Mensahe iti Visiting Teaching, Enero 2018
Makikontak Kenkuana iti Ania man nga Oras, Sadino man a Lugar, ken Ania man a Dalan
Ti visiting teaching ket maipapan ti panagministro. Nagministro ni Jesus iti ania man nga oras ken iti sadino man a lugar. Maaramidtayo met ti kastoy.
Ti “agministro” ket mangted iti serbisio, panangaywan, wenno tulong a mangipaay iti liwliwa wenno ragsak iti sabali. Ti visiting teaching ket maipapan ti panangtakuat kadagiti wagas iti panagministro kadagiti sarungkarantayo. Nagministro ni Jesucristo iti amin—iti ania man nga oras ken iti sadino man a lugar. Pinakanna dagiti 5,000, liniwliwana da Maria ken Marta iti ipupusay ti kabsatda a lalaki, ken insurona ti ebangheliona iti babai iti abay ti bubon. Inaramidna daytoy gapu iti napudno nga ayatna.
Iti panangsurot iti pagwadanna, kas visiting teacher maam-ammotayo ken maipategtayo ti tunggal kabsat a babai a sarungkarantayo, a pampanunotentayo dayta nga ayat ti pundasion ti amin nga ar-aramidentayo. No agkararagtayo para iti inspirasion a mangammo no kasano ti agserbi kenkuana ken tumulong kenkuana a mangpapigsa iti pammatina, “saan a mapengdan dagiti anghel iti panagbalinda akadkaduatayo.”1
Manipud pay idi nabuangay ti Relief Society idi 1842 agingga ita, ti panagministro kadagiti babbai ket nangparabur kadagiti biag. Kas pagarigan, ni Joan Johnson, balo nga agtawen iti 82, ken ti visiting teaching companionna ket simmarungkarda a nangisuro iti kaarrubada nga agtawen iti 89 ken adda pneumoniana. Nakitada a saan laeng a kasapulan ida ti kaarrubada iti maminsan ti makabulan, isu a rinugianda ti nangsarungkar kenkuana iti linawas iti personal wenno babaen ti telepono.
Para iti dadduma pay a visiting teacher, ti panangipatulod iti teks wenno email a mangted iti pammaregta ket mabalin a kapintasan a banag nga aramiden para iti kabsat a babai dayta a bulan. Ti panangbukel kadagiti personal a pannakilangen ken idedengngeg nga addaan iti galad ti ayat ket ti pudno a kaipapanan ti visiting teaching. Ti moderno a teknolohia ken ti personal nga isasarungkar ket makatulong kadatayo a mangaramid iti daytoy iti ania man nga oras, sadino man a lugar, ken iti adu a wagas.2 Dayta ti panagministro kas iti inaramid ni Jesus.
© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Visiting Teaching Principles, January 2018. Ilokano. 15045 864