Klumech er a First Presidency, Ongeteruich me a Ongerung el Buil 2017
Osiik er a Kristo sel Kurismas
Mla er a President Dieter F. Uchtdorf
Ongerung el Counselor er a First Presidency
Mo er tirkel sorir el mo medengei el kmo kede ua techang sel de chedal A Ikelesia ra Jesus Kristo ra Uriul-klebesei el Santo, eng soak el lodersii a uchelel a cheldecheduch lokiu a ikal keldei el tekoi: Ke dosiik er a Kristo.
Kede osiik el mesuub er Ngii. E oltirakl er Ngii. E mo uai Ngii.
Ng bekl el sils ra rekil a rrak, e kede osiik er Ngii. Engdi ng kmal tiakid el taem er a rak ra—Kurismas, sel doutkeu er a cherelel a betik er a rengud el Losebeled—a rengud a mengai el mo chemau Ngii.
Ma telkib er a urrered el loutkeu ra Kurismas, e me bo domes el kmo te milkerang tirkel mle kie ra telael rak ra memong sera le keltmokl el loutkeu er a cherelel a Osobel.
A re Mengkar a Sib
Ng diak el mui a klaudengei er kid el kirir tirkel mengkar a sib, engdi sel te “mle kie ra sers, el mengkar a chermir sel klebesei.”1 Tirkal mengkar a sib a locha di mle utsu el chad, el ua betok el metekoked el chad el blak a rengrir el mengisemuk a klengar er tir.
Ng sebecherir el ua rechad el, mle tara taem, el dimlak el blak a rengrir el losiik er a Kristo, engdi rengrir a milngodech ra babeluades ra lobok e a Kristo a mlosisechakl elmo er tir.
Tirkang tirkel tir, luriul ra rengesii a ngor ra rulmerek a klumech ra babeluades, a ulureched el mora Bethelehem el sorir elmo sioning.2
Rubak er a Ongos
Tirkel Rubak er a Ongos a mle ngarngii a skulir el mla mesuub er a tebedel Osobel, ngkel Ngelekel a Dios. Ngokiu a omesubir, e te miles a ikel lolangech el melutk el Kirel a cherelel. Sera leues ngil lolangch, e te tilobed ra keblirir e mirael el mora Jerusalem, e loker, “Ngar ker ngii el mla mechel el King ra re Udea?”3
A klemedengei er tir ra Kristo a diak eldi le blel lultuil ra skulir. Sera le ues a ikel lolangch er a cherelel, e te uluedikel. Te tilobed el mosiik er a Kristo.
Tirkel Rubak er a Ongos a kor tirkel losiik er a Kristo lokiu omesuub ma kamok ra ngarbab el skuul. Ng sel blak el reng el kirel a klemerang el mlo sebechel mekrolterir elmo metik er a Kristo e mengull er Ngii el King ra re kings, e Osebelir a rechad.4
Simeon ma Anna
A Simeon ma Anna a kor tirkel chad el losiik er a Kristo e lokiu a Reng. Tirkal mengasireng el chad a mle mesisiich el kristiano, me tulsengerengel e meluluuch e kie ra klengar e loltirakl e olengesenges, el mengiil el semeriar elmo mesa sel sils sel mei a Ngelekel a Dios.
Meng keldung, kle-ngariou el reng, ma klaumerang, e te meklou a rengrir el mengiil er a cherelel a Osobel.
Ma lorael mong, e a klaumerang er tir a mloterkokl ra Maria ma Joseph ra lochotii er tir a tolechoi el Ngii a tara klebesei eng moltekau a kengterir a rokui el chad.5
A Roumerang el ngara delongelir a re Nephites ma Lamanites
A dmolech el cheldecheduch el milkerang tirkel rulmerang ersel Beches el Beluu ra lomes a ikel lolangch er a cherelel a Osobel a de betik er a Babier ra Mormon.
Ke medengei el kmo tirkel mla rengii a klaumerang er tir ra Kristo a mlo tuub e mokcharm. A re mle dmolech a klaudengei er tir ra tekingel a beluulechad ersel taem a ultelchakl ra roumerang el lurekodel er a klebelung el cheleblad el tekoi. E a klemerang, tirkel dimlak el loumerang a mlo emolt e lomtelub me te milchelii a “klou el cherodech” er a beluu. (3 Nephi 1:7). Te uleltuub er tirkel tir a ulumerang el kmo a Osobel a mo mechell.
A ngesechel a rengrir ma kelbsengel a rengrir a mlo uldingerongel me te milchilterial elmo mutek a ngerir el diak e lluut el mesaod a roumerang er a Osobel. A Babier ra Mormon a olecholt er seikid el tokubets el meirei. 6
Tirkal loumerang el mle ngar er tial taem a tirkel lomtechei ra rusiik er a Kristo el dirrek el ngarngii a lucherechur er tir, omtelub, ma lultuub er tir. Te osiik er a Kristo molmuut sel le ngarngii a re mengitikaik el mengeuid er tir le leko tolngesonges, utsu, malechub e te ongebelung.
Engdi a ikel etirir a rebebil a diak el bol le chiteterir a meral loumerang e losiik er a Kristo.
Kede Osiik er a Kristo
Tial rak, e tokuni tial temel a Kurismas, eng mo ungil kired a ta el deluut el doker ersel ker “Ngak a mekerang a kusiik er a Kristo?”
A tara mle meringel taem ra klengar er ngii, e a mesisiich el King David a miluches el kmo, “Kau el Dios, kau a Dios er ngak; engdi kot e a kusiik er kau: ng delbengek el losiik er kau, ng bedengek el lultuil er kau.”7
Ng locha tiakid el blekerdelel el losiik er a Dios meng tara uchul e a David a losaod er ngii el chad e loltirakl er a rengul a Dios.8
Chelechal temel a Kurismas molmuut ra rekil tial rak, e bo dolchoud loba rengud er a Osobel, ngkel Liltetel a Budech, ngkel Imol Chedaol ra Israel. Ngokiu tial lurunguled, e klou er ngii, a meketeklii el diak eldi de chedal a Ikelesia ra Jesus Kristo ra Uriul-klebesei el Santo engdi ng meketeklii el kmo kede ua techang el mesiungel a Kristo.
© 2017 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/17. Kengei er a oidel: 6/17. Oidel a First Presidency Message, December 2017. Palauan. 97932 881