Etop eke First Presidency, eke Akpa Ofiong ke isua 2018
Eno Editua-mkpofiok
Emi otode President Thomas S. Monson
President Monson ekekpeb ete ke, “Ubiongutom nnyin edi ndikpong didie-didie nkpo nkesim ukeme, ndikpong iduo nkesim ndinam ofon.” “Ubiong nnyin edi ndikabare ndi ata nti ke idem nnyin.” Kiet kotu ikpo eno emi Abasi onode nnyin edi ndidara mfiak nam ofon, koro iduo ndomokiet inaha nte edi utit.”1
Nnyin imesiwak ndida editongo obufa isua ndiana ye ubiere ye uduak. Nnyin imebiere ndinam ofon, ndikpuho, ndifiak nam ofon. Ndusuk ata akpan usung ke nnyin ndifiak nam edi ndinam se President Monson okotde “eno editua mkpofiok.”2
Ke mme eteting iko emi otode ukpebnkpo esie tongo nte enye ekedi Adaibuot eke Ufok Abasi, President Monson eteme nnyin ete “ ida iyip uwa ufak Christ inam nkpo man nnyin ikpebo edifen-nno nnyung nam esit nnyin asana.”3
Utibe-nkpo eke Edifen-nno
“Kpukpru nnyin imenam mbumek eke mifonke. Edieke nnyin mikenamke oruk mbumek oro ofon kanga, ami nsongo nno mbufo nte ke usung odu ke ndinam oro. Ekot usung oro editua mkpofiok. Ami mmebenge mbufo nte yak enehede ndudue mbufo. Andinyanga nnyin akakpa man ono mbufo ye ami eno edidiong oro. Okposuk nte usung oro mimemke, enwongo oro edi akpaniko ete: ‘Mme idiok ido mbufo ekpetie nte iduot, eyefia nte snow’ [Isaiah 1:18]. ‘Ndien Ami, Jehovah nditige mmo aba’ [D&C 58:42]. Ekusin uwem nsinsi mbufo ke nkpo ndik. Edieke edide ke mbufo ema enam idiok ido, nte mbufo esopde nditongo mfiak nam ofon, mbufo eyesop ndikut inem emem ye idara emi asangade ye utibe-nkpo eke edifen-nno.”4
Efiak eka Usung oro
Okposuk edi nkpo ke edi akpan-akpan nnyin ndimek eti, odu mme iniemi nnyin isimekde idiok mbumek. Eno editua-mkpofiok, emi Andinyanga nnyin onode, anam nnyin inehede usung nnyin, man nnyin ifiak inyong usung emi edidade nnyin ika obio-ubong Abasi emi nnyin iyomde.”5
Usung Ndifiak nnyong Ufok
“Edieke odude owo mbufo emi okoduode ke usung isang esie, ami nsongo nno mbufo nte ke odu usung ndifiak nnyong ufok. Ekot usung oro editua mkpofiok. Okposuk nte usung osongde, nsinsi erinyanga mbufo okongo do. Nso nkpo okpofon odot ke ukeme mbufo? Ami mbenge mbufo nte ebiere mi ye idahaemi ndinam nkpo eke odotde man etua mkpofiok ofon. Nte mbufo esopde ndinam oro, mbufo eyesop ndikeme ndinyene emem ye ifure-esit ye osongo emi Isaiah eketingde abanga [kese Isaiah 1:18].”6
Mme Owo Ekeme Ndikpuho
Nnyin inyene ndifiok ke esit nnyin ete ke owo ekeme ndikpuho. Mmo ekeme ndisiongo idem mmo mkpong mme idiok ndumehe. Mmo ekeme nditua nkpofiok ke mme ndudue mmo. Mmo edot ndikama itie oku. Mmo ekeme ndinam utom nno Abasi ke ofuri esit.”7
Efiak Ekabare Esana
“Edieke nkpo ndomokiet odude emi misangake ofon ke uwem mbufo, usung odu ono mbufo ke ndinam ofon. Etre ukwang ido ekededi. Enyene nneme ye bishop mbufo. Ke suto mfina ekpededi, ekeme ndinam oro okure oto ke ata editua mkpofiok. Mbufo emekeme ndifiak nsana inikiet efen.”8
Akpan Ubiongutom eke Andinyanga
“Andinyanga nnyin, Jesus Christ edi akpan-nkpo ke uduak [erinyanga] emi. Ke uwa ufak Esie miduhe, kpukpru owo ekpetak Nte ededi, ikemke, ke ndinim Enye ye utom Esie ke akpaniko. Nnyin inyene ndisin-ifik nnyung mkpeb-nkpo, idungo inyung ibong-akam, ikabare-esit inyung inam-ofon. Nnyin inyene ndidiongo mbet Abasi inyung inam mmo. Nnyin inyene ndibo mme edinam erinyanga Esie. Ke edi-nam ntre kpot ke nnyin idinyene ata eti, nsinsi inemesit.”9
© 2018 otode Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Iko Mbakara: 6/17. Enyimme Ndikabare: 6/17 Ndikabare Etop eke First Presidency Message, January 2018. Efik 15045 553