Mensahe ti Umuna a Panguluen, Enero 2018
Ti Sagut ti Panagbabawi
Ni Presidente Thomas S. Monson
“Pagrebbengantayo ti dumur-as manipud iti kabaelan agingga iti paglaingan, manipud iti pannakapaay agingga iti panagballigi,” insuro ni Presidente Thomas S. Monson. “Pagrebbengantayo ti agbalin a kasayaatan iti bagitayo. Maysa kadagiti kaindaklanan a sagut ti Dios kadatayo ti rag-o ti panangpadas manen a manggun-od iti maysa a banag, gapu ta saan a pinal ti pannakapaay.”1
Masansan a maidanggaytayo iti pangrugian ti baro a tawen nga addaan kadagiti resolusion ken panggep a tun-oyen. Ikeddengtayo ti sumayaat, agbalbaliw, ken mangpadas manen. Nalabit a ti kapatgan a wagas a pakapadasantayo manen ket ti panangawat ken panangusar iti inawagan ni Presidente Monson iti “ti sagut ti panagbabawi.”2
Kadagiti sumaganad nga adaw manipud kadagiti pannursurona manipud pay idi nagbalin a Presidente ti Simbaan, binalakadannatayo ni Presidente Monson nga “aramaten ti manangsubbot a dara ni Cristo tapno magun-tayo ti pannakapakawan dagiti basbasoltayo, ket maugasan dagiti puspusotayo.”3
Ti Milagro ti Pannakapakawan
“Nakaaramidtayo amin kadagiti saan nga umno a pili. No ditayo pay naatur dagiti kasta a pili, ipanamnamak kadakayo nga adda maysa a wagas iti panangaramid iti daytoy. Maawagan iti panagbabawi ti proseso. Ipakaasik kadakayo nga aturenyo dagiti biddutyo. Natay ti Mangisalakantayo tapno ipaayannatayo iti dayta a naparaburan a sagut. Nupay saan a nalaka ti dalan, pudno ti kari: ‘Uray no dagiti basbasoltayo kasda la koma iti escarlata, mapapudawdanto a kasla iti nieve’ [Isaias 1:18]. ‘Ket siak, ti Apo, diakto idan malagip’ [DkK 58:42]. Saanyo nga ipapeggad ti agnanayon a biagyo. No nagbasolkayo, nasapsapa a mairugiyo ti agsubli iti dalan, nasapsapa met a masarakanyonto ti nasam-it a kappia ken rag-o a buyogan ti milagro ti pannakapakawan.”4
Panagsubli iti Dana
Nupay kasapulan a nainsiriban ti panagpilitayo, adda dagiti gundaway nga agbidduttayto kadagiti minamaag a panagpilitayo. Ti sagut ti panagbabawi, nga impaay ti Mangisalakantayo ti mangpabael kadatayo a mangatur kadagiti turongentayo iti biag, tapno makasublitayo iti dana a mangiturongto kadatayo iti celestial a gloria a kalkalikagumantayo.”5
Ti Dalan nga Agsubli
“No asino man kadakayo ti naitublak iti panagdaliasatna, ipanamnamak kadakayo nga adda dalan nga agsubli. Maawagan iti panagbabawi ti proseso. Nupay narigat ti dana, agpannuray ditoy ti agnanayon a pannakaisalakanyo. Ania ti ad-adda pay a maikari kadagiti panangikarigatanyo? Ipakpakaasik kadakayo nga ikeddengyo ditoy ken itan ti mangala kadagiti addang a kasapulan iti naan-anay a panagbabawi. Ti nasapsapa a panangaramidyo iti kastoy, nasapsapa met a kabaelanyonto a sagrapen ti kappia ken ti talinaay ken ti kinatalged nga insao ni Isaias [kitaen iti Isaias 1:18].”6
Makapagbalbaliw dagiti Tao
“Nasken a laglagipentayo a makapagbalbaliw dagiti tao. Maikkatda dagiti dakes nga ugalida. Makapagbabawida kadagiti basbasolda. Mabalin a maikarida a mangikut iti priesthood. Ken makapagserbida a sipapasnek iti Apo.”7
Agbalin a Nadalus Manen
“No adda ania man a biddut iti biagyo, adda maysa a wagas a pangparmekanyo iti daytoy. Isardengyo ti ania man a saan a kinalinteg. Kasaritayo ti bishopyo. Ania man ti problema, marisut daytoy babaen ti umno a panagbabawi. Makapagbalinkayo a nadalus manen.”8
Ti Kangrunaan nga Akem ti Mangisalakan
“Ti kasapulan iti plano [ti pannakaisalakan] ket ti Mangisalakantayo a ni Jesucristo. No awan koma ti pangbayad-basol a sakripisiona, mapukaw ti amin. Nupay kasta, saan nga umdas, no basta mamatitayo laeng Kenkuana ken iti misionna. Nasken nga agbannog ken agsursurotayo, agsukisok ken agkararagtayo, agbabawi ken agsingsingpettayo. Nasken nga ammuentayo dagiti linteg ti Dios ket agtungpaltayo kadagitoy. Nasken nga umawattayo kadagiti pangisalakan nga ordinansana. Iti laeng panangaramid iti daytoy ti pakagun-odantayo iti pudno, agnanayon a ragsak.”9
© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti First Presidency Message, January 2018. Ilokano. 15045 864