Mensahe ti Umuna a Panguluen, Nobiembre 2017
Dikayo Agbuteng nga Agaramid iti Nasayaat
Ibaga ti Apo kadatayo a no agtakdertayo nga addaan pammati iti rabaw ti batona, mapukaw ti duadua ken buteng; dumakkel ti tarigagay nga agaramid iti nasayaat.
Patpatgek a kakabsatko, ikararagko a sipapakumbaba nga adda koma ti Espiritu ti Apo kadatayo bayat ti panagsaritak ita nga aldaw. Napno ti pusok iti panagyaman iti Apo, a ti Simbaanna isu daytoy, para iti inspirasion a nariknatayo kadagiti napasnek a kararagtayo, naparegta a sermon, ken immanghel a panagkanta iti daytoy a komperensia.
Itay napalabas nga Abril, nangted ni Presidente Thomas S. Monson iti mensahe a nangguyugoy iti puspuso iti sangalubongan, agraman kaniak. Insaritana maipapan ti bileg ti Libro ni Mormon. Inallukoynatayo nga agadal, agutob, ken yaplikar dagiti pannursuro daytoy. Inkarina a no mangilatangtayo iti orastayo iti tunggal aldaw iti panagadal ken panagutob ken panagtungpal kadagiti bilin a linaon ti Libro ni Mormon, addaantayo iti napateg a pammaneknek iti kinapudnona, ken ti bunga ti pammaneknek maipapan ti sibibiag a Cristo ket kitaennatayo agingga iti kinatalged iti panawen ti pannakaburibor. (Kitaen iti “The Power of the Book of Mormon,” Liahona, Mayo 2017, 86–87.)
Kas iti adu kadakayo, nangngegak dagiti balikas ti propeta kas timek ti Apo kaniak. Ket kas iti adu kadakayo, inkeddengko a tungpalen dagita a balikas. Ita, manipud pay idi ubingak a bassit, nariknakon ti pammaneknek a balikas ti Dios ti Libro ni Mormon, a nakisarita ti Ama ken ti Anak ken ni Joseph Smith, nga immay dagiti nagkauna nga Apostol ken ni Joseph Smith tapno isubli dagiti tulbek ti priesthood iti Simbaan ti Apo.
Addaan iti dayta a pammaneknek, nabasak ti Libro ni Mormon iti inaldaw iti nasurok a 50 a tawen. Ngarud nalabit a napanunotko a para iti maysa a tao dagiti balikas ni Presidente Monson. Ngem, kas iti adu kadakayo, nariknak ti pammaregta ti propeta ken ti karina a mangawis kaniak nga ad-adda nga agkagumaanak pay. Adu kadakayo ti nakaaramiden iti inaramidko: nagkararag iti napaspasnek, nagutob a napaspasnek iti nasantuan a kasuratan, ken ad-adda pay a nangikarigaran nga agserbi iti Apo ken iti dadduma para Kenkuana.
Ti naragsak a resultana para kaniak, ken para iti adu kadakayo, ket no ania ti inkari ti propeta. Kadatayo a nangipapuso iti daytoy naparegta a balakadna nangngegantayon ti Esprituna a nakalawlawag. Nakasaraktayo iti dakdakkel a bileg a mangkedked iti sulisog ken nakariknatayo iti napigpigsa a pammati iti nagungar a Jesucristo, iti ebangheliona, ken iti sibibiag a Simbaanna.
Iti panawen ti umad-adu a riribuk iti lubong, naawanan iti duadua ken buteng dagiti dumakdakkel iti pammaneknekda ken nangisangbay kadatayo iti rikna ti talna. Iti idedengngeg iti balakad ni Presidente Monson ket addaan dua a sabali pay nga epektona kaniak: Umuna, ti Espiritu nga inkarina a nangted iti namnama no ania ti agur-uray a napintas a mapasamak, nupay kasla umad-adun dagiti pakariribukan ti lubong. Ket maikadua, inikkannak ti Apo—ken dakayo—uray nain-indaklan a rikna ti ayatna kadagiti agsagsagaba. Mariknatayo ti dumakdakkel a tarigagay a mapan sumaranay kadagiti dadduma. Addan dayta a tarigagay iti puso ti panagsebi ken pannursuro ni Presidente Monson.
Inkari ti Apo ti ayat para kadagiti dadduma ken tured kada Propeta Joseph Smith ken Oliver Cowdery no dagiti aramid nga agur-uray kadakuada ket kasla natalipupos. Kinuna ti Apo a sumangbay dayta kasapulan a tured manipud iti pammatida Kenkuana kas batoda:
“Dikayo agbuteng nga agaramid iti nasayaat, annakko, ta ania man nga imulayo, kastanto met ti apitenyo; ngarud no agmulakayo iti nasayaat agapitkayonto met iti nasayaat a gunggona.
“Ngarud dikayo agbuteng, bassit a pangen; agaramidkayo iti nasayaat; bay-anyo nga agtipon ti daga ken ti impierno a mangbusor kadakayo; ta no nabangonkayo iti batok, saanda nga agballigi.
“Adtoy, saankayo a kedngan; mapankayon ket saankayon nga agbasol pay; aramidenyo a sipaparbeng ti aramid nga imbilinko kadakayo.
“Kitaendak iti tunggal panunot; saankayo nga agduadua, saankayo nga agbuteng.
“Imutektekanyo dagiti sugat a naipalay iti bakrangko, ken kasta met ti nagnaan dagiti lansa kadagiti dakulap ken dapanko; agbalinkayo a napudno, tungpalenyo dagiti bilinko, ket tawidenyonto ti pagarian ti langit” (DkK 6:33–37).
Imbaga ti Apo kadagiti dadaulona iti Pannakaisubli, ken imbagana kadatayo, a no agtakdertayo nga addaan pammati iti rabaw ti batona, maawan ti duadua ken buteng; dumakkel ti tarigagay nga agaramid iti nasayaat. No awatentayo ti awis ni Presidente Monson a mangitukit iti puspusotayo ti pammaneknek maipapan ken Jesucristo, magun-odtayo ti bileg, ti tarigagay, ken ti tured a mapan sumaranay kadagiti dadduma nga awan ti pannakaseknan para iti bukodtayo a kasapulan.
Nakitak dayta a pammati ken tured iti adu a gundaway idi naipasango dagiti mamatpati a Santo iti Ud-udina nga Aldaw iti nakabutbuteng a pannubok. Kas maysa a pagarigan, addaak idiay Idaho idi pimsuak ti Teton Dam idi Hunio 5, 1976. Maysa a pader ti danum ti nagpababa. Rinibu dagiti pimmanaw kadagiti pagtaenganda. Rinibribu dagiti pagtaengan ken negosio ti nadadael. Milagro a basbassit ngem 15 a tattao ti natay.
No ania ti nakitak idiay, nakitak a sititibker a nakatakder dagiti Santo iti Ud-udina nga Aldaw iti bato ti pammaneknek ni Jesucristo. Gapu ta awan panagbutengda nga Isu ti agbambantay kadakuada, agbalinda a natured. Dida ikankano ti bukodda a pannubok tapno mapanda tumulong kadagiti dadduma. Ket aramidenda daytoy gapu iti panagayatda iti Apo, nga awan ti dawatenda a kasukat.
Kas pagarigan, idi pimsuak ti Teton Dam, adda iti biahe ti agassawa a Santo iti Ud-udina nga Aldaw, adu a kilometro ti kaadayona manipud iti pagtaenganda. Apaman a nangngegda ti damag iti radio, sidadarasda a nagsubli iti Rexburg. Imbes a mapanda iti bukodda a pagtaengan tapno kitaen no nadadael daytoy, napanda sinapul ti bishopda. Adda isuna iti pasdek a maus-usar a kas recovery center. Tumultulong a mangitulod iti rinibribu a nagboluntario nga agsangpet a nakalugan iti amarilio a school bus.
Immasideg ti agassawa iti bishop ket kinunada, “Kasubsublimi laeng. Bishop, nudtoy kadi ti papananmi tapno tumulong?” Intedna kadakuada dagiti nagan ti maysa a pamilia. Nagbati dagiti agassawa a nangikkat iti pitak ken danum iti maysa a pagtaengan kalpasan ti sabali. Nagtrabahoda manipud iti parbangon agingga iti rabii iti adu nga aldaw. Kamaudiananna nagsardengda tapno mapan kitaen ti bukodda a pagtaengan. Inanuden daytoy ti layus, ket awanen ti madalusan. Isu a nagdardarasda a nagsubli iti bishopda. Sinaludsodda, “Bishop, adda kadi pay tao a kayatmo a tulonganmi?”
Ti milagro ti naulimek a tured ken panangngaasi—ti natarnaw nga ayat ni Cristo—naulit manen kadagiti tawen ken iti intero a lubong. Napasamak kadagiti nakabutbuteng nga aldaw dagiti pammarparigat ken pannubok iti panawen ni Propeta Joseph Smith iti Missouri. Napasamak idi indauluan ni Brigham Young ti ipapanaw manipud iti Nauvoo ket kalpasanna inawaganna dagiti Santo agingga kadagiti disierto a lugar iti intero nga akinlaud ti Estados Unidos, tapno agtitinnulong a mangbangon iti Zion para iti Apo.
No basaenyo dagiti naisurat iti journal dagita a nagkauna a kameng, makitayo ti milagro ti pammati a mangpapanaw iti duadua ken buteng. Ken mabasayo maipapan dagiti Santo a mangpanaw kadagiti bukodda a pagimbagan tapno tulonganda ti maysa a tao para iti Apo, sakabay a sublianda ti bukodda a karnero wenno ti bukodda a di pay naarado a taltalonda.
Naimatangak dayta kasta met la a milagro sumagmamano nga ababa nga aldaw ti napalabas iti gapuanan ti Hurricane Irma iti Puerto Rico, Saint Thomas, ken Florida, a nakikaykaysaan dagiti Santo iti Ud-udina nga Aldaw kadagiti dadduma pay a simbaan, grupo ti lokal a komunidad, ken nasional nga organisasion tapno marugian ti aramidda a panagdalus.
Kas kadagiti gagayyemko iti Rexburg, maysa a saan a kamiembro nga agassawa iti Florida ti nakapamaysa a mangtulong iti komunidad imbes nga agtrabaho iti bukodda a kukua. Idi indiaya ti sumagmamano a Santo iti Ud-udina nga Aldaw a tumulong a mangikkat iti dua a dadakkel a kayo a nangserra iti drivewayda, inlawlawag ti agassawa a naparegtada unay ket iti kasta inkeddengda ti panangtulong kadagiti dadduma, nga addaan iti pammati nga itedto ti Apo ti tulong a kasapulanda iti bukodda a pagtaengan. Insarita kalpasanna ti asawa a lalaki a sakbay a simmangpet dagiti miembro ti Simbaan a mangidiaydiaya iti tulong, nagkarkararag dagiti agassawa. Inawatda ti sungbat nga umayto ti tulong. Dimteng daytoy iti uneg dagiti oras iti dayta a panangipanamnama.
Nangngegko ti maysa a damag nga adda nangrugi a mangaw-awag kadagiti Santo iti Ud-udina nga Aldaw a nakabado iti amarilio a Helping Hands T-shirts a “Dagiti Yellow Angels.” Impatarimaan ti maysa a Santa iti Ud-udina nga Aldaw ti luganna ken insalaysay ti lalaki a mangtultulong kenkuana ti “naespirituan a padasna” idi nagikkat iti dadakkel a kayo dagiti tao a nakakamiseta iti amarilio manipud iti arubayanna ket kalpasanna, kinunana, “kinantaandak maipapan iti panagbalinko a maysa nga anak ti Dios.”
Insalaysay ti sabali pay nga umili iti Florida—a saantayo a kapada iti pammati—a napan dagiti Santo iti Ud-udina nga Aldaw iti pagtaenganna idi madama nga agdaldalus iti paraanganna a dinadael ti bagyo a dumani makasangit gapu iti bannogna. Inaramid dagiti nagboluntario, iti balikasna, “maysa a nadalus a milagro.” Nagserbida a saan laeng iti kinapasnek ngem ketdi pay iti panagkatawa ken panagisem, a saanda nga umawat iti kasukatna.
Nakitak dayta a kinapasnek ken nangngegko dayta a panagkatawada idi, iti malem ti Sabado, binisitak ti maysa grupo dagiti Santo iti Ud-udina nga Aldaw iti Florida. Insardeng dagiti nagboluntario ti panagdalusda tapno makilamanoda kaniak. Kinunada a 90 a miembro ti stakeda iti Georgia ti nagaramid iti plano a kumuyog iti panagsaranay iti Florida iti kasakbayan dayta a rabii.
Pimmanawda iti Georgia iti alas kuatro iti agsapa, nagbiahe iti sumagmamano nga oras, nagmalmalem a nagtrabaho, ken nagplanoda nga agtrabaho manen iti kabigatanna.
Insalaysayda amin kaniak daytoy a siraragsak ken siiisem. Ti laeng mariknak ket kayatdan a leppasen ti pagyamanan tapno makasublidan iti trabahoda. Pinaandar manen ti stake president ti chain saw na ket putputdenna ti natumba a kayo ket ik-ikkaten ti maysa a bishop dagiti sanga ti kayo idi lumugankami iti luganmi tapno mapankami iti sumaruno a rescue team.
Iti nasapsapa dayta nga aldaw, bayat ti ipapanmi iti sabali pay a lugar, immasideg ti maysa a lalaki iti luganmi, inikkatna ti kallugongna ket nagyaman kadakami para kadagiti nagboluntario. Kinunana, “Saanak a miembro ti simbaanyo. Diak mamati a naaramidyo daytoy kadakami. Bendisionannakayo ti Dios.” Ti nagboluntario nga LDS a nakatakder iti abayna iti amarilio a kamiseta ket immisem ken tinignayna ti abagana a kasla kunkunana a di nasken ti agyaman kenkuana.
Idinto ta immay dagiti nagboluntario manipud iti Georgia tapno tumulong iti daytoy a lalaki a di mamati, ginasgasut a Santo iti Ud-udina nga Aldaw manipud iti dayta nakaro a dinadael ti bagyo a paset ti Florida ket nagbiahe iti ginasgasut a milia manipud abagatan agingga iti sabali a lugar iti Florida a nakadamaganda kadagiti tao a nadidigra iti nakarkaro.
Dayta nga aldaw nalagipko ken nasaysayaat a naawatak dagiti napadtuan a balikas ni Propeta Joseph Smith: “Ti maysa a lalaki a napnuan iti ayat ti Dios, ket saan a mapnek a mabendisionan laeng ti pamiliana, ngem isaknap ketdi iti sapasap a lubong, nga aggagar a mangbendision iti amin a sangkataw-an” (Teachings of Presidents of the Church: Joseph Smith [2007], 426).
Makitatayo ti kasta nga ayat iti biag dagiti Santo iti Ud-udina nga Aldaw iti amin a lugar. Tunggal kanito nga adda nakaam-amak a pasamak iti sadino man a lugar ti lubong, agidonar ken agboluntario dagiti Santo iti Ud-udina nga Aldaw kadagiti aramid nga agpaay iti tao iti Simbaan. Dumani saanen a kasapulan ti agkiddaw. Kinapudnona, iti sumagmamano a gundaway, nasken a kiddawenmi kadagiti agboluntarito nga agurayda nga agbiahe a mapan iti recovery site agingga a nakasagana nga umawat kadakuada dagiti tao a mangimaton iti dayta nga aramid.
Dayta a tarigagay a mangbendision ket bunga dagiti tao a nakagun-od iti pammaneknek maipapan ken Jesucristo, ti ebangheliona, ti naisubli a Simbaanna, ken ti propetana. Dayta ti gapu no apay a saan a nagduadua ken saan a nagbuteng dagiti tao ti Apo. Dayta ti gapu no apay agboluntario dagiti misionario para iti serbisio iti tunggal paset ti lubong. Dayta ti gapu no apay agkararag dagiti nagannak a kadua dagiti annakda para kadagiti dadduma. Dayta ti gapu no apay kariten dagiti leader dagiti agtutuboda a mangawat iti kiddaw ni Presidente Monson a mangirarem iti bagbagida a naimpusuan iti Libro ni Mormon. Umay ti bunga saan laeng a babaen ti panangguyugoy dagiti leader ngem ketdi babaen ti panagtignay a sipapammati dagiti agtutubo ken miembro. Dayta a pammati, no mangtignay kadakuada, nga agkasapulan iti saan a managimbubukod a sakripisio, ket mangyeg iti panagbalbaliw iti puso a mangpalugod kadakuada a makarikna iti ayat ti Dios.
Nupay kasta, agtalinaed ti panagbalbaliw laeng dagiti puspusotayo no itultuloytayo a suroten ti balakad ti propeta. No agsardengtayo kalpasan ti maysa a panagkagumaan ket masayangto laeng dayta a panagbalbaliw.
Pinatibker dagiti napudno a Santo iti Ud-udina nga aldaw ti pammatida ken ni Apo Jesucristo, iti Libro ni Mormon kas balikas ti Dios, ken iti pannakaisubli dagiti tulbek ti priesthood iti pudno a Simbaanna. Nangted kadatayo dayta napatibker a pammati iti dakdakkel a tured ken pannakaseknan para iti dadduma nga annak ti Dios. Ngem dagiti karit ken gundaway nga agur-uray ket agkasapulanto iti ad-adu pay.
Ditayo kabaelan a sirmataen dagiti detalye, ngem ammotayo dagiti gagangay a mapasamakto iti masakbayan. Ammotayo a kadagiti maudi nga aldaw, addanto riribuk iti lubong. Ammotayo nga iti baet ti ania man a dumteng a riribuk, iturongto ti Apo dagiti napudno a Santo iti Ud-udina nga Aldaw a mangidanon iti ebanghelio ni Jesucristo iti tunggal pagilian, kabagian, pagsasao, ken tattao. Ken ammotayo a maikarinto dagiti pudno a disipulo ti Apo ken nakasaganadanto nga umawat Kenkuana inton umay manen Isuna. Masapul a ditayo agbuteng.
Iti kasta, agingga a napatibkertayon ti pammati ken turedtayo iti puspusotayo, namnamaen ti Apo ti ad-adu pay manipud kadatayo—ken manipud kadagiti henerasion a sumarsaruno kadatayo. Nasken nga agbalinda a napigpigsa ken naturtured gapu ta dakdakkel ken narigrigat dagiti banag nga aramidendanto ngem dagiti naaramidtayon. Ket maipasangodanto iti ad-adu pay a suppiat manipud iti kabusor dagiti kararuatayo.
Ti wagas tapno maaddaan iti napintas a pannirigan ket inted ti Apo: “Kitaendak iti tunggal panunot; saankayo nga agduadua, saankayo nga agbuteng” (DkK 6:36). Imbaga kadatayo ni Presidente Monson no kasano nga aramiden dayta. Nasken nga utoben ken yaplikartayo ti Libro ni Mormon ken ti balikas dagiti propeta. Agkararag a kanayon. Mamati. Agserbi iti Apo iti amin a puso, kabaelan, panunot, ken pigsa. Nasken nga agkararagtayo iti amin a kabaelan ti pusotayo para iti sagut ti asi, ti nadalus nga ayat ti Cristo (kitaen iti Moroni 7:47–48). Ken kangrunaan ti amin, nasken a naanus ken napasnektayo iti panangsurot iti balakad ti propeta.
No narigat ti wagas, makapagpannuraytayo iti kari ti Apo—ti kari nga impalagip ni Presidente Monson kadatayo no masansan nga adawenna dagitoy a balikas ti Mangisalakan: “Asino man a mangawat kadakayo, addaakto met sadiay, ta addaakto iti sangoyo. Addaakto iti makanawanyo ken iti makanigidyo, ket addanto ti Espirituk iti puspusoyo, ket likmutendakayonto dagiti anghelko, a mangtarabay kadakayo” (DkK 84:88).
Paneknekak nga umay ti Apo iti sangoyo no addakayo iti panangibaonna. No dadduma agbalinkayo nga anghel ti Apo a naibaon a mangtulong iti dadduma. No dadduma dakayonto ti maysa a pinalawlawan dagiti anghel a mangtulong kadakayo. Ngem kanayon nga adda kadakayo ti Espirituna iti pusoyo, kas iti naikari kadakayo iti tunggal serbisio iti sakramento. Nasken nga agtungpalkayo laeng kadagiti bilinna.
Agur-uray dagiti kasayatan nga aldaw ti kaadda ti pagarian ti Dios iti daga. Ti pagsusupadian ti mangpapigsanto iti pammatitayo ken ni Jesucristo, kas iti naaramiden manipud pay kadagidi aldaw ni Propeta Joseph Smith. Kanayon nga parmeken ti pammati ti buteng. Ti panagtitinnulong ket agbunga iti panagkaykaysa. Dengngen ken sungbatan ti managayat a Dios dagiti kararagyo para kadagiti agkasapulan. Saan nga agridep wenno saan a matmaturog.
Paneknekak a sibibiag ti Dios Ama ket kayatana nga agawidtayo a makipagtaeng Kenkuana. Daytoy ti pudno a Simbaan ni Apo Jesucristo. Am-ammonakayo; ay-ayatennakayo; bambantayannakayo. Nagbayad-basol para kadagiti basbasoltayo ken ti basbasol ti amin nga annak ti Nailangitan nga Ama. Ti panangsurot Kenkuana iti biagyo ken iti panagserbiyo kadagiti dadduma ti kakaisuna a dalan nga agturong iti agnanayon a biag.
Paneknekak daytoy ken ibatik kadakayo ti pammendision ken ayatko. Iti sagrado a nagan ni Jesucristo, amen.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti First Presidency Message, November 2017. Ilokano.97931 864