ຂ່າວສານຈາກຝ່າຍປະທານສູງສຸດ, ເດືອນຕຸລາ 2017
ການກາຍເປັນສານຸສິດທີ່ແທ້ຈິງ
ໂດຍ ປະທານເຮັນຣີ ບີ ໄອຣິງ
ທີ່ປຶກສາທີໜຶ່ງໃນຝ່າຍປະທານສູງສຸດ
ໃນກອງປະຊຸມສິນລະລຶກທຸກຄັ້ງ, ເຮົາໄດ້ຮັບສິດທິພິເສດທີ່ຈະເຮັດຄຳໝັ້ນສັນຍາກັບພຣະບິດາເທິງສະຫວັນ ວ່າເຮົາຈະລະນຶກເຖິງພຣະຜູ້ຊ່ວຍໃຫ້ລອດຕະຫລອດເວລາ ແລະ ຮັກສາພຣະບັນຍັດຂອງພຣະອົງ ເພື່ອວ່າເຮົາຈະມີພຣະວິນຍານຂອງພຣະອົງຢູ່ກັບເຮົາ (ເບິ່ງ ໂມໂຣໄນ 4:3; 5:2; D&C 20:77, 79). ການລະນຶກເຖິງພຣະອົງ ຈະຍ່ອມເກີດກັບເຮົາສະເໝີ ເມື່ອເຮົາຮັບເອົາພຣະນາມຂອງພຣະອົງ. ເຮົາເຮັດເຊັ່ນນັ້ນໃນຫລາຍວິທີທາງ ໂດຍສະເພາະເມື່ອເຮົາຮັບໃຊ້ຄົນອື່ນ ໃນພຣະນາມຂອງພຣະອົງ, ອ່ານພຣະຄຳທີ່ສັກສິດຂອງພຣະອົງ, ແລະ ອະທິຖານ ເພື່ອຈະໄດ້ຮູ້ເຖິງສິ່ງທີ່ພຣະອົງມີໃຫ້ເຮົາເຮັດ.
ມັນໄດ້ເກີດຂຶ້ນກັບຂ້າພະເຈົ້າ ຕອນຂ້າພະເຈົ້າໄດ້ໃຫ້ບັບຕິສະມາແກ່ຊາຍໜຸ່ມຄົນໜຶ່ງ. ຂ້າພະເຈົ້າຮູ້ວ່າ ຂ້າພະເຈົ້າໄດ້ຖືກເອີ້ນໂດຍຜູ້ຮັບໃຊ້ທີ່ຖືກແຕ່ງຕັ້ງຂອງພຣະຜູ້ຊ່ວຍໃຫ້ລອດ ໃຫ້ເປັນຜູ້ສອນສາດສະໜາ ເພື່ອສອນພຣະກິດຕິຄຸນຂອງພຣະອົງ ແລະ ເພື່ອເປັນພະຍານເຖິງພຣະອົງ ແລະ ເຖິງສາດສະໜາຈັກທີ່ແທ້ຈິງຂອງພຣະອົງ. ຄູ່ສອນສາດສະໜາຂອງຂ້າພະເຈົ້າ ແລະ ຂ້າພະເຈົ້າ ໄດ້ສັນຍາກັບຊາຍໜຸ່ມຄົນນັ້ນວ່າ ລາວຈະສະອາດຜ່ານທາງອຳນາດຂອງການຊົດໃຊ້ຂອງພຣະເຢຊູຄຣິດ ເມື່ອລາວກັບໃຈ ດ້ວຍສັດທາໃນພຣະຜູ້ຊ່ວຍໃຫ້ລອດ ແລະ ຮັບບັບຕິສະມາໂດຍຜູ້ຮັບໃຊ້ທີ່ໄດ້ຮັບມອບໝາຍຂອງພຣະອົງ.
ເມື່ອຂ້າພະເຈົ້າໄດ້ຍົກຊາຍໜຸ່ມຄົນນັ້ນຂຶ້ນມາຈາກນ້ຳ ໃນອ່າງບັບຕິສະມາແລ້ວ, ລາວໄດ້ຊື່ມໃສ່ຫູຂ້າພະເຈົ້າວ່າ, “ຂ້ອຍສະອາດແລ້ວ, ຂ້ອຍສະອາດແລ້ວ.” ໃນເວລານັ້ນເອງ, ຂ້າພະເຈົ້າໄດ້ນຶກເຖິງຕອນທີ່ພຣະຜູ້ຊ່ວຍໃຫ້ລອດ ໄດ້ຮັບບັບຕິສະມາ ໂດຍໂຢຮັນບັບຕິສະໂຕ ຢູ່ໃນແມ່ນ້ຳຈໍແດນ. ຍິ່ງໄປກວ່ານັ້ນ, ຂ້າພະເຈົ້າຈື່ໄດ້ວ່າ ຂ້າພະເຈົ້າກຳລັງເຮັດວຽກງານແຫ່ງການຊ່ວຍໃຫ້ລອດ ຂອງພຣະຜູ້ຊ່ວຍໃຫ້ລອດທີ່ໄດ້ຟື້ນຄືນພຣະຊົນແລ້ວ ແລະ ຊົງພຣະຊົນຢູ່—ມີພຣະວິນຍານບໍລິສຸດສະຖິດຢູ່ນຳ, ດັ່ງທີ່ເກີດກັບໂຢຮັນ.
