Parau poro’i nā te mau tuahine hāhaere, Tetepa 2017
Hō’ē ā ’ā’au
’A tuatāpapa nā roto i te pure i teie mātēria ma te ’imi ’ia ’ite e aha te fa’a’ite atu. Nāhea te ta’a-maita’i-ra’a i te fā o te Sōtaiete Tauturu e fa’aineine i te mau tamari’i tamāhine a te Atua nō te mau ha’amaita’ira’a o te ora mure ’ore ?
Fa’aro’o ’Utuāfare Tōtauturu
« E ma’iri ihora te Fatu i te i’oa o tōna ra feiā ’o Ziona, nō te mea hō’ē ā tō rātou ’ā’au ’e hō’ē ā tō rātou mana’o, ’e ’ua pārahi ho’i rātou ma te parau ti’a ; ’e ’aore e ta’ata veve i rotopū ia rātou » (Mose 7:18). Nāhea tātou ’ia riro ’ei hō’ē ?
’Ua parau Elder M. Russell Ballard nō te pupu nō te Tino ’Ahuru Ma Piti ’āpōsetolo : « Nā roto i te reo peretāne, te ta’o tumu i roto i te parau atonement [tāra’ehara] ’o te parau one [hō’ē] ïa. Mai te mea ē, e māramarama te ta’ata ato’a i te reira, e ’ore roa ïa e ’ite-fa’ahou-hia te hō’ē ta’ata ’aita tātou e ha’apa’o iāna, noa atu te huru o te matahiti, te taura ta’ata, te ’āpenira’a, te ha’apa’ora’a fa’aro’o ’e ’aore tōna huru orara’a sōtiare ’e te orara’a i te pae faufa’a. I reira tātou e rohi ai ’ia riro mai te Fa’aora te huru, ’e e ’ore roa ïa tātou e fa’atupu ’ino fa’ahou, e tāu’a ’ore fa’ahou i te tahi, e fa’atura ’ore fa’ahou ’e ’aore rā e aroha ’ore fa’ahou ’ia vetahi ’ē ».1
’Ua ha’api’i mai te peresideni Henry B. Eyring, tauturu hō’ē i roto i te Peresidenira’a Mātāmua : « I te vāhi e pārahi te Vārua i rotopū i te taata, e nehenehe [ia rātou] e tīa’i i te au maita’i… ’Aore roa te Vārua o te Atua e fa’atupu i te mārōra’a (hi’o 3 Nephi 11:29)… E arata’i te reira i te hau o te ta’ata hō’ē ’e i te hō’ē mana’o hō’ēra’a ’e vetahi ’ē ».2
Nō ni’a i te mau tāmatara’a o te ’utuāfare, ’ua fa’ahiti ’o Carole M. Stephens, tei tāvini ’ei tauturu hō’ē i roto i te Peresidenira’a Rahi o te Sōtaiete Tauturu : « ’Aita vau i fārerei a’enei i te fa’ata’a-’ē-ra’a te tāne ’e te vahine, te māuiui ’e te pāpū ’ore e tupu mai i roto i te ha’apa’o-’ore-ra’a-hia, ’e ’aore rā, te hōpoi’a nō te rirora’a ’ei metua vahine ’ōtahi. ’Aita vau i fārerei a’enei i te fifi o te pohera’a o te hō’ē tamari’i, te ’orera’a e fānau, ’e ’aore rā, te herera’a te vahine ’e te vahine. ’Aita vau i fārerei i te hāmani-’ino-ra’a ’e ’aore rā, te ma’i tāmau ’e ’aore rā, te rirora’a ’ei tītī nō te hō’ē mea. ’Aita teie mau mea i riro ’ei ha’avīra’a nō’u.
« … Terā rā nā roto i tō’u iho mau tāmatara’a ’e te mau fa’ahemara’a… ’Ua ti’a iā’u ’ia ’ite maita’i i Te ta’ata tei ’ite… Hau atu i te reira, ’ua fa’aruru vau i te mau tāmatara’a ato’a o te tāhuti nei tā’u i fa’ahiti atu nā i roto i te hi’ora’a a te hō’ē tamāhine, metua vahine, mama rū’au, e tuahine, e tatie, ’e e hoa.
« Tātou te mau tamāhine ha’apa’o i te fafaura’a a te Atua, ’e ’ere tā tātou rāve’a i te ha’api’i-noa-ra’a nā roto noa i tō tātou iho mau tītauraa ; nā roto rā i te tāhō’ēra’a i roto i te here ’e te aroha ’a pāturu ai tātou i te tahi atu mau melo o te ’utuāfare o te Atua i roto i tā rātou mau tauto’ora’a ».3
Te tahi atu mau pāpa’ira’a mo’a ’e mau ha’amāramaramara’a
© 2017 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō Visiting Teaching Message, September 2017.Tahitian. 97929 895