Fas Presidensi Mesej, Jenuware 2018
Presen we i fasin blong sakem Sin
I Kam long Presiden Thomas S. Monson
“Hem i responsabiliti blong yumi blong kamaot long fasin blong mekem wok hafhaf mo girap i go long fasin blong mekem wok we i fulwan, blong kamaot long fasin blong no wok stret mo girap i go long fasin blong finisim gud wok,” Presiden Monson i tijim. “Hem i wok blong yumi, blong yumi kam gud moa. Wan long ol bigfala presen we God i givim long yumi, hem i glad ia blong save traem bakegen, from se fasin blong no wok stret i save gat en blong hem.”1
Long stat blong wan niu yia yumi mekem ol gol mo mekem ol niu desisen wetem wan strong tingting. Yumi disaed wetem wan strong tingting blong save kam antap, jenis, mo blong traem bakegen. Mebi impoten wei blong yumi traem bakegen, hem i blong yusum wanem Presiden Monson i singaotem “presen ia we i blong sakem sin.”2
Long sam long ol tijing blong hem sta long taem we hem i kam Presiden blong jos, Presiden Monson i givim kaonsel long yumi blong, “yusum blad blong Kraes we i pem praes from yumi blong mekem se yumi save kasem fogivnes from ol sin blong yumi, mo blong mekem se hat blong yumi i save kam klin evriwan.”3
Merikel blong Fasin blong Fogiv
“Yumi evriwan i mekem ol joes we oli no stret. Sapos yumi no stretem ol joes ia yet, mi save talem stret long yu se i gat rod blong kambak. Rod ia, oli singaotem fasin blong sakem sin. Mi plis long yufala blong stretem ol mistek blong yufala. Sevya blong yumi i ded blong hem i save givim long yu mo mi, tabu presen ia. Nomata se rod ia i no isi, promes blong hem i tru i stap: ‘Nating we ol sin blong yufala i mekem yufala i doti gud, be bambae mi mekem we yufala i klin we i klin.’[Aesea 1:18]. ‘mo bae mi nomo tingbaot olgeta’ D&C 58:42]. No putum laef blong yu we i no save finis long denja. Sapos yu bin mekem sin, moa eli yu mekem rod blong yu blong kambak, moa bae yu save filim swit pis mo glad we i kam long merikel blong fasin blong fogiv.”4
Kambak long Rod
“Nomata i wan mas blong yumi jusum samting wetem waes, i gat taem we bae yumi mekem ol krangke joes. Presen ia we i fasin blong sakem sin, we Sevya i givim, i save mekem yumi stretem ol rod blong yumi, blong yumi save gobak long rod ia we i lidim yumi long selestial glori we yumi stap lukaotem.”5
Rod blong Kambak
“Sapos eniwan long yufala i foldaon long rod blong hem, mi save talem stret long yu se i gat rod blong kambak. Rod ia, oli singaotem fasin blong sakem sin. Nating rod i had, fasin blong sevem yuwan blong taem we i no save finis i dipen long rod ia. ?Wanem i moa gud blong yu traehad from? Mi plis long yufala blong jusum long ples ia mo naoia, blong tekem ol step we i nid blong sakem sin fulwan. Moa eli yu mekem, moa bae yu save filim pis mo kwaet fasin mo tras we Aesea i tokbaot. [luk long Aesea 1:18].”6
Ol Man Oli Save Jenis
“Yumi mas tingbaot se ol man oli save jenis. Oli save lego ol rabis fasin blong olgeta. Oli save sakem sin taem oli brekem loa. Oli save kam klin inaf blong holem prishud. Oli save mekem wok blong Lod wetem strong tingting.”7
Kam Klin Bakegen
“Sapos i gat wan samting we i no stret long laef blong yu, yu gat wan rod i stap blong yu save winim. Stopem eni samting we i no stret mo i nogud Toktok long Bisop blong yu. Wanem problem yu fesem, yu save wokemaot tru long stret fasin blong sakem sin. Yu save kam klin long sin bakegen.”8
Fas Wok blong Sevya
“Wan we i nid blong stap insaed long plan ia [blong fasin blong sevem man], hem i Sevya blong yumi, Jisas Kraes. Sapos i no gat sakrifaes blong Hem we i pem praes, evri samting bae i lus. Be, hem i no inaf blong stap biliv nating long Hem mo misin blong Hem. Yumi nid blong wok mo lanem samting, lukaotem mo prea, sakem sin mo kam gud moa. Yumi nidim blong save ol loa blong God mo laef folem olgeta. Yumi nid blong kasem ol odinens blong Hem we i sevem man. Taem yumi mekem olsem nomo, bae yumi kasem tru hapines we i no save finis.”9
© 2018 i kam long Intellectual Reserve, Inc. Oli holem evri raet. Oli printim long YSA. Oli letem long Inglis lanwis: 6/17 Oli letem translesen: 6/17 Translesen blong First Presidency Message, January 2018. Bislama.97929 852