Mensahe iti Visiting Teaching, Septiembre 2015
Sangsangkamaysa iti Puso
Nainkararagan nga adalenyo daytoy a material ken kalikagumanyo ti inspirasion tapno ammuen no ania ti ibinglayyo. Kasano a ti pannakaawattayo iti panggep ti Relief Society ket mangisagananto kadagiti annak a babbai ti Dios para kadagiti bendision ti agnanayon a biag?
Pammati Pamilia Tulong
Ket ninaganan ti Apo dagiti taona iti Zion, gapu ta sangsangkamaysa ti puso ken panunotda, ken nagtaengda iti kinalinteg; ket awan ti nakurapay kadakuada” (Moises 7:18). Kasano nga agkaykaysatayo?
Kinuna ni Elder M. Russell Ballard ti Korum dagiti Sangapulo-ket-dua nga: “Iti tengnga ti balikas nga English atonement ket ti balikas a one. No maawatan ti amin a sangkataw-an daytoy, awan koma pulos ti asino ti pannakaseknantayo, ania man ti edad, maris ti kudil, katatao, relihion, wenno kasasaad iti kagimongan wenno ekonomia. Ikarigatantayo koma a tuladen ti Mangisalakan ken ditayo koma agbalin a natangsit, napalangguad, wenno saan a naasi kadagiti dadduma”1
Insuro ni Presidente Henry B. Eyring, Umuna a Mammagbaga iti Umuna a Panguluen: “No adda kadagiti tao [ti] Espiritu kadakuada, [isuda] manamnamada ti panagtutunos. … Ti Espiritu ti Dios ket saan a mangparnuay iti pannakisuppiat (kitaen iti 3 Nephi 11:29). … Daytoy ti mangiturong iti bukod a talna ken rikna ti pannakikaysa iti dadduma.”2
No maipanggep kadagiti pannubok ti pamilia, kinuna ni Carole M. Stephens, a nagserbi kas Umuna a mammagbaga iti Sapasap a Panguluen ti Relief Society: “Diak pay pulos napadasan ti nagbiag iti baet ti diborsio, ti saem ken awan talged a gapu ti pannakabaybay-an, wenno ti responsibilidad ti panagbalin nga agmaymaysa nga ina. Diak pay pulos napadasan ti namatayan iti maysa nga anak, saan a nakaanak, wenno panaggusto iti kapada iti katataona. Diak pay napadasan ti agibtur iti panagabuso, makapatay a sakit, wenno pannakairuam. Saan a dagitoy dagiti panagpatibker a gundaway kaniak.
“… Ngem babaen dagiti bukodko a pannubok … naam-ammok a nasayaat ti Maysa a mannakaawat. … Ken maysa pay, napadasak ti amin a mortal a pannubok a kadakdakamatko babaen ti lente ti maysa nga anak a babai, ina, lelang, kabsat a babai, ikit, ken gayyem.
“Ti gundawaytayo kas annak a babbai ti Dios nga agtungtungpal iti katulagan ket saan laeng a pannakasursuro manipud kadagiti bukodtayo a pannubok; daytoy ti mamagkaykaysa iti panagrikna ken panangngaasi bayat ti panangtulongtayo iti dadduma pay a miembro ti pamilia ti Dios kadagiti panagkarigatanda.”3
Dagiti Mainayon a Nasantuan a Kasuratan ken Impormasion
Juan 17:20–23; Taga-Efeso 4:15; Mosiah 18:21–22; 4 Nephi 1:15
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17 Pannakaanamongna a maipatarus: 6/17. Pannakaipatarus ti Visiting Teaching Message, September 2017. Ilokano. 97929 864