Mensahe ti Umuna a Panguluen, Oktubre 2017
Panagbalin a Pudno a Disipulo
Ni Presidente Henry B. Eyring
Umuna a Mammagbaga iti Umuna a Panguluen
Iti tunggal miting ti sakramento, adda pribilehiotayo a mangikari iti Nailangitan nga Ama a kanayonto a laglagipentayo ti Mangisalakan ken agtungpal kadagiti katulaganna tapno adda kadatayo ti Espirituna a mangkadua kadatayo (kitaen iti Moroni 4:3; 5:2; DkK 20:77, 79). Gagangay a manglaglagiptayo Kenkuana no awatentayo ti naganna kadatayo. Aramidentayo daytoy iti adu a wagas nangnangruna no agserbitayo iti dadduma iti naganna, basaentayo dagiti nasantuan a balikasna, ken agkararagtayo tapno ammuen no ania ti ipaaramidna kadatayo.
Napasamak daytoy kaniak idi inaramidko ti panagbuniag ti maysa nga agtutubo a lalaki. Ammok nga inawagannak dagiti naordenan a katulongan ti Mangisalakan kas maysa a misionario a mangisuro iti ebanghelio ken mangipaneknek Kenkuana ken ti pudno a Simbaanna. Inkarimi iti kaduak a misionario iti agtutubo a lalaki nga isu ket madalusanto babaen ti bileg ti Pannubbot ni Jesucristo no agbabawi isuna nga addaan pammati iti Mangisalakan ken agpabuniag iti maysa kadagiti napusgan a katulonganna.
Idi inlung-awko ti agtutubo a lalaki iti danum ti puente a pagbuniagan, inyarasaasna kaniak, “Nadalusakon, nadalusakon.” Iti dayta a kanito, nalagipko idi binuniagan ni Juan Bautista Mangisalakan iti Karayan Jordan. Maysa pay, nalagipko nga ar-aramidek ti pangisalakan nga aramid ti nagungar ken sibibiag a Mangisalakan—nga inmatangan ti Espiritu Santo, kas iti inaramid idi ni Juan.
Para kaniak ken para iti tunggal maysa kadatayo, ti pananglaglagip iti Mangisalakan ket ad-adda pay ngem iti panangpannuray iti lagip ti pannakaammo ken padastayo Kenkuana. Makaaramidtayo kadagiti pili iti inaldaw a mangyasideg kadatayo nga ad-adda Kenkuana iti agdama.
Mabalin a panagbasa kadagiti nasantuan a kasuratan ti kasimplean a pili. Babaen ti panangaramid iti kastoy, mariknatayo nga asidegtayo Kenkuana. Para kaniak, mariknak unay ti kinaasideg no agbasaak iti Libro ni Mormon. Kadagiti umuna a minuto nga agbasaak kadagiti kapitulo ti 2 Nephi, mangngegko iti panunotko dagiit timek da Nephi ken Lehi a mangiladladawan iti Mangisalakan a kasla personal nga am-ammoda Isuna. Sumangbay ti rikna ti kinaasideg.
Para kadakayo, adda dagiti dadduma a lugar iti nasantuan a kasuratan ti mangyasideg kadakayo Kenkuana. Ngem sadino man ken kaanuman no basaenyo ti balikas ti Dios, nga addaan napakumbaba ken pudno a panggep a manglaglagip iti Mangisalakan, mapadakkelyonto ti tarigagayyo nga umawat iti naganna kadakayo iti inaldaw a panagbiagyo.
Dayta a tarigagay ti mangbalbaliwto iti wagas a panagserbiyo iti Simbaan ti Apo. Agkararagkayonto iti Nailangitan nga Ama para iti tulong a mangikarigatan nga aramiden iti awagyo uray no ipagarupyo a bassit daytoy. Ti tulong a dawatenyonto ket ti kabaelan a manglipat iti bagiyo ket mangipokus nga ad-adda pay no ania ti kayat ti Mangisalakan para kadagiti tao a nakaawaganyo a pagserbian.
Nariknak ti imana ken ti kinaasidegna iti panagserbik kadagiti annakko idi nagkararagak tapno ammuen no kasano a matulongak ida a makasarak iti talna a ti laeng ebanghelio ti mangisangbay. Kadagiti kasta a kanito, awan pategna kaniak no makitaak a maysa a naballigian a nagannak, ngem napateg unay kaniak ti balligi ken pagimbagan dagiti annakko.
Ti tarigagay a ited kadagiti pagserbiantayo nga ited ti Mangisalakan kadakuada ket mangiturong kadagiti kararag a mayar-araraw iti Nailangitan nga Ama, a sipupudno iti nagan ni Jesucristo. No agkararagtayo iti kasta a wagas—iti nagan ti Mangisalakan, nga addaan pammati Kenkuana—sumungbat ti Ama. Ibaonna ti Espiritu Santo a mangtarabay, mangliwliwa, ken mangparegta kadatayo. Gapu ta kanayon nga agpaneknek ti Espiritu maipapan ti Mangisalakan (kitaen iti 3 Nephi 11:32, 36; 28:11; Ether 12:41), dumakkel ti kabaelantayo nga agayat iti Apo iti amin a puso, panunot, ken pigsatayo (kitaen iti Marcos 12:30; Lucas 10:27; DkK 59:5).
Dagiti bendision ti inaldaw a pananglaglagip ket sumangbay nga in-inut ken agtultuloy bayat ti panagserbitayo Kenkuana, panagbussog iti balikasna, ken panagkararag a sipapammati iti naganna. Ket daytoy a pananglaglagip ti mangubogto kadatayo nga agbalin a napupudno a disipulo ni Apo Jesucristo iti pagarianna ditoy daga—ken iti kamaudianan iti Amana iti nagloriaan a lubong nga umay.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17 Pannakaanamongna a maipatarus: 6/17. Pannakaipatarus ti First Presidency Message, October 2017. Ilokano. 97930 864