ຂ່າວສານຈາກຝ່າຍປະທານສູງສຸດ, ເດືອນມັງກອນ 2018
ຂອງປະທານແຫ່ງການກັບໃຈ
“ໜ້າທີ່ຮັບຜິດຊອບຂອງເຮົາຄືທີ່ຈະຍົກລະດັບຈາກຄຸນນະພາບທີ່ປານກາງ ໄປສູ່ລະດັບຄວາມຊຳນານ, ຈາກຄວາມລົ້ມເຫລວ ໄປສູ່ຄວາມສຳເລັດຜົນ,” ປະທານທອມມັສ ແອັສ ມອນສັນ ໄດ້ສອນ. “ໜ້າທີ່ຂອງເຮົາຄືທີ່ຈະກາຍເປັນຄົນດີທີ່ສຸດ. ຂອງປະທານທີ່ຍິ່ງໃຫຍ່ຢ່າງໜຶ່ງຂອງພຣະເຈົ້າສຳລັບເຮົາ ຄືຄວາມສຸກຂອງການລອງເຮັດອີກ, ເພາະຄວາມລົ້ມເຫລວບໍ່ໄດ້ເປັນສິ່ງທີ່ປ່ຽນແປງບໍ່ໄດ້.”1
ສ່ວນຫລາຍແລ້ວ ເຮົາມັກຈະພົວພັນການມາເຖິງຂອງປີໃໝ່ ກັບການຕັດສິນໃຈຢ່າງແນ່ວແນ່ ແລະ ກັບເປົ້າໝາຍ. ເຮົາຕັດສິນໃຈທີ່ຈະພັດທະນາ, ທີ່ຈະປ່ຽນ, ທີ່ຈະພະຍາຍາມຄືນອີກ. ບາງທີ ວິທີທີ່ສຳຄັນທີ່ສຸດ ທີ່ເຮົາສາມາດພະຍາຍາມຄືນອີກ ແມ່ນໂດຍການຮັບເອົາສິ່ງທີ່ປະທານມອນສັນເອີ້ນວ່າ “ຂອງປະທານແຫ່ງການກັບໃຈ.”2
ໃນຂໍ້ຄວາມດັ່ງຕໍ່ໄປນີ້ ທີ່ຄັດເລືອກເອົາມາຈາກຄຳສອນຂອງເພິ່ນ ນັບຕັ້ງແຕ່ເພິ່ນໄດ້ກາຍເປັນປະທານຂອງສາດສະໜາຈັກ, ປະທານມອນສັນ ແນະນຳເຮົາໃຫ້ “ນຳໃຊ້ໂລຫິດທີ່ຊົດໃຊ້ຂອງພຣະຄຣິດ ເພື່ອວ່າເຮົາຈະສາມາດໄດ້ຮັບການໃຫ້ອະໄພສຳລັບບາບຂອງເຮົາ, ແລະ ເພື່ອວ່າໃຈຂອງເຮົາຈະຖືກເຮັດໃຫ້ບໍລິສຸດ.”3
ການມະຫັດສະຈັນຂອງການໃຫ້ອະໄພ
“ເຮົາທຸກຄົນກໍເຄີຍເຮັດຄວາມຜິດ. ຖ້າເຮົາບໍ່ໄດ້ດັດແປງການເລືອກເຫລົ່ານັ້ນເທື່ອ, ຂ້າພະເຈົ້າຂໍໃຫ້ທ່ານແນ່ໃຈໄດ້ວ່າ ມັນມີທາງຢູ່. ຂັ້ນຕອນນັ້ນເອີ້ນວ່າ ການກັບໃຈ. ຂ້າພະເຈົ້າຂໍອ້ອນວອນໃຫ້ທ່ານດັດແປງຄວາມຜິດຂອງທ່ານ. ພຣະຜູ້ຊ່ວຍໃຫ້ລອດຂອງເຮົາໄດ້ສິ້ນພຣະຊົນ ເພື່ອວ່າທ່ານ ແລະ ຂ້າພະເຈົ້າຈະໄດ້ຮັບພອນນັ້ນ. ເຖິງແມ່ນເສັ້ນທາງຈະຫຍຸ້ງຍາກ, ແຕ່ຄຳສັນຍານັ້ນຈິງແທ້ ທີ່ວ່າ: ‘ເຖິງແມ່ນບາບຂອງພວກເຈົ້ານັ້ນເປັນສີແດງເຂັ້ມ ແຕ່ເຮົາກໍຈະຊຳລະໃຫ້ມັນຂາວສະອາດດັ່ງຫິມະ’ [ເອຊາຢາ 1:18]. ແລະ ພຣະຜູ້ເປັນເຈົ້າຈະບໍ່ຈື່ຈຳມັນອີກຕໍ່ໄປ [ເບິ່ງ D&C 58:42]. ຢ່າປ່ອຍໃຫ້ຊີວິດນິລັນດອນຂອງທ່ານຕົກຢູ່ໃນຂັ້ນອັນຕະລາຍ. ຖ້າທ່ານໄດ້ເຮັດບາບ, ເມື່ອທ່ານໄດ້ຫວນກັບຄືນມາໄວເທົ່າໃດ, ທ່ານຈະພົບຄວາມສຸກ ແລະ ຄວາມຊື່ນຊົມໄວເທົ່ານັ້ນ ຊຶ່ງມານຳຄວາມມະຫັດສະຈັນຂອງການໃຫ້ອະໄພ.”4
ກັບຄືນສູ່ເສັ້ນທາງ
“ເຖິງແມ່ນເປັນສິ່ງຈຳເປັນທີ່ສຸດ ທີ່ເຮົາຕ້ອງເລືອກຢ່າງສະຫລາດ, ແຕ່ບາງເທື່ອ ເຮົາຈະເຫັນວ່າ ເຮົາໄດ້ເລືອກຢ່າງໂງ່ຈ້າ. ຂອງປະທານແຫ່ງການກັບໃຈ, ຊຶ່ງພຣະຜູ້ຊ່ວຍໃຫ້ລອດໄດ້ຈັດຕຽມໄວ້, ສາມາດຊ່ວຍເຮົາໃຫ້ດັດແປງຊີວິດຂອງເຮົາໄດ້, ເພື່ອເຮົາຈະສາມາດກັບຄືນສູ່ເສັ້ນທາງ ທີ່ຈະພາເຮົາໄປສູ່ລັດສະໝີພາບແຫ່ງຊັ້ນສູງ ທີ່ເຮົາສະແຫວງຫານັ້ນ.”5
ທາງກັບຄືນ
“ຖ້າຫາກຄົນໃດໃນພວກທ່ານມີບັນຫາກ່ຽວກັບສິ່ງເຫລົ່ານີ້, ຂ້າພະເຈົ້າແນ່ໃຈວ່າ ມີທາງໜີອອກມາໄດ້. ຂັ້ນຕອນນັ້ນເອີ້ນວ່າ ການກັບໃຈ. ເຖິງແມ່ນມັນຈະເປັນສິ່ງຍາກ, ແຕ່ຄວາມລອດນິລັນດອນຂອງທ່ານ ຂຶ້ນຢູ່ກັບການກັບໃຈນີ້. ມີສິ່ງໃດແດ່ທີ່ທ່ານເຮັດໄດ້ ທີ່ດີໄປກວ່ານີ້? ຂ້າພະເຈົ້າອ້ອນວອນທ່ານ ໃຫ້ພິຈາລະນາໃນເວລານີ້ ທີ່ຈະໃຊ້ຂັ້ນຕອນອັນຈຳເປັນ ເພື່ອຈະໄດ້ກັບໃຈຢ່າງສົມບູນ. ເມື່ອທ່ານເຮັດໄວຂຶ້ນເທົ່າໃດ, ທ່ານກໍຈະຮູ້ສຶກເຖິງຄວາມສະຫງົບງຽບ ແລະ ຄຳສັນຍາທີ່ເອຊາຢາ ໄດ້ກ່າວເຖິງໄວຂຶ້ນເທົ່ານັ້ນ [ເບິ່ງ ເອຊາຢາ 1:18].”6
ຜູ້ຄົນສາມາດປ່ຽນໄດ້
“ເຮົາຕ້ອງຄິດວ່າ ຜູ້ຄົນສາມາດປ່ຽນໄດ້. ເຂົາເຈົ້າສາມາດຖິ້ມໃຈເກົ່າ. ເຂົາເຈົ້າສາມາດກັບໃຈຈາກການລ່ວງລະເມີດ. ເຂົາເຈົ້າສາມາດດຳລົງຖານະປະໂລຫິດຢ່າງມີຄ່າຄວນ. ແລະ ເຂົາເຈົ້າສາມາດຮັບໃຊ້ພຣະຜູ້ເປັນເຈົ້າຢ່າງພາກພຽນ.”7
ກາຍເປັນຄົນສະອາດຄືນອີກ
“ຖ້າຫາກມີສິ່ງໃດທີ່ບໍ່ຖືກຕ້ອງໃນຊີວິດຂອງທ່ານ, ມັນມີທາງອອກສຳລັບທ່ານຢູ່. ໃຫ້ເຊົາເຮັດສິ່ງໃດກໍຕາມທີ່ບໍ່ຊອບທຳ. ໃຫ້ເວົ້າລົມກັບອະທິການຂອງທ່ານ. ບໍ່ວ່າຈະເປັນບັນຫາໃດກໍຕາມ, ມັນສາມາດແກ້ໄຂໄດ້ ຜ່ານການກັບໃຈທີ່ຖືກຕ້ອງ. ທ່ານສາມາດກາຍເປັນຄົນສະອາດຄືນອີກ.”8
ບົດບາດທີ່ສຳຄັນຂອງພຣະຜູ້ຊ່ວຍໃຫ້ລອດ
“ສິ່ງສຳຄັນຕໍ່ແຜນ [ແຫ່ງຄວາມລອດ] ແມ່ນພຣະຜູ້ຊ່ວຍໃຫ້ລອດ, ພຣະເຢຊູຄຣິດ. ປາດສະຈາກການເສຍສະລະຊົດໃຊ້ຂອງພຣະອົງ, ເຮົາທຸກຄົນຈະຫລົງທາງໄປ. ເຖິງຢ່າງໃດກໍຕາມ, ການພຽງແຕ່ເຊື່ອໃນພຣະອົງ ແລະ ເຊື່ອໃນພາລະກິດຂອງພຣະອົງເທົ່ານັ້ນ ແມ່ນບໍ່ພຽງພໍ. ເຮົາຕ້ອງໃຊ້ຄວາມພະຍາຍາມ ແລະ ຮຽນຮູ້, ສະແຫວງຫາ ແລະ ອະທິຖານ, ກັບໃຈ ແລະ ພັດທະນາຕົນ. ເຮົາຕ້ອງຮູ້ຈັກກົດຂອງພຣະເຈົ້າ ແລະ ດຳລົງຊີວິດຕາມນັ້ນ. ເຮົາຕ້ອງໄດ້ຮັບພິທີການຊ່ວຍໃຫ້ລອດຂອງພຣະອົງ. ພຽງແຕ່ໂດຍການເຮັດຕາມດັ່ງທີ່ກ່າວມານີ້ ເຮົາຈຶ່ງຈະໄດ້ຮັບຄວາມສຸກນິລັນດອນ ທີ່ແທ້ຈິງ.”9
© 2018 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ First Presidency Message, January 2018. Laotian. 15045 331