Parau poro’i a te Peresidenira’a Mātāmua, Tetepa 2017
E mau peropheta nō te arata’i ia tātou
Nā te peresideni Thomas S. Monson
Tau matahiti i ma’iri a’enei, tē pārahi ra vau i roto i te piha nō te hiero i Roto Miti i reira te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo e ’āmui ai hō’ē taime i te hepetoma. Tē hi’o ra vau i te papa’i i mua i te Peresidenira’a Mātāmua ’e i reira ’ua hi’o atu vau i te mau hōho’a o te mau peresideni o te ’Ēkālesia.
’A hi’o noa ai au ia rātou, ’o rātou tei nā mua mai iā’u—mai te peropheta Iosepha Semita (1805–44) ē tae mai i te peresideni Gordon B. Hinckley (1910–2008)—’ua feruri au, « ’auē tō’u māuruuru rahi i tā rātou arata’ira’a tāta’itahi ».
E mau ta’ata rahi teie tei ’ore i tūtāperepere, tei ’ore i fati ’e tei ’ore i manuia ’ore. E mau ta’ata teie nā te Atua. ’A feruri ai au i te mau peropheta nō teie anotau, tā’u i mātau ’e i here, tē ha’amana’o nei au i tō rātou orara’a, tō rātou huru ’e tā rātou mau ha’api’ira’a fa’auruhia.
’O te peresideni Heber J. Grant (1856–1945) te peresideni o te ’Ēkālesia, i tō’u fānaura’ahia. ’A feruri noa ai au i tōna orara’a ’e tāna mau ha’api’ira’a, tē ti’aturi nei au te hō’ē o te huru tei fa’ahōho’a i te peresideni Grant ’o te onoono ïa—te onoono i roto i te mau mea maita’i ’e te tura.
’O te peresideni George Albert Smith (1870–1951) te peresideni o te ’Ēkālesia i te taime ’a tāvini ai au ’ei episekōpo nō ta’u pāroita i Roto Miti. ’Ua hi’o ’oia ē tē vai ra te hō’ē ’arora’a ’ū’ana i rotopū i te Fatu ’e te enemi. ’Ua ha’api’i ’oia : « Mai te mea ē, e fa’aea noa ’outou i te pae o te Fatu e vai noa ïa ’outou i raro a’e i tāna fa’aurura’a ’e ’aita ïa te hina’aro i roto ia ’outou ’ia rave i te ’ino ».1
’Ua pi’ihia vau ’ia tāvini ’ei melo nō te pupu nō te Tino ’Ahuru Ma Piti i te matahiti 1963 e te peresideni David O. McKay (1873–1970). ’Ua ha’api’i ’oia i te here ia vetahi ’ē nā roto i te huru tāna i ora i tōna orara’a. ’Ua parau ’oia : « te ti’ara’a kerisetiano mau ’o te here ïa nā roto i te ’ohipa ».2
Nō te peresideni Joseph Fielding Smith (1876–1972), te hō’ē o te mau ta’ata pāpa’i puna o te ’Ēkālesia, e parau tumu arata’i i roto i tōna orara’a te ’ite ’aivana’a o te ’evanelia. ’Ua tai’o ’oia ma te fa’aea ’ore i te mau pāpa’ira’a mo’a ’e ’ua mātau maita’i i te mau ha’api’ira’a ’e te mau parau ha’api’ira’a e ’itehia i roto i terā mau ’api, ’aita a’enei au i ’ite i te hō’ē ta’ata mai iāna.
’Ua tāvini te peresideni Harold B. Lee (1899–1973) ’ei peresideni titi nō’u, e tamaiti iti ā vau. Hō’ē o tāna fa’ahitira’a au roa ’oia ho’i : « ’A ti’a na ’outou i roto i te mau vāhi mo’a ra, ’e ’eiaha ’ia fa’anu’u-’ē-hia atu ».3 ’Ua fa’aitoito ’oia i te feiā mo’a ’ia faatano i ni’a i te mau muhumuhu a te Vārua Maita’i ’e ’ia pāhono i te reira.
