Mensahe iti Visiting Teaching, Nobiembre 2017
Tallo nga Agkakabsat a Babbai
Datayo ti akinrebbeng para iti bukodtayo a kinadisipulo, ket bassit—no adda man—ti pakainaiganna iti panangtrato kadatayo dagiti dadduma.
Patpatgek a kakabsatko a babbai, patpatgek a gagayyem, napateg ken nakaskasdaaw ti mangirugi iti sapasap a komperensia iti sesion dagiti kakabsat a babbai iti sapasap a sangalubongan. Panunotenyo laeng: dagiti kakabsat a babbai a nagduduma iti edad, naggapuan, nasionalidad, ken pagsasao ket nagkaykaysa iti pammati ken ayat para ken ni Apo Jesucristo.
Itay kallabes a nakasaomi ti patpatgentayo unay a propeta, ni Presidente Thomas S. Monson, imbagana kadakami no kasano ti kadakkel ti ayatna iti Apo. Ken ammok nga agyaman unay ni Presidente Monson iti ayatyo, kadagiti kararagyo, ken ti kinapasnekyo iti Apo.
Nabayagen a panawen ti napalabas iti adayo a pagilian a nagnaed ti pamilia dagiti tallo nga agkakabsat a babbai.
Ti inauna a kabsat a babai ket naliday. Kasla saan a maragsakan iti ania man a paset ti bagina manipud iti agong agingga iti timidna ken manipud iti kudilna agingga iti ramay ti sakana. No agsao isuna, no dadduma ket nakakatkatawa dagiti balikasna, ket kinatkatawaan dagiti tao. No adda mangdillaw kenkuana wenno “nakalipat” a mangawis kenkuana iti no sadino man, lumabbaga isuna, wenno umadayo, ket agsapul iti nalimed a lugar a sililiday a pangipeksaanna iti sakit ti nakemna ket agpanunot no apay a naladingit ken awan regta ti biag.
Ti maikadua a kabsat a babai ket napungtot. Impagarupna iti bagina nga isu ti kalaingan, ngem kanayon nga adda makaala iti nangatngato a marka ngem isuna kadagiti eksamen iti eskuela. Imbilangna ti bagina a nakakatkatawa, napintas, napostura, wenno makaguyugoy. Ngem kanayon a kasla adda sabali nga ad-adda a nakakatkatawa, napimpintas, napospostura, ken ad-adda a makaguyugoy ngem isuna.
Saan a pulos nga isu ti umuna iti ania man a banag, ket dina maawat daytoy. Saan koma a kastoy ti pagbalinan ti biag!
No dadduma ung-ungtanna dagiti dadduma, ken kasla kanayon a nakasagana nga agpungtot iti maysa a banag wenno sabali pay.
Siempre, saanen a nagustuan wenno nagbalin a nalatak gapu iti daytoy. No dadduma ingarietna dagiti ngipenna, irutanna dagiti gemgemna, ket panunotenna, “Saan a nainkalintegan ti biag!”
Ket adda idiay ti maikatlo a kabsat a babai. Saan a kas iti naliday ken napungtot a kakabsatna a babbai, isu ket—siempre, naragsak. Ket saan a gapu ta nalalaing ken napimpintas wenno ad-adu ti kabaelanna ngem dagiti kakabsatna a babbai. Saan, no dadduma liniklikan ken saan met nga inkakano dagiti tao isuna. No dadduma kinatawaanda ti panagkawesna wenno dagiti banag nga isasaona. No dadduma nagsaoda iti nasakit maipapan kenkuana. Ngem dina impalubos ti ania man iti dayta a mamagburibor unay kenkuana.
Kaay-ayo daytoy a kabsat a babai ti agkanta. Saan a nalaing a kumanta, ket kinatkatawaan daytoy dagiti tao, ngem saan a dayta ti nangpasardeng kenkuana. Kunana no kua, “Diak ipalubos dagiti dadduma a tao ken dagiti opinionda a mangpasardeng kaniak iti panagkanta!”