ສຳລັບຂ້າພະເຈົ້າ ແລະ ສຳລັບເຮົາແຕ່ລະຄົນ, ການລະນຶກເຖິງພຣະຜູ້ຊ່ວຍໃຫ້ລອດ ແມ່ນມີຄວາມໝາຍຫລາຍກວ່າການເພິ່ງອາໄສຄວາມຊົງຈຳຂອງຄວາມຮູ້ ແລະ ປະສົບການນຳພຣະອົງ. ເຮົາສາມາດເລືອກເຮັດທຸກມື້ ໃນສິ່ງທີ່ຈະດຶງດູດເຮົາໃຫ້ເຂົ້າໃກ້ຊິດກັບພຣະອົງ ໃນປະຈຸບັນ.
ການເລືອກທີ່ງ່າຍທີ່ສຸດ ອາດເປັນການອ່ານພຣະຄຳພີ. ໂດຍການເຮັດສິ່ງນີ້, ເຮົາສາມາດໄດ້ຮັບຄວາມຮູ້ສຶກວ່າເຮົາຢູ່ໃກ້ພຣະອົງ. ສຳລັບຂ້າພະເຈົ້າແລ້ວ, ການຢູ່ໃກ້ໄດ້ເກີດຂຶ້ນເລື້ອຍໆ ຕອນຂ້າພະເຈົ້າອ່ານພຣະຄຳພີມໍມອນ. ນາທີທຳອິດທີ່ຂ້າພະເຈົ້າໄດ້ອ່ານຫລາຍບົດ ຂອງ 2 ນີໄຟ, ຂ້າພະເຈົ້າໄດ້ຍິນສຽງຂອງນີໄຟ ແລະ ລີໄຮ ຢູ່ໃນຈິດໃຈຂອງຂ້າພະເຈົ້າ ທີ່ບັນຍາຍເຖິງພຣະຜູ້ຊ່ວຍໃຫ້ລອດ ຄືກັນກັບວ່າພວກເພິ່ນຮູ້ຈັກພຣະອົງເປັນສ່ວນຕົວ. ຄວາມຮູ້ສຶກເຖິງການໃກ້ຊິດກໍເກີດຂຶ້ນ.
ສຳລັບທ່ານ, ບ່ອນໃດບ່ອນໜຶ່ງໂດຍສະເພາະຢູ່ໃນພຣະຄຳພີ ອາດດຶງດູດທ່ານໃຫ້ເຂົ້າໃກ້ຊິດກັບພຣະອົງໄດ້. ແຕ່ບໍ່ວ່າບ່ອນໃດ ແລະ ເມື່ອໃດກໍຕາມ ທີ່ທ່ານອ່ານພຣະຄຳຂອງພຣະເຈົ້າ, ດ້ວຍຄວາມຖ່ອມຕົວ ແລະ ດ້ວຍຄວາມຕັ້ງໃຈອັນແທ້ຈິງ ທີ່ຈະລະນຶກເຖິງພຣະຜູ້ຊ່ວຍໃຫ້ລອດ, ແລ້ວທ່ານຈະມີຄວາມປາດຖະໜາຫລາຍຂຶ້ນ ທີ່ຈະຮັບເອົາພຣະນາມຂອງພຣະອົງ ໄວ້ໃນຊີວິດປະຈຳວັນຂອງທ່ານ.
ຄວາມປາດຖະໜານັ້ນ ຈະປ່ຽນວິທີທີ່ທ່ານຮັບໃຊ້ຢູ່ໃນສາດສະໜາຈັກຂອງພຣະຜູ້ເປັນເຈົ້າ. ທ່ານຈະອະທິຖານຫາພຣະບິດາເທິງສະຫວັນ ເພື່ອຊ່ວຍຂະຫຍາຍການເອີ້ນຂອງທ່ານ ແມ່ນແຕ່ການເອີ້ນທີ່ປະກົດວ່າ ເປັນການເອີ້ນທີ່ເລັກນ້ອຍສຳລັບທ່ານກໍຕາມ. ຄວາມຊ່ວຍເຫລືອທີ່ທ່ານຈະທູນຂໍ ຄືຄວາມສາມາດທີ່ຈະບໍ່ຄິດກ່ຽວກັບຕົວເອງ ແຕ່ຈະເອົາໃຈໃສ່ກັບສິ່ງທີ່ພຣະຜູ້ຊ່ວຍໃຫ້ລອດປະສົງຫລາຍກວ່າ ສຳລັບຜູ້ທີ່ທ່ານຖືກເອີ້ນໃຫ້ຮັບໃຊ້.
