iTukutuku ni Mataveiliutaki Taumada, Feperueri 2018
Dau Nanumi Koya Tikoga
Mai vei Peresitedi Henry B. Eyring
Matai ni Daunivakasala ena Mataveiliutaki Taumada
E rawa beka ni ko raitayaloyalotaka vata kei au na parofita o Moronai ni ceuta tiko na iotioti ni veivosa ki na iVola iMomani ena peleti koula? E a tu taudua ko koya. E sa raica na nodra bale na nona matanitu, na nona tamata, kei na nona matavuvale. Na vanua “taucoko” sa veivaluvaluti (Momani 8:8). Ia e tu vua na vakanuinui, ka ni sa raica oti na noda veisiga! Ia mai na veika kece e rawa ni vola, e sureti keda meda nanuma (raica na Moronai 10:3).
O Peresitedi Spencer W. Kimball (1895–1985) e dau taleitaka me vakatavulica ni vosa bibi duadua ena ivolavosa e rawa ni nanuma. Ni da sa vakayaco veiyalayalati kei na Kalou, e a kaya o koya “na noda gagadre levu duadua o ya meda nanumi” ira.1
E rawa ni o kunea na vosa nanuma ena loma taucoko ni ivolanikalou. Ni dau vunauci rau na tuakana o Nifai, e dau vakavuqa me sureti rau me rau nanuma na vosa ni Turaga ka me rau nanuma na nona vakabulai ira na nodratou qase na Kalou (raica 1 Nifai 15:11, 25; 17:40).
Ena nona vosa ni veitataunaki, o Penijamini na Tui e a vakayagataka vakavitu na vosa nanuma . E nuitaka ni ra na nanuma na nona tamata “na cecere ni Kalou … kei na nona vinaka ka dau vosota vakadede” ki vei ira (Mosaia 4:11; raica talega 2:41; 4:28, 30; 5:11–12)
Ni a vakatavulica na sakaramede na iVakabula, e a sureti iratou na Nona tisaipeli me ratou vakayagataka na ivakatakilakila me “ivakananumi” ni Nona soli Koya (Luke 22:19). Ena veimasu kece sara ni sakaramede e daru dau rogoca na vosa tikoga ni tarava mai na vosa nanumi (raica V&V 20:77, 79).
Na noqu itukutuku e veisureti, ka vakatakekere, mo ni nanuma. Oqo e tolu na vakatutu ena veika ko ni rawa ni nanuma ena veimacawa ena nomuni vakaivotavota ena ivakatakilakila tabu ni sakaramede. Au nuitaka ni na vukei kemuni, me vaka ena kena a vukei au.
Mo daunanumi Jisu karisito.
Matai, Nanuma na iVakabula. Nanuma o cei O Koya ni a tiko e vuravura, e a vosa vakacava vei ira na tani, e a vakaraitaka vakacava na yalovinaka ena Nona cakacaka. Nanuma o cei a dau tiko vata kaya kei na cava e dau vakatavulica. Na iVakabula e dau “lako voli ka daucaka vinaka” (Cakacaka 10:38). A sikovi ira na tauvimate. A talairawarawa ki na lewa nei Tamana.
Ka levu duadua vei ira, eda rawa ni nanuma na isau vakaitamera ka a sauma, mai na Nona loloma vei keda, me kauta tani kina na duka ni noda ivalavala ca. Ni da dau nanumi Koya, ena qai tubu cake kina na noda gadreva meda vakatotomuri Koya. Eda na vinakata meda yalovinaka cake, ka veivosovosoti, ka yalogu cake ni vaqara na lewa ni Kalou ka cakava.
Nanuma Vakavinaka Na ka e Dodonu mo Cakava
E dredre ni da vakasamataka na iVakabula—Nona savasava ka vinaka sara—ka sega ni vakasamataka na noda sesewa ka sega ni vinaka ni vakatauvatani vata. Eda sa caka veiyalayalati meda talairawarawa ki na Nona ivunau, ia sa dau vakawasoma ni da sega ni yacova na ivakatagedegede cecere oqo. Ia na iVakabula sa kila oti tu ni na yaco oqo, sa ikoya gona e solia kina vei keda na cakacaka tabu ni sakaramede.
Na sakaramede e tu na wakana mai na ivakarau ni vakacaboisoro ena Veiyalayalati Makawa, ka oka kina na vakatusai ni ivalavala ca (raica na Vunau ni Soro 5:5). Eda sa sega tale ni vakacabo isoro manumanu, ia eda rawa ga ni biuta tani noda ivalavala ca. Na ivolanikalou e vakatoka oqo na isoro ni, “yalo sa raramusumusu kei na yalo sa bibivoro” (3 Nifai 9:20). Lako mai ki na sakaramede ena yalo veivutuni (raica V&V 59:12; Moronai 6:2). Ni ko cakava oqo, o na rawata na vosoti ni ivalavala ca ka ko na sega ni lako sese mai na sala ka dusia na lesu vua na Kalou.
Nanuma na Toso ki Liu Ko sa Cakava Tiko
Ni ko dikeva na nomu bula ni yaco tiko na cakacaka ni sakaramede, au nuitaka ni nomu vakasama e sega ni dabe wale tiko ga ena veika cala ko a cakava ia me tu talega e na veika dodonu—na veitiki ni gauna ko a vakila kina ni marautaki iko na Tamada Vakalomalagi kei na iVakabula. E rawa ni ko taura e dua na tiki ni gauna ni yaco tiko na sakaramede mo kerea kina na Kalou me vukei iko mo raica na veika oqo. Kevaka ko cakava, au yalataka vei iko ni ko na vakila e dua na ka. O na vakila na nuinui.
Niu sa cakava oti oqo, sa vakadeitaka vei au na Yalo ni dina ga au se bera sara ni vinaka taucoko, au sa bau vinaka toka nikua mai na siga e nanoa. Ia mai na ka oqo au sa yalodei kina, ena vuku ni iVakabula, au na rawa ni vinaka cake sara ni mataka.
Na tikoga e gauna balavu, ka tukuna tu na levu ni igu vakanamata vakadua. Ko ni kila mai na ka e sotavi na kena dredre na vakasamataka matua e dua ga na ka ena gauna kecega. Ia veitalia mada se vakacava na vinaka ni nomu vakayacora na nomu yalayala mo dau nanumi Koya, e dau nanumi iko o Koya.
E kila na iVakabula na nomu bolebole. E kila o Koya na cava na kena ibalebale mo bikai tu ena veiogaoga ni bula. E kila o Koya na kena bibi ni gadrevi na veivakalougatataki ka dau yaco mai na dau nanumi Koya ka talairawarawa Vua—“ka me dau tiko ga kei iko na nona Yalo Tabu” (V&V 20:77; vakabibitaki).
E dina, o Koya e kidavaki iko lesu ki na teveli ni sakaramede ena veimacawa, vakadua tale e solia vei iko na galala mo vakadinadinataka e matana ni ko na dau nanumi Koya.
© 2018 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/17. Vakadonui me vakadewa: 6/17. Vakadewa ni First Presidency Message, February 2018. Fijian. 15046 858