
Ni Presidente Howard W. Hunter (1907–95) ti maysa a kanayon a a mangkita iti pagsayaatan dagiti dadduma. Isu ket kanayon a managdayaw; kanayon a napakumbaba. Pribilehiok ti nagserbi a kas Maikadua a Mammagbagana.
Insuronatayo ni Presidente Gordon B. Hinckley nga aramidentayo amin a kabaelantayo. Insawangna ti nabileg a pammaneknekna maipapan ti Mangisalakan ken ti misionna. Sinuruannatayo nga agayat. Ti panagserbik a kas Umuna a Mammagbagana ket pammadayaw ken bendision kaniak.
Ibaon ti Mangisalakan dagiti propeta gapu ta ay-ayatennatayo. Kabayatan ti sapasap a komperensia iti daytoy nga Oktubre, addanto manen pribilehio dagiti General Authority a mangibinglay iti balikasda. Padaanantayo daytoy a pagrebbengan nga addaan iti dakkel a kinapasnek ken kinapakumbaba.
Naparaburantayo iti kaadda ti naisubli a Simbaan ni Jesucristo iti daga ken nabangon ti Simbaan iti bato ti paltiing. Ti agtultuloy a paltiing ti mismo a pudno a kaipapanan ti ebanghelio ni Jesucristo.
Makapagsaganatayo koma nga umawat iti personal a paltiing a naruay a sumangbay kabayatan ti sapasap a komperensia. Mapno koma dagiti puspusotayo iti nauneg a determinasion bayat ti panangingatotayo kadagiti imatayo a mangkanunong kadagiti sibibiag a propeta ken apostol. Malawlawagan, maparegta, maliwliwa, ken mapapigsatayo koma kabayatan ti idedengngegtayo kadagiti mensaheda. Ken makapagsaganatayo koma a mangikumit manen iti bagbagitayo ken ni Apo Jesucristo—ti ebangheliona ken ti aramidna—ket agbiagtayo nga addaan iti napabaro a pangngeddeng iti panagtungpal kadagiti bilinna ken panangipatungpal iti pagayatanna.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17 Pannakaanamongna a maipatarus: 6/17. Pannakaipatarus ti First Presidency Message, September 2017. Ilokano. 97929 864