Klumech er a First Presidency, Ongeteruich el Buil 2017
Mo Meral Oltirakl
Mla er a President Henry B. Eyring
Kot el Counselor er a First Presidency
Chelsel a bek el miting er a sacrament, e ngarngii a techelled el yaksok el mo er a Chedam er a Babeluades el kmo kede mo blechoel melbedebek er a Osobel e oltirakl a Llechul me luchul e a Chedaol Reng er Ngii bo lobengked (mesa Moroni 4:3; 5:2; D&C 20:77, 79). Ng sebeched el mo melbedebek er Ngii sel sekum e kede mo oba Ngklel. Tia sebeched el kudmeklii er a chelsel a betok el teletael e ng di oumesingd sel dosiou er a rebebil el ngara Ngklel, e donguiu chedaol Tekingel, e doluluuch el mo medengei el kmo ngera Soal a doruul.
Ng dilubech el mei er ngak er a kungedmokl er a techolbechelid el mo er a ta er a ngeasek el chad. Ak mle medengei el kmo ak mla mokedong er a mesiungel a Osobel el mo misionari el olisechakl er a ebangkelio er Ngii e ouchais el Kirel me a klemerang el kirel a Ikelesia er Ngii. A dirrek el mle misionari e kldemek me a ngak a mle yaksok er ngika el ngeasek el chad el kmo a lenguu a techolbechlid e ng mo beches a klisichel a Tngkaireng er a Jesus Kristo alsekum e ng mo ouchel a rengul e oba klaumerang er a Osobel e mo metecholb lokiu a mla moterekokl el Mesiungel.
Sera kukisii ngika el ngeasek el chad el me duum er a chelsel tial blil a techolbechelid, e ng milngelulau er a dingak el kmo, “Ak beches el chad, ak beches el chad.” Tiaikid el taem, e ak mlo dobedebekii a techolbechelid er a Osobel lulngedmokl er ngii a Johanes el Techolb er a Omeuachel er a Jordan. Osisiu, e ak mlo medengei el kmo ak miruul er a urerel a mla mekiis er a kodall e ngar el Osobel—el Chedaol Reng a mle sioning er ngii, el uaia luruul er ngii a Johanes.
A denguu er ngak me a dersta er kid, e a omelbedebek el kirel Osobel a lmuut lengelakl er sel di klemedengei er kid el Kirel. Ng sebeched el melilt a teletael el ngii a ngoikid el mo kmeed er Ngii er chelechang.
A kot el beot el dolilt el mo meruul er ngii a omengiuel chedaol llechukl. Sel bo deuaisei, e ng sebeched el mo omelchesiu el kmeed er Ngii. A denguu er ngak, e a kumelchesiu el kmeed er Ngii sel kunguiu er a Babier er a Mormon. Aikel kot el tela el bung el kunguiu a bliongel er a 2 Nephi, e a ko er a di orrenges er a uldesuek a ngerel a Nephi me a Lehi el mesaod er a Osobel el kmal di ngii me a le ble lodengelii el chad. E ak mo melchesukak el kmeed er Ngii.
E a kuk denguu er kemiu, e a bebil er a bliongel er a chedaol llechukl a locha okedemiu el mo er Ngii. E ng di ngii di el basio me a ngii di el taem el monguiu a tekingel a Dios, loba ngariou el reng e meral ngarngii er a rengmiu a mo melbedebek er a Osobel, e ng mo chachisois a klemeriar reng er kemiu el mo oba Ngklel er a bek el sils.
Tiaikid el klemeriar reng a mo ngodechii a teleteliu sel mosiou er a chelsel a Ikelesia er a Rubak. Ko mo ngara nglunguuch el mo er a Chedam er a Babeluades me ng mo ngosukemiu er a aikel momdasou e ng mekekerei el ngerachel. A ngesou el bo molengit a klisiich el mo diak di molatk el kirem e bai mo mui el melatk el kirel sel ngii a soal Osobel el kirir tirkel kau a mla mokedong el mo mesiou er tir.
Ak mla melchesuar Chimal me a Ngii el kmeed er ngak sel kusiou er a rengelekam lokiu a nglunguuch el mo medengei el kmo ak mekerang a ngosuterir el mo metik er a budech el di tal ebangkelio sebechel mesterir. Tiaikid el taem, e ng mlo diak sal omdasou el kirel a mo chemolt el ungil oungalek, e bai mlo mui lomekerreu el kirel a ungil klechad me a ulekerulir a rengelekek.
Sel blak el reng lolngeseu er tirkel dosiou er tir al uaia omesiungel Osobel el mo er tir a mekrolid el mo ngara nglunguuch lolengit el mo er a Chedam er a Babeluades, el meral ngara ngklel a Jesus Kristo. Sel bo de ngara nglunguuch el uaisei—el ngara ngklel Osobel, loba klaumerang er Ngii—e a Chedam a mo onger. Ng mo odureklii Chedaol Reng el mo omekrael, mengelaod, e melisiich er kid. Le Chedaol Reng el di blechoel sioning el kirel Osobel a uchul (mesa 3 Nephi 11:32, 36; 28:11; Ether 12:41), e a klisiched el mo oubeltik el reng el mo er a Rubak loba mui el rengud, uldesued, me a klisiched a mo chachisois (mesa Markus 12:30; Lukas 10:27; D&C 59:5).
A klengeltengat el kirel omelbedebek er a bek el sils a mekekokil mei e mesisiich sel dosiou er Ngii, e dosuub a Tekingel, e doluluuch loba klaumerang el ngara Ngklel. E tiaikid el teletael er a omelbedebek a mo sumecheklid el mo meral oltirakl er a Rubak el Jesus Kristo er a chelsel a rengedel er a beluulechad—me sel klebokel el klengar ruriul lobengkel a Demal.
© 2017 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/17. Kengei er a oidel: 6/17. Oidel a First Presidency Message, October 2017. Palauan. 97930 881