Tē ti’aturi nei au ē, te hō’ē ture arata’i i roto i te orara’a o te peresideni Spencer W. Kimball (1895–1985) ’o te pūpūra’a ïa iāna iho. ’Ua pūpū roa ’oia iāna ’iho i te Fatu ma te ’aifāto ’ore. ’Ua pūpū ato’a ’oia iāna ’ia ora i te ’evanelia.
I te rirora’a te peresideni Ezra Taft Benson (1899–1994) ’ei peresideni nō te ’Ēkālesia, ’ua pi’i ’oia iā’u ’ia tāvini ’ei tauturu piti nōna i roto i te Peresidenira’a Mātāmua. ’O te here tāna ture arata’i, tei roto ïa i tāna fa’ahitira’a au roa a’e, tei parauhia e te Fa’aora : « Nō reira, e aha tō ’outou huru e au ai ? ’Āmene, e parau atu vau ia ’outou, mai tō’u nei ïa ».4
Te peresideni Howard W. Hunter (1907–95) ’o te hō’ē ïa tei ’imi tāmau noa i te mea maita’i a’e i roto i te ta’ata. Tāmau noa ’oia ’ia riro ’ei ta’ata peu maita’i ; tāmau noa ’oia ’ia riro ’ei ta’ata ha’eha’a. ’Ua fāna’o vau i te tāvinira’a ’ei tauturu piti nōna.
’Ua ha’api’i mai te peresideni Gordon B. Hinckley ia tātou ’ia rave ma tō tātou maita’i roa a’e. ’Ua fa’a’ite pāpū ’oia ma te mana rahi nō te Fa’aora ’e tāna misiōni. ’Ua ha’api’i mai ’oia ia tātou ma te here. Te tāvinira’a ’ei tauturu hō’ē nōna ’ua riro ’ia ’ei hanahana ’e ’ei hō’ē ha’amaita’ira’a nō’u.
’Ua tono mai te Fa’aora i te mau peropheta nō te mea ’ua here ’oia ia tātou. I roto i te ’āmuira’a rahi i teie ’āva’e ’ātopa nei, e fāna’o faahou te mau hui mana fa’atere rahi o te ’Ēkālesia i te hōro’a atu i tāna mau parau. E rave mātou i teie hōpoi’a ma te tura rahi ’e te ha’eha’a.
’Auē ïa tātou i te ha’amaita’ihia ē ’ua fa’aho’i-fa’ahou-hia mai te ’Ēkālesia a Iesu Mesia i ni’a i te fenua nei ’e ’ua niuhia te ’Ēkalesia i ni’a i te papa o te heheura’a. Te heheura’a tāmau ’o te toto ora ïa nō te ’evanelia a Iesu Mesia.
’Ia fa’aineine tātou nō te fāri’i i te heheura’a nō tātou iho nei, e tae mai ma te hivahiva i roto i te ’āmuira’a rahi. ’Ia ’ī tō tātou ’ā’au ma te hia’ai hōhonu ’a ’āfa’i ai tātou i tō tātou rima nō te pāturu i te mau peropheta ora ’e te mau ’āpōsetolo. ’Ia ha’amāramaramahia, ’ia fa’ati’ahia, ’ia tāmāhanahanahia ’e ’ia ha’apuāihia tātou ’a fa’aro’o ai tātou i tā rātou mau parau poro’i. ’E ’ia ineine tātou i te fafau fa’ahou ia tātou i te Fatu ia Iesu Mesia—i tāna ’evanelia ’e tāna ’ohipa—’e i te oraraa ma te tītaura’a ’āpī ’ia ha’apa’o i tāna mau fa’auera’a ’e ’ia fa’aoti i tōna hina’aro.
© 2017 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. Īritira’a nō First Presidency Message, September 2017. Tahitian. 97929 895