Gapu ta agtultuloy isuna iti panagkanta nagliday ti inauna a kabsatna a babai ken nagpungtot ti maikadua a kabsatna a babai.
Naglabas ti adu a tawen, ket idi agangay nadanon ti tunggal kabsat a babai ti gibus ti panagbiagna iti daga.
Ti inauna a kabsat a babai, a kanayon a nakatakuat nga adu dagiti pannakapaay iti biag, ket pimmusay idi agangay a naliday.
Ti maikadua, nga inaldaw a makakita iti maysa a baro a banag a kagurana, ket pimmusay a napungtot.
Ken ti maikatlo a kabsat a babai, a nangbubos iti biagna iti panagkansion iti kantana iti amin a pigsana ken addaan panagtalek nga umisem iti rupana, ket pimmusay a naragsak.
Siempre, saan a kaano man simple ti biag, saan a kaano man maymaysa ti pakabuklan dagiti tao kas ti tallo nga agkakabsat a babbai iti daytoy nga estoria. Ngem uray dagiti napalaus a pagarigan kas kadagitoy ket makaisuro kadatayo maipapan iti bagitayo. No maipadakayo iti kaaduan kadatayo, mabalinyo a lasinen ti paset ti bagiyo iti maysa, dua, wenno nalabit ti amin a tallo kadagitoy agkakabsat a babbai. Saggaysaen a kitaentayo dagitoy.
Ti Biktima
Nakita ti inauna a kabsat a babai ti bagina a kas biktima—kas iti maysa a tao a pinagtignay ti sabali.1 Kasla agsasaruno nga adda mapaspasamak kenkuana isu a nakaay-ay-ay. Addaan iti kastoy a pannirigan ti biag, binay-anna a kontrolen dagiti dadduma ti rikna ken ugalina. No aramidentayo daytoy, maguyodnatayo ti amin nga opinion—ken iti daytoy a panawen ti social media iti amin a nga aglawlaw, nalatak unay ken adu ti umawat kadagita nga opinion.
Ay-ayatek a kakabsatko a babbai, apay a nasken nga isukoyo ti pagragsakanyo iti maysa a tao, wenno iti grupo dagiti tao, a saan a unay a manangisakit iti pagragsakanyo?
No madanagankayo maipapan iti isasao dagiti tao maipanggep kadakayo, mabalinko nga isingasing daytoy a pamuspusan kadakayo: laglagipenyo no asinokayo. Laglagipenyo a naggapukayo iti naarian a balay ti pagarian ti Dios, annak a babbai ti Nailangitan a Nagannak, nga agturay iti intero a sangalubongan.
Addaankayo iti naespirituan a DNA ti Dios. Addaankayo kadagiti naidumduma a sagut a nagtaud iti naespirituan a pannakaparsuayo ken dimmur-as dagitoy iti biag sakbay ti pannakayanakyo ditoy daga. Dakayo ti anak ti manangngaasi ken agnananyon nga Ama iti Langit, ti Apo dagiti Pangen, ti Maysa a nangparsua iti lubong, nangiwaras kadagiti agtaytayyek a bitbituen iti intero a nalawa a tangatang, ken nangikabil kadagiti planeta iti naituding nga orbitda.
Addakayo kadagiti imana.
Dagiti nasayaat unay nga imana.
Dagiti managayat nga imana.
Dagiti manangipateg nga imana.
Ket saan a mabalbaliwan dayta ti asino man nga agsao maipapan kadakayo. Awan pateg dagiti balikasda no maidasig iti insao ti Dios maipapan kadakayo.
Dakayo ti napateg nga anakna.
Ay-ayatennakayo.
Nagbiddutkayo man, timmalikudkayo man Kenkuana,ay-ayatennakayo ti Dios. No mariknayo a napukawkayo, nabaybay-an, wenno nalipatan—dikay agbuteng. Masarakannakayonto ti Naimbag a Pastor. Ibaklaynakayonto kadagiti abagana. Bagkatennakayonto a yawid iti pagtaengan.2
Ay-ayatek a kakabsatko a babbai, imulayo koma iti kaunggan ti puspusoyo dagitoy a nadiosan a kinapudno. Ket matakuatanyonto nga adu dagiti gapu tapno saan nga agliday, gapu ta addaankayo iti agnanayon a pagtungpalan a ragpatenyo.
Inted ti ay-ayaten a Mangisalakan ti biagna tapno makapagpilikayo nga aramidenyo a pumudno dayta a pagtungpalan. Inawatyo ti naganna; dakayo dagiti disipulona. Ken gapu Kenkuana, makawesanyo ti bagbagiyo iti roba ti agnanayon a gloria.
Ti Makagura
Ti maikadua a kabsat a babai ket kagurana ti lubong. Kas iti naliday a kabsatna a babai, nariknana a dagiti problemana iti biagna ket gapuanan ti maysa a tao. Pabasolenna ti pamiliana, dagiti gagayyemna, ti amo ken dagiti katrabahona, ti pulis, dagiti kaarrubana, dagiti leader iti Simbaan, ti agdama nga uso, pudot ti init, simple a dakes a gasat. Ket pinagsawsaw-anna ida iti nasakit.
Dina pinanunot a maysa isuna a natangsit a tao. Iti kasupadina, nariknana a salsaluadanna laeng ti bagina. Iti pammatina, managimbubukod, bassit, ken gura ti gagem ti tunggal maysa. Idinto nga isu ket addaan iti nasayaat a panggep—hustisia, integridad, ken ayat.
Daksanggasat, ta gagangay unay ti panangpanunot iti napungtot a kabsat a babai. Nakita daytoy iti kallabes a panagadal idi sukisuken ti panagsusupiat dagiti agkakaribal a grupo. Kas paset ti panagadal, ininterbyu dagiti researcher dagiti Palestino ken Israelita iti Middle East, ken dagiti Republican ken Democrat iti Estados Unidos. Natakuatanda a “narikna ti tunggal bangir a ti ad-adda a gagem ti bukodda a grupo [ket] ayat nga ad-adda ngem iti gura, ngem idi masaludsod no apay a nairaman iti panagsusupiat ti karibal ti grupoda, [kinunada] a gura ti gagem [ti sabali] pay a grupo.”3
Iti sabali a balikas, impagarup ti tunggal grupo iti bagida kas “bida”—nalinteg, nasingpet, ken napudno. Iti kasupadina, nakitada dagiti karibalda a kas “kontrabida”—awan ammona, naulbod, ken dakes pay.
Idi tawen a nayanakak, adda nakabutbuteng a gubat iti lubong a nangisangbay iti nakaro a panangladingit ken panagliday dagiti tao. Daytoy a gubat a gapuanan ti bukodko a pagilian,—ti grupo dagiti tattao a nangilasin iti sumagmamano a dadduma pay a grupo kas dakes ket inyallukoyna ti gura kadakuada.
Pinagulimekda dagiti saanda a magustuan. Pinabainan ken pinadakesda ida. Imbilangda ida a nababbabada ngem isuda—ken saan pay a makatao. No linaisyo ti grupo dagiti tao, ad-adda nga ikalinteganyo dagiti insao ken inaramid a kinaranggas a maibusor kadakuada.
Agtigergerak no panunotek ti maipapan ti napasamak idiay Germany iti maika-20 a siglo.
No adda sumuppiat wenno saan nga umanamong kadatayo, masulisogtayo a mangipagarup nga amangan ta adda pagkurangan kadakuada. Ket manipud iti dayta nakaal-alisto nga isilpo dagiti kadadaksan a gagem kadagiti sao ken tignayda.
Siempre, nasken a kanayon nga itandudotayo no ania ti umno, ken adda dagiti panawen a nasken nga ipigsatayo dagiti timektayo para iti dayta a panggep. Nupay kasta, no aramidentayo nga adda pungtot wenno gura iti puspusotayo—no ungtantayo dagiti dadduma tapno pasakitan, pabainan, wenno pagulimeken ida—ditayon ar-aramiden daytoy iti kinalinteg.