ຂ້າພະເຈົ້າໄດ້ຮູ້ສຶກເຖິງພຣະຫັດ ແລະ ການສະຖິດຢູ່ໃກ້ຂອງພຣະອົງ ຕອນຂ້າພະເຈົ້າຮັບໃຊ້ລູກໆຂອງຂ້າພະເຈົ້າ ຕອນຂ້າພະເຈົ້າໄດ້ອະທິຖານເພື່ອຈະໄດ້ຮູ້ຈັກວິທີທີ່ຈະຊ່ວຍເຫລືອເຂົາເຈົ້າ ໃຫ້ພົບສັນຕິສຸກ ຊຶ່ງພຽງແຕ່ພຣະກິດຕິຄຸນເທົ່ານັ້ນ ທີ່ສາມາດນຳມາໃຫ້. ໃນເວລາເຊັ່ນນັ້ນ, ຂ້າພະເຈົ້າບໍ່ສົນໃຈເລື່ອງການເປັນພໍ່ທີ່ປະສົບຄວາມສຳເລັດຜົນ, ແຕ່ຂ້າພະເຈົ້າສົນໃຈຫລາຍທີ່ສຸດ ກ່ຽວກັບຄວາມສຳເລັດຜົນ ແລະ ສະຫວັດດີພາບຂອງລູກໆຂອງຂ້າພະເຈົ້າ.
ຄວາມປາດຖະໜາທີ່ຈະມອບສິ່ງທີ່ພຣະຜູ້ຊ່ວຍໃຫ້ລອດຢາກມອບໃຫ້ຜູ້ຄົນທີ່ເຮົາຮັບໃຊ້ ຈະນຳເຮົາໄປສູ່ການອະທິຖານ ທີ່ເປັນແບບ ການອ້ອນວອນ ຕໍ່ພຣະບິດາເທິງສະຫວັນ, ແທ້ໆໃນພຣະນາມຂອງພຣະເຢຊູຄຣິດ. ເມື່ອເຮົາອະທິຖານໃນແບບນັ້ນ—ໃນພຣະນາມຂອງພຣະຜູ້ຊ່ວຍໃຫ້ລອດ, ດ້ວຍສັດທາໃນພຣະອົງ—ແລ້ວ ພຣະບິດາຈະຕອບ. ພຣະອົງສົ່ງພຣະວິນຍານບໍລິສຸດມາ ເພື່ອນຳພາ, ປອບໂຍນ, ແລະ ໃຫ້ກຳລັງໃຈເຮົາ. ເພາະພຣະວິນຍານຈະເປັນພະຍານສະເໝີເຖິງພຣະຜູ້ຊ່ວຍໃຫ້ລອດ (ເບິ່ງ 3 ນີໄຟ 11:32, 36; 28:11; ອີເທີ 12:41), ຄວາມສາມາດຂອງເຮົາທີ່ຈະຮັກພຣະຜູ້ເປັນເຈົ້າ ດ້ວຍສຸດໃຈ, ສຸດຄວາມນຶກຄິດ, ແລະ ສຸດພະລັງ ຈະເພີ່ມທະວີຂຶ້ນ (ເບິ່ງ ມາຣະໂກ 12:30; ລູກາ 10:27; D&C 59:5).
ພອນຂອງການລະນຶກເຖິງພຣະອົງໃນແຕ່ລະວັນ ແລະ ໃນປະຈຸບັນ ຈະມີມາຢ່າງຊ້າໆ ແລະ ສະໝ່ຳສະເໝີ ເມື່ອເຮົາຮັບໃຊ້ພຣະອົງ, ຊື່ນຊົມໃນພຣະຄຳຂອງພຣະອົງ, ແລະ ອະທິຖານດ້ວຍສັດທາໃນພຣະນາມຂອງພຣະອົງ. ແລະ ການລະນຶກເຖິງນີ້ ຈະຫລໍ່ຫລອມເຮົາ ໃຫ້ກາຍເປັນສານຸສິດທີ່ແທ້ຈິງຂອງອົງພຣະເຢຊູຄຣິດເຈົ້າ ໃນອານາຈັກຂອງພຣະອົງຢູ່ໃນໂລກນີ້—ແລະ ຕໍ່ໄປ ກັບພຣະບິດາຂອງພຣະອົງ ໃນລັດສະໝີພາບຂອງໂລກທີ່ຈະມາເຖິງ.
© 2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ First Presidency Message, October 2017. Laotian. 97930 331