Poraus seni ewe Aewin Presetensi, February 2018
Chechemeni I Fansoun Meinisin
Seni Preseten Henry B. Eyring
Aemonun Chon Aninis non ewe Aewin Presetensi
En mi tongeni fitiei ne anapanapa ewe soufos Moronai an makkei ekkewe amuchunon kapasen ewe Puken Mormon won ekkewe seleichen gold? A chok anamon. A fen kuna muun we, noun aramas, me an famimi ra turutiw. Ewe fonu a “ew soposoponon” maun (Mormon 8:8). Nge mi wor an apinukunuk, pun a fen kuna ach ei fansoun! Me seni meinisin ekkewe mettoch mi fen tongeni makkei, a tingorei kich ne chechemeni (nengeni Moronai 10:3).
Preseten Spencer W. Kimball (1895–1985) a sani an epwe asukuna pwe ewe kapas chechemeni ina ewe kapas mi kon auchea me non ewe puken kapas. Pokiten sia fen fori pwon mi pin ngeni Kot, a apasa, “ewe mettoch mi nap auchean ngeni kich ina sipwe chechemeni” ir.1
En mi tongeni kuna ewe kapas chechemeni me non unusen ekkewe pukefel. Nupwen Nifai a pesei pwin kewe, a kan soun tingorer repwe chechemeni an ewe Samon kewe kapas me chechemeni ifa usun Kot a fen amanaua ar kewe neuo (nengeni 1 Nifai 15:11, 25; 17:40).
Non an kapasen an epwene feino, King Benjamin a aea ewe kapas chechemeni fan wanu. A anean pwe noun kewe aramas repwe chechemeni “ewe manamanen Kot … me an kirekiroch me engino” ngeni ir (Mosaia 4:11; nengeni pwan 2:41; 4:28, 30; 5:11–12).
Nupwen ewe Chon Amanau a forata ewe sakrament, A tingorei Noun kewe chon kuno ne mwongo ewe esisin “non achechemenien” An fangeno (Luke 22:19). Non iotekin sakrament meinisin en me ngang sia rong, ewe kapas fansoun meinisin a tapweto mwirin ewe kapas chechemeni (nengeni D&C 20:77, 79).
Ai porous a ew tingor, pwan mwo ew sio, ne chechemeni. Ikkei unungat kokkot usun met ami mi tongeni chechemeni iteiten wik nupwen oua angei ewe esisinen ewe sakrament mi pin. Ua anean pwe repwe anisi kemi, usun ra fen anisiei.
Chechemeni Jises Kraist
Aewin, chechemeni ewe Chon Amanau. Chechemeni I ion nupwen a nom won fonufan, ifa usun A kapas ngeni ekkoch, me ifa usun I a pwari kirekiroch non An foffor. Chechemeni ion I a nonnom rer me met a asukuna. Ewe Chon Amanau “a fein fetan ekis meinisin, a fori an angang mi murinno” (Foffor 10:38). A churi ekkewe mi semwen. A nikitu ne fori mochenin Seman we.
Akkaewin, sia tongeni chechemeni ewe watten niwin I a moni, seni An tong ngeni kich, an epwe awesano nimengawen ach tipis. Nupwen sipwe chechemeni I, ach mochen ne tapweno mwirin epwe marino. Epwe nap ach mochen pwan ekis kirekiroch, omusano, me mochen kutta mochenin Kot me fori.
Chechemeni Met mi Auchea Ngonuk ne Foriochu
Mi weires ne ekieki usun ewe Chon Amanau—An nimenimoch me unusoch—me nukun ach sisap ekieki ifa usun ngawach me ach sise unusoch ne anonno fengeni kich. Sia fen fori pwon mi pin ne anesochisi An kewe annuk, nge sia kan soun tur seni an nongonong mi tekia. Nge ewe Chon Amanau mi sinei pwe ei epwe fis, ina minne I a ngeni kich ewe angangen ewe sakrament mi pin.
Ewe sakrament a fen wor popun ren fofforun asoren fangeno me non ewe Testament Noom, minne mi pachenong ew pwaratan tipis (nengeni Leviticus 5:5). Sise chiwen asorata man, nge kich mi chiwen tongeni fangeta ach tipis. Ekkewe pukefel ra eita ngeni ei ew asoren “ew netipechou me ew netip niemam” (3 Nifai 9:20). Feito ren ewe sakrament fiti ew netip niemam (nengeni D&C 59:12; Moronai 6:2). Nupwen oupwe fori, oupwe angei omusomusen ami tipis me ousap rikino seni ewe aan ngeni Kot.
Chechemeni ewe Fefeita Ka Fori
Nupwen oua attonaochu manauemi fansoun angangen ewe sakrament mi pin, ua anean pwe ami ekiek esap ionapei chok mettoch oua fori mi muan nge pwan mettoch oua fori mi pung—nupwen oua mefi pwe Semach non Nang me ewe Chon Amanau ra pwapwa remi. Menin oupwe fen awora ekis fansoun ewe sakrament ne tingorei Kot epwe anisikemi ne kuna ekkei mettoch. Ika oupwe fori, ua pwon ngeni kemi oupwe mefi och mettoch. Oupwe mefi apinukunuk.
Nupwen ua fori ei, ewe Ngun a ngeniei apinukunuk pwe nupwen ngang mi chiwen towaw seni unusoch, ngang mi murino ikenai nap seni nanew. Iwe ei a ngeniei nuku pwe, pokiten ewe Chon Amanau, ua fen tongeni murinono nesor.
Fansoun meinisin a ew fansoun mi nangatam, me a affata watten achochon ekiek. Oua fen sinei seni met oua fori ifa usun weiresin ach sipwe chok unusen ekieki usun ew mettoch non fansoun meinisin. Nge inamo ika ifa usun oua ennetin anesochisi ami pwon ne chechemeni I fansoun meinisin, I epwe chechemeni kemi fansoun meinisin.
Ewe Chon Amanau mi sinei usun ami osukosuk. I mi sinei ifa usun ewe tumunun manau epwe achou kemitiw. I mi sinei ifa usun weiweitan auchean an kewe feioch ngeni kemi ekkewe ra feito seni ach chechemeni I fansoun meinisin me aneasochisi I—pwe oupwe tongeni angei Ngunun we remi fansoun meinisin (D&C 20:77; auchean mi kapacheta).
Iwe, I a etiwa kemi sefan ngeni ewe chepenin sakrament iteiten wik, a pwan awora ngeni kemi ewe tufichin pwarata me mwen I pwe oupwe chechemeni I fansoun meinisin.
© 2018 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17 Kapungunon awewen: 6/17. Chiakun First Presidency Message, February 2018. Chuukese (Trukese). 15046 901