Ania ti insuro ti Mangisalakan?
“Kunak kadakayo, ayatenyo ti kabusoryo, ket bendisionanyo ti mangilunod kadakayo, agaramidkayo iti nasayaat kadagiti gumura kadakayo, ket ikararaganyo dagiti manguy-uyaw ken mangidadanes kadakayo;
“Tapno agbalinkayo nga annak ti Amayo nga adda sadi langit;”4
Panangisuro iti Wagas ti Mangisalakan. Daytoy ti umuna nga addang iti panangdadael kadagiti tubeng a mangparnuay iti napalaus a panagpungtot, gura, panagbibingay, ken kinaranggas iti lubong.
“Wen,” mabalin a kunayo, “Natallugodak a mangayat kadagiti kabusorko—no natallugodda met nga aramiden ti kasta.”
Ngem saan a talaga napateg dayta, saan kadi? Datayo ti akinrebbeng para iti bukodtayo a kinadisipulo, ket bassit—no adda man—ti pakainaiganna iti panangtrato kadatayo dagiti dadduma. Nalawag a namnamaentayo nga agbalindanto a mannakaawat ken manangngaasi kas kasukat, ngem ti panagayattayo para kadakuada ket awan ti pakainaiganna kadagiti riknada kadatayo.
Nalabit a paluknengento ti panagkagumaantayo a mangayat kadagiti kabusortayo dagiti puspusoda ken mangimpluensia kadakuada para iti pagimbagan. Nalabit a saan. Ngem saan a dayta ti mangbalbaliw iti panagkumittayo a sumurot ken ni Jesucristo.
Iti kasta, kas miembro ti Simbaan ni Jesucristo, ayatentayo dagiti kabusortayo.
Parmekentayo ti pungtot wenno gura.
Punnuentayo ti puspusotayo iti ayat para iti amin nga annak ti Dios.
Tumulongtayonto a mangbendision kadagiti dadduma ken agserbitayo kadakuada—uray pay dagitay mabalin a“manglalais [kadatayo] ken mangidadanes [kadatayo] .”5
Ti Pudno a Disipulo
Ti maikatlo a kabsat a babai ti mangibagi iti pudno a disipulo ni Jesucristo. Adda inaramidna a maysa a banag a mabalin a narigat unay nga aramiden: nagtalek isuna iti Apo uray iti oras ti pananglalais ken panagrigrigat. No kaskasano a nagtalinaed isuna iti pammati ken namnama, iti laksid ti pananguy-uyaw ken panangkatkatawada iti lawlawna. Nagbiag a siraragsak saan a gapu ta naragsak ti kasasaadna ngem gapu ta isu ket naragsak.
Awan ti asino man kadatayo ti nagdaliasat iti biag a saan a nasuppiat. Addaan iti nakaad-adu a puersa nga aggandat a mangyaw-awan kadatayo iti dalan, kasano a makapagtalinaedtayo a nakatalimudok iti nagloriaan a ragsak a naikari kadagiti napuddno?
Mamatiak a masarakan ti sungbat iti maysa a tagainep iti maysa a propeta rinibribun a tawen ti napalabas. Lehi ti nagan ti propeta, ket nairekord ti tagtagainepna iti napateg ken nakaskasdaaw a Libro ni Mormon.
Iti tagtagainepna, nakita ni Lehi ti nalawa a kataltalonan, ket adda idiay ti nakaskasdaaw a kayo, a di kabaelan nga iladawan. Nakitana pay dagiti dadakkel a grupo dagiti tao a mapan nga agturong iti kayo. Kayatda a ramanan ti naimas a bunga daytoy. Nariknada ken nagtalekda a mangtedto daytoy iti naindaklan a ragsak ken manayon a talna.
Adda nailet a dalan nga agturong iti kayo, ket iti bangir adda landok a pagkaptan a nangtulong kadakuada nga agtalinaed iti dalan. Ngem adda pay angep ti kinasipnet a nangpalidem iti panagkitada iti dalan ken iti kayo. Ken nalabit a napegpeggad pay ti napigsa a panagkatkatawa ken pananglalais a naggapu iti dakkel ken nalawa a pasdek iti asideg. Ti makapakellaat, ti pananglalais ti nangkumbinsir iti sumagmamano a tao a nakadanonen iti kayo ken nakaramanen iti naimas a bunga tapno mabain ken umadayoda.6
Nalabit a nagduaduada a ti kayo ket talaga a kas iti kapintas ti impagaruptayo iti naminsan. Nalabit a nagduaduada iti kinapudno ti napadasanda.
Mabalin nga impagarupda a no tallikudanda ti kayo, ad-adda a nalaklaka ti panagbiag. Mabalin a saandanton a malais wenno makatawaan pay.
Ket kinapudnona, dagiti tao a manguy-uyaw kadakuada kasla dagiti tao a naragsak ken adda iti pagraragsakan. Isu a nalabit a no tallikudanda ti kayo, awaten ida ti kongregasion ti dakkel ken nalawa a pasdek ken mapalakpakanda iti pangngeddeng, kinasaririt, ken kinainlubonganda.
Agtalinaedkayo iti Dalan
Ay-ayatek a kakabsat, ay-ayatek a gagayyem, no marigatankayo a kumpet a nairut iti landok a pagkaptan ken magna a sitatalingenngen nga agturong iti pannakaisalakan; no agkedkedkayo gapu iti panagkatawa ken pananglais dagiti dadduma a kasla addaan panagtalek unay; no mariribukankayo kadagiti saludsod wenno doktrina a diyo pay maawatan; no mariknayo ti liday gapu kadagiti pannakaupay, allukoyenkayo a manglagip iti tagtagainep ni Lehi.
Agtalinaedkayo iti dalan!
Saankayo nga umibbet iti landok a pagkaptan—ti balikas ti Dios!
Ket no padasen ti asino man a pabainankayo iti pannakiranud iti ayat ti Dios, saanyo nga ikankano ida.
Saanyo iti kaano man liplipatan a dakayo ti anak ti Dios; agur-uray dagiti nawadwad a bendision; no masursuroyo nga aramiden ti pagayatanna, makipagnaedkayonto manen Kenkuana!7
Dagiti kari iti panagdaydayaw ken panangawat ti lubong ket saan a manamnama, saan a pudno, ken saan a makapakapnek. Dagiti kari ti Dios ket awan duadua, pudno, ken naragsak—ita ken iti kinaagnanayon.
Awisenkayo a mangibilang iti relihion ken pammati manipud iti nangatngato a pannirigan. Awan naidiaya iti dakkel ken nalawa a pasdek a maidasig iti bunga ti panagbiag iti ebanghelio ni Jesucristo.
Kinapudnona, “saan a nakita ti mata, ken saan a nangngeg ti lapayag, ken saan a simrek iti puso ti tao, dagiti bambanag nga insagana ti Dios kadagiti agayat kenkuana.”8
Nasursurok iti bagik a ti dalan ti kinadisipulo iti ebanghelio ni Jesucristo ket ti dalan nga agturong iti rag-o. Daytoy ti dalan nga agturong iti talged ken talna. Daytoy ti dalan nga agturong iti kinapudno.
Paneknekak a babaen ti sagut ken bileg ti Espiritu Santo, masursuroyo daytoy iti bagiyo.
Itatta, no agbalin a narigat kadakayo ti dalan, sapay ta makakitakayonto iti pagkamangan ken pigsa kadagiti nakaskasdaaw a timpuyogtayo iti Simbaan: ti Primary, Young Women, ken Relief Society. Dagitoy ket kasla paginanaan iti dalan, a pakapabaruanyo iti panagtalek ken pammatiyo para iti panagdaliasat iti masakbayan. Natalged a pagtaengan dagitoy, a pakariknaanyo a maibilangkayo ken umawatkayo iti pangpapigsa iti pakinakem manipud kadagiti kakabsatyo a babbai ken padayo a disipulo.
Dagiti banag a masursuroyo iti Primary ti mangisagana kadakayo para kadagiti nayon pay a kinapudno a masursuroyo iti young women. Ti dalan ti kinadisipulo a pagnaanyo kadagiti klaseyo iti Young Women ti mangiturong iti sinninged ken panagkikinnabsatan ti Relief Society. Iti tunggal addang iti dalan, maikkankayo kadagiti nayon a gundaway a mangipakita iti ayatyo kadagiti dadduma babaen ti panangipakita iti pammati, panangngaasi, panagayat iti pada a tao, saguday, ken panagserbi.
Ti panangpili iti daytoy a dalan ti kinadisipulo ket mangiturongto iti saan pay a naipalgak a kinaragsak ken pannakaragpat ti nadiosan a kababalin.
Saanto nga agbalin a nalaka daytoy. Agkasapulanto daytoy iti kasayaatan nga adda kadakayo—amin a kinasaririt,kinamanagpartuat, pammati, integridad, pigsa, determinasion, ken ayat. Ngem maysa nga aldaw taldiapenyonto dagiti panagkagumaanyo, ken ah, agyamankayonto gapu ta nagtalinaedkayo a natibker, a namatikayo, ket saankayo a nayaw-awan iti dalan.
Agtultuloykayo
Mabalin nga adu dagiti bambanag maipanggep iti biag a saanyo a mapengdan. Ngem iti udina, addaankayo iti bileg nga agpili iti agpada a pagtungpalan ken ti adu a padasyo bayat ti panagdaliasatyo. Dagiti piliyo saan unay a dagiti kadagiti ti agar-aramid iti pagdumaan iti biag.9
Diyo maipalubos a mangpaliday kadakayo dagiti pasamak.
Diyo maipalubos dagitoy a mangpapungtot kadakayo.
Mabalinyo ti agrag-o a dakayo ti anak a babai ti Dios. Makasarakkayo iti rag-o ken ragsak iti parabur ti Dios ken iti ayat ni Jesucristo.
Mabalinyo ti agragsak.
Allukoyenkayo a punnuenyo ti puspusoyo iti panagyaman iti nawadwad ken awan patinggana a kinaimbag ti Dios. Ay-ayatek a kakabsatko a babbai, maaramidyo daytoy! Ikararagko iti amin a panagayat ti kararuak nga agaramidkayto iti pangngeddeng nga agtultuloy nga agturong iti kayo ti biag. Ikararagko a pilienyonto nga ipigsa dagiti timekyo ket aramidenyo a nagloriaan a kanta ti panagdaydayaw ti biagyo, nga agrag-o iti maisangbay ti ayat ti Dios, dagiti kinadatdatlag nga inaramid ti Simbaanna, ken ti ebanghelio ni Jesucristo iti lubong.
Ti kanta ti pudno a kinadisipulo ket mabalin a sintunado wenno napigsa unay para iti dadduma. Manipud pay idi punganay ti panawen, kastoyen a talaga.
Ngem para iti Nailangitan nga Amatayo ken kadagiti agayat ken agdayaw Kenkuana, maysa daytoy a kapatgan ken napintas a kanta—ti kapintasan ken pangpasanto a kanta ti pangsubbot nga ayat ken panagserbi iti Dios ken kadagiti pada a tattao. 10
Ibatik kadakayo ti pammendisionko kas maysa nga Apostol ti Apo a masarakanyonto koma ti pigsa ken tured nga agbiag a naragsak kas anak ti Dios kabayatan ti naragsak a pannagnayo iti inaldaw iti nagloriaan a dalan ti kinadisipulo. Iti sagrado a nagan ni Jesucristo, amen.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Visiting Teaching Message, November 2017. Ilokano. 97931 864