Mensahe iti Visiting Teaching, Oktubre 2017
Palikmutan iti Ayat dagiti Kimmayakay
Nainkararagan nga adalenyo daytoy a material ken kalikagumanyo ti inspirasion tapno ammuen no ania ti ibinglayyo. Kasano a ti pannakaawattayo iti panggep ti Relief Society ket mangisagananto kadagiti annak a babbai ti Dios para kadagiti bendision ti agnanayon a biag?
Pammati Pamilia Tulong
“Kinapudnona awan dagiti perpekto a pamilia … ,” kinuna ni Presidente Dieter F. Uchtdorf, Maikadua a Mammagbaga iti Umuna a Panguluen. “Ania man dagiti problema a sangsanguen ti pamiliayo, ania man ti nasken nga aramidenyo a pangrisut kadagitoy, ti rugi ken gibus ti solusion ket panangngaasi, ti natarnaw nga ayat ni Cristo.”1
Kadagiti saan a naan-anay a makiramraman iti ebanghelio, kinuna ni Linda K. Burton, sigud a Sapasap a Presidente ti Relief Society: “Ay-ayaten ti Nailangitan nga Ama ti amin nga annakna. … Sadino man ti ayanda—addada man wenno awanda iti dalan—kayatna ida nga agawid iti pagtaengan.”2
“Nupay nayaw-awan [dagiti annakyo], … no kasao wenno kasaritayo ida, kasao ida a saan a sipupungtot , saan a makapasakit , iti mangkonkondena nga espiritu,” kinuna ni Presidente Joseph F. Smith (1838–1918). “Kasaritayo ida a siaasi.”3
Ipalagip manen ni Ni Elder Brent H. Nielson ti Pitupulo ti insuro ti Mangisalakan kadagiti addaan iti 10 a piraso apirak ket napukaw ti maysa: “Sapulen agingga a masarakan daytoy. No anakyo ken kabsatyo ti maysa a napukaw, … ti kangrunaan nga aramidentayo, ayatentayo dayta a tao iti amin a pusotayo. …
“Maawattayo koma ti paltiing a mangammo no kasano ti kasayaatan a wagas nga aramidentayo kadagiti ipatpategtayo iti biag a napukawen ken, no kasapulan, maaddaantayo iti anus ken ayat ti Amatayo iti Langit ken ti Anakna, ni Jesucristo, no ayaten, bantayan, ken urayentayo ti napukaw.”4
Kinuna ni Presidente Henry B. Eyring, Umuna a Mammagbaga iti Umuna a Panguluen: “nagkararagak a sipapammati a kalikaguman ken marikna koma ti maysa nga ipatpategko ti bileg ti Pannubbot. Nagkararagak a sipapammati nga umay dagiti anghel a tao a sumaranay kadakuada, ket immayda.
“Nagplano ti Dios kadagiti wagas tapno maisalakan ti tunggal maysa kadagiti annakna.”5
Dagiti Mainayon a Nasantuan a Kasuratan ken Impormasion
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Visiting Teaching Message, October 2017. Ilokano. 97930 864