Klumech er a First Presidency, Ongerung el buil 2018

Blechoel Melbedebek er Ngii

Mla er a President Henry B. Eyring

Kot el Counselor er a First Presidency

Ka bo dedak e dolatk ra profet Moroni el meluches aikel ulebongel el tekoi ra Babier ra Mormon el ngara tibereberk el sintsyu? Ng di mle ngii el tang. Ng mla mesa belual, ma rechedal, ma telungalek er ngii el mla nguemed. Tial beluu rokir a di “ngara mekemad”(Mormon 8:8). Ng di ng mlarngii a urungulel, le ngii el milsa sils er kid! A rokui el tekoi el mle sebechel lemuches, e ngii a siotai er kid el mo melbedebek (mesa Moroni 10:3).

A President Spencer W. Kimball (1895–1985) a kmal mle soal lolisechakl el kmo a kot el klou a belkul el tekoi ra chelsel a dictionary a melbedebek. Kid el mla soiseb ra telbiil lobengkel a Dios, a uchul e ng dilu el kmo, “a kot el klou a belkul a mo melbedebek” aikal telbiil.¹

Ng sebechem el metik ra tekoi el melbedebek ra chelsel chedaol llechukl. A Nephi ra lollach ra robekul, eng mle blechoel omeklatk er tir el mo melbedebek a tekingel a Rubak e lolbedebek el uase a Dios a ulelsobel er a ruchelir (mesa 1 Nephi 15:11, 25; 17:40).

Sel klou el omelmesumech el cheldechedechal, a King Benjamin a mle ousbech ra tekoi el melbedebek el euid el taem. Ngii a mle oureng ma rechedal bo lolbedebek a “omerellel a Dios … ma klungiolel ma kllou el reng er ngii” el kirir (Mosiah 4:11; dirrek el mesa 2:41; 4:28, 30; 5:11–12).

A Osobel ra lekedmeklii a sakrament, e Ngii a mle siotai ra roltirakl er Ngii el melai er ngii el “omeletkir” ra ringel er Ngii (Lukas 22:19). Bek el nglunguuch ra sakrament e kau ma ngak, a rongesii a tekoi el blechoel ruchei er a tekoi el melbedebek (mesa D&C 20:77, 79).

A klemechek a siotai, e dirrek el ongit, el mo melbedebek. Aikakid a kldei el tekoi el sebechel ngosukau el mo melbedebek ra bek el sandei sel molai ra sakrament. A kureng mel sebechel ngosukau, leng dirrek el mla ngosukak.

Molbedebek ra Jesus Kristo

A kot, e molbedebek ra Osobel. Molbedebek el kmo Ngii ng mle uangerang ra lengara beluulechad, a teletelel a longedecheduch ra rechad, me a ungil omeruul el Ngii a ulecholt. Molbedebek el uase Ngii ng chiloit a temel lobengterir a rengerang e ngerang ulisechakl. A Osobel a “mirrael el meruul a ungil” (Rrellir 10:38). Ngii a uleldingel ra rsmecher. Ng mle blak a rengul meruul aikel soal a Demal.

A ngaruchei, eng sebeched el melbedebek ra ringel el Ngii a mlorngii, lokiu a beltkil a rengul el kired, el kirel a ngebetel a kngtid. Sel dