Messaġġ tal-Għalliema taż-Żjajjar, Ottubru 2017
Nuru Mħabbitna Lejn Dawk li Qabdu Triq Żbaljata
Bl-għajnuna tat-talb studjaw dan il-materjal u fittxu li tiksbu l-ispirazzjoni biex tkunu tafu x’ għandkom taqsmu ma’ ħutkom. Li jifhmu l-għan tas-Soċjetà tal-Għajnuna kif jista’ jħejji lill-ulied nisa ta’ Alla għall-barkiet tal-ħajja eterna?
Fidi, Familja, Għajnuna
“Ir-realtà hi li familji perfetti ma jeżistux … ,” qal il-President Dieter F. Uchtdorf, it-Tieni Kunsillier fl-Ewwel Presidenza. “Huma x’inhuma l-problemi li qed tħabbat wiċċha magħhom il-familja tagħkom, huma x’inhuma dawk l-affarijiet li jeħtieġ tagħmlu biex issolvuhom, il-bidu u t-tmiem tas-soluzzjoni hija l-karità, l-imħabba pura ta’ Kristu.”1
Dwar dawk li mhux qed jipparteċipaw għal kollox fl-evanġelju, Linda K. Burton, li kienet President Ġenerali tas-Soċjetà tal-Għajnuna, qalet: “Missierna tas-Smewwiet iħobb lil uliedu kollha. … Jinsabu fejn jinsabu—fit-triq il-ġusta jew le—Huwa jridhom lura d-dar.”2
“Qabdu kemm qabdu triq ħażina wliedkom, … meta intom titkellmu magħhom, qatt tagħmlu dan b’ rabja, tagħmlux dan b’ mod aħrax, fi spirtu ta’ xi ħadd li qed jikkundannahom,” għallem il-President Joseph F. Smith (1838–1918). “Kellmuhom bil-ħlewwa.”3
Il-Presbiteru Brent H. Nielson tas-Sebgħin enfasizza l-istruzzjoni tas-Salvatur lil dawk li għandhom 10 biċċiet tal-fidda u jitilfu waħda minnhom: “Fittxuha sakemm issibuha. Meta dik il-biċċa mitlufa tkun bintkom jew ikun binkom, jew inkella ħukom jew oħtkom, … wara li nkunu għamilna dak kollu li nistgħu nagħmlu, għandna xorta nibqgħu nħobbu lil dik il-persuna b’ qalbna kollha. …
“Jalla intom u jiena nirċievu r-rivelazzjoni li nkunu nafu liema hu l-aħjar mod kif għandna navviċinaw lil dawk li jinsabu mitlufin u, meta jkun neċessarju, ikollna l-paċenzja u l-imħabba li għandhom Missierna tas-Smewwiet u Ibnu, Ġesù Kristu, hekk kif aħna nħobbu u nistennew lill-iben il-ħali.”4
Il-President Henry B. Eyring, l-Ewwel Kunsillier fl-Ewwel Presidenza, qal: “Jiena tlabt bil-fidi sabiex xi nies li jiena nħobb ifittxu u jħossu f’ ħajjithom il-qawwa tal-Att tal-Fidwa. Jiena tlabt bil-fidi sabiex anġli umani jmorru jagħtuhom l-għajnuna tagħhom, u hekk ġara.
“Alla għandu l-mezzi kif isalva lil kull wieħed u waħda minn uliedu.”5
Skrittura u Informazzjoni Addizzjonali
© 2017 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/17. Approvazzjoni tat-traduzzjoni: 6/17. Traduzzjoni ta’ Visiting Teaching Message, October 2017. Maltese. 97930 159