Fas Presidensi Mesej, Febwari 2018
Tingbaot Hem Oltaem
I Kam long Presiden Henry B. Eyring
Fas Kaonsela long Fas Presidensi
?Yu save pikjarem, wetem mi, profet Moronae we i stap raetem ol las toktok blong Buk blong Momon long ol buk we oli wokem long gol? Hem i bin stap hemwan. Hem i bin luk nesen blong hem, pipol blong hem, mo famli blong hem i foldaon. Graon ia i olsem “wan raon” blong wo we i gohed (Momon 8:8). !Be yet, hem i bin gat hop, from se hem i bin luk taem blong yumi! Mo i gat plante samting we hem i bin save raetem, be hem i invaetem yumi blong tingbaot samting (luk long Moronae 10:3).
Presiden Spencer W. Kimball (1895–1985) i stap laekem blong tijim se toktok we i moa impoten long diksonari, hem i tingbaot. From se yumi bin mekem ol kavenan wetem God, hem i talem: “nid blong yumi we i moa bigwan long ol narawan, hem i blong yumi tingbaot” olgeta kavenan ia.1
Yu save faenem toktok ia, tingbaot, truaot long ol skripja. Taem Nifae i tok strong long ol brata blong hem, plante taem hem i stap invaetem olgeta blong oli tingbaot ol toktok blong Lod mo blong tingbaot olsem wanem God i bin sevem ol bubu blong olgeta (luk long 1 Nifae 15:11, 25; 17:40).
Long las toktok blong hem blong talem tata, King Benjamin i yusum toktok ia, tingbaot, seven taem. Hem i bin hop se bae ol pipol blong hem bae oli tingbaot “gudfala fasin blong God … mo God i gudwan tumas, mo se Hem i gat longfala tingting” long olgeta (Mosaea 4:11; luk tu long 2:41; 4:28, 30; 5:11–12).
Taem Sevya i statem sakramen, Hem i bin invaetem ol disaepol blong Hem blong tekem ol saen ia “blong tingbaot” sakrifaes blong Hem (Luk 22:19). Long evri prea blong sakramen, yu mo mi i harem toktok ia, oltaem we i kam fastaem long toktok ia, tingbaot (luk long D&C 20:77, 79).
Mesej blong mi i wan invitesen, olsem wan samting we mi plis blong yufala i tingbaot. Hemia trifala tingting long wanem yu save stap tingbaot evri wik taem yu tekem ol tabu saen blong sakramen. Mi hop se ol tingting ia oli givhan long yu olsem we oli bin givhan long mi.
Tingbaot Jisas Kraes.
Faswan, tingbaot Sevya. Tingbaot se Hem i huia taem Hem i bin stap long wol, olsem wanem Hem i toktok long ol narawan, mo olsem wanem Hem i bin soem se Hem i wan man we i kaen tru long ol wok blong Hem. Tingbaot huia nao Hem i spendem taem wetem, mo wanem nao Hem i bin tijim. Sevya “i go mo mekem ol gudfala wok” (Ol Wok 10:38). Hem i bin visitim ol sikman. Hem i bin gat strong tingting blong mekem tingting blong Papa blong Hem.
Antap long evri samting, yumi save tingbaot bigfala praes we Hem i bin pem, from Hem i lavem yumi tumas, blong save tekemaot ol mak blong sin blong yumi. Taem yumi stap tingbaot Hem, bambae yumi wantem moa blong folem Hem. Bambae yumi wantem blong stap kaen moa, blong fogiv moa, mo blong wantem moa blong lukaotem tingting blong God mo mekem.
Tingbaot Wanem Nao Yu Nid blong Mekem I Gud Moa
Hem i had blong tingting long Sevya—olsem wanem Hem i klin gud mo i stret evriwan—mo semtaem tingting long olsem wanem nao, yumi, yumi slak tumas mo yumi no stret evriwan sapos yumi komperem yumi long Hem. Yumi bin mekem ol kavenan blong obei long ol komanmen blong Hem, be yet, fulap taem, yumi no naf blong kasem hae standet ia. Be Sevya i bin save se hemia bae i hapen, mo from hemia nao Hem i bin givim odinens blong sakramen.
Sakramen i gat rus blong hem i stap long OlTesteman taem, taem we oli stap praktisim fasin blong givim ol sakrifaes, mo tu, fasin blong stap konfes long ol sin (luk long Levitikas 5:5). Yumi nomo stap sakrifaesem ol animol, be yumi save lego ol sin blong yumi. Ol skripja oli singaotem sakrifaes ia, i wan sakrifaes we yu givim “wan hat we i sore mo wan spirit we i wantem sakem sin” (3 Nifae 9:20). Kam long sakramen wetem wan hat we i wantem sakem sin (luk long D&C 59:12; Moronae 6:2). Mo taem yu mekem olsem, bambae yu kasem fogivnes blong ol sin, mo bambae yu no save go aotsaed long rod ia we i stap lidim yu i gobak long God.
Tingbaot Progres Ia we Yu Stap Mekem
Taem yu stap luklukgud long laef blong yu long taem blong odinens blong sakramen, mi hop se ol tingting blong yu oli no lukluk nomo long ol samting we yu mekem i rong, be tu, yu lukluk long ol samting we yu mekem i raet—ol taem ia we yu bin filim se Papa long Heven mo Sevya, Tufala i bin glad long yu. Yu save tekem wan smol taem long taem blong sakramen blong askem God blong helpem yu blong luksave olgeta samting ia. Sapos yu luksave, mi promesem yu se bambae yu filim wan samting. Bambae yu filim se yu gat hop.
Taem mi bin mekem hemia, Spirit i bin talem gud long mi se, i nomata we mi longwe yet blong kam stret evriwan, tedei mi moa gud bitim yestedei. Mo hemia i givim mi tras ia, se, from Sevya, mi save kam gud moa tumoro.
Oltaem, hem i wan longfala taem, mo i minim tu se bae tingting blong yumi i no mas wokbaot olbaot, i lukluk stret nomo. From eksperiens, yu yu save se i had blong tingting long wan samting nomo evri taem. Be nomata se yu mekem gud blong kipim promes blong yu blong oltaem tingbaot Hem, bambae Hem i oltaem tingbaot yu.
Sevya i save ol jalenj blong yu. Hem i save se i olsem wanem blong gat ol wok blong lukaotgud long man i hevi long yu. Hem i save se yu yu nidim blesing ia we i kam wetem fasin blong oltaem stap tingbaot Hem mo stap obei long Hem —“blong [yu] oltaem gat Spirit blong hem i stap wetem [yu ]” (luk long D&C 20:77; oli ademap italik).
Mekem se, evri wik, Hem i welkamem yu long sakramen tebol, blong mekem se wan moa taem, Hem i givim yu wan moa janis blong yu witnes long fored blong Hem se bae oltaem, yu tingbaot Hem.
© 2018 i kam long Intellectual Reserve, Inc. Oli holem evri raet. Oli printim long YSA. Oli letem long Inglis lanwis: 6/17 Oli letem translesen: 6/17 Translesen blong First Presidency Message, February 2018. Bislama. 15046 852