ຂ່າວສານການຢ້ຽມສອນ, ເດືອນຕຸລາ 2017

ໂອບກອດຄົນທີ່ຫລົງທາງໄປດ້ວຍຄວາມຮັກ

ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາການດົນໃຈເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈຈຸດປະສົງຂອງສະມາຄົມສະຕີສົງເຄາະ ຕຽມທິດາຂອງພຣະເຈົ້າ ສຳລັບພອນແຫ່ງຊີວິດນິລັນດອນແນວໃດ?

“ຕາມຄວາມເປັນຈິງແລ້ວ ບໍ່ມີຄອບຄົວໃດທີ່ສົມບູນແບບທຸກຢ່າງ … ,” ປະທານດີເດີ ແອັຟ ອຸກດອບ, ທີ່ປຶກສາທີສອງໃນຝ່າຍປະທານສູງສຸດ ໄດ້ກ່າວ. “ບໍ່ວ່າບັນຫາໃນຄອບຄົວຂອງທ່ານຈະເປັນແນວໃດກໍຕາມ, ບໍ່ວ່າທ່ານຈະຕ້ອງເຮັດສິ່ງໃດກໍຕາມ ເພື່ອແກ້ບັນຫາ, ບັ້ນຕົ້ນ ແລະ ບັ້ນປາຍຂອງການແກ້ບັນຫາແມ່ນ ຄວາມໃຈບຸນ, ແມ່ນຄວາມຮັກອັນບໍລິສຸດຂອງພຣະຄຣິດ.”¹

ກ່ຽວກັບຜູ້ທີ່ບໍ່ມີສ່ວນຮ່ວມຢ່າງເຕັມສ່ວນໃນພຣະກິດຕິຄຸນ, ລິນດາ ເຄ ເບີຕັນ, ອະດີດປະທານສະມາຄົມສະຕີສົງເຄາະສາມັນ, ໄດ້ກ່າວວ່າ: “ພຣະບິດາເທິງສະຫວັນຮັກລູກໆຂອງພຣະອົງທຸກຄົນ. … ບໍ່ວ່າເຂົາເຈົ້າຈະຢູ່ບ່ອນໃດກໍຕາມ—ຢູ່ໃນ ຫລື ນອກເສັ້ນທາງ—ພຣະອົງປະສົງໃຫ້ເຂົາເຈົ້າກັບຄືນບ້ານ.”²

“ເຖິງແມ່ນ [ລູກໆຂອງທ່ານ] ຈະດື້ດັນຫລາຍຂະໜາດໃດກໍຕາມ, … ເມື່ອທ່ານກ່າວ ຫລື ເວົ້າລົມກັບເຂົາເຈົ້າ, ຢ່າເຮັດດ້ວຍຄວາມໂມໂຫ, ຢ່າກ່າວຫຍາບຄາຍ, ໃນແບບທີ່ກ່າວປະນາມ,” ປະທານໂຈເຊັບ ແອັຟ ສະມິດ ໄດ້ສອນ (1838–1918). “ໃຫ້ກ່າວກັບເຂົາແບບດີໆ.”³

ແອວເດີ ບະເຣນ ເອັຈ ນຽວສັນ ແຫ່ງສາວົກເຈັດສິບ ໄດ້ກ່າວເນັ້ນຄຳແນະນຳຂອງພຣະຜູ້ຊ່ວຍໃຫ້ລອດ ສຳລັບຜູ້ທີ່ມີເງິນ 10 ຫລຽນ ແລະ ສູນເສຍ ຫລຽນໜຶ່ງໄປວ່າ: “ໃຫ້ຊອກຫາຈົນກວ່າທ່ານຈະພົບມັນ. ເມື່ອຜູ້ສູນເສຍນັ້ນເປັນລູກຊາຍ ແລະ ລູກສາວຂອງທ່ານ, ອ້າຍເອື້ອຍນ້ອງຂອງທ່ານ, … ຫລັງຈາກພວກເຮົາເຮັດທຸກຢ່າງທີ່ເຮັດໄດ້, ພວກເຮົາຮັກຄົນນັ້ນດ້ວຍສຸດໃຈ. …

“ຂໍໃຫ້ທ່ານ ແລະ ຂ້າພະເຈົ້າໄດ້ຮັບການເປີດເຜີຍໃຫ້ຮູ້ວິທີການທີ່ດີທີ່ສຸດ ເພື່ອຈະໄດ້ເຂົ້າໃກ້ຜູ້ຄົນໃນຊີວິດຂອງເຮົາຜູ້ທີ່ເສຍໄປ ແລະ ໃນເວລາທີ່ຈໍາເປັນ, ໃຫ້ມີຄວາມອົດທົນ ແລະ ມີຄວາມຮັກຂອງພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ, ໃນຂະນະທີ່ເຮົາຮັກ, ເຝົ້າເບິ່ງ, ແລະ ລໍຖ້າຜູ້ທີ່ເສຍໄປ.”⁴

ປະທານເຮັນຣີ ບີ ໄອຣິງ, ທີ່ປຶກສາທີໜຶ່ງໃນຝ່າຍປະທານສູງສຸດ, ໄດ້ກ່າວວ່າ: “ຂ້າພະເຈົ້າໄດ້ອະທິຖານດ້ວຍສັດທາວ່າ ຄົນທີ່ຂ້າພະເຈົ້າຮັກຈະສະແຫວງຫາ ແລະ ຮູ້ສຶກເຖິງອຳນາດຂອງການຊົດໃຊ້. ຂ້າພະເຈົ້າໄດ້ອະທິຖານດ້ວຍສັດທາວ່າ ທູດສະຫວັນທີ່ເປັນມະນຸດ ຈະມາຊ່ວຍເຫລືອເຂົາເຈົ້າ, ແລະ ພວກເພິ່ນກໍໄດ້ມາແທ້.

“ພຣະເຈົ້າໄດ້ຈັດວິທີທາງທີ່ຈະຊ່ວຍເຮົາຜູ້ເປັນລູກໆຂອງພຣະອົງໃຫ້ລອດ.”⁵

ຂໍ້ພຣະຄຳພີ ແລະ ຂໍ້ມູນເພີ່ມເຕີມ

ມັດທາຍ 18:12; ແອວມາ 31:35; 3 ນີໄຟ 13:32; D&C 121:41–42

reliefsociety.lds.org

© 2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Visiting Teaching Message, October 2017. Laotian. 97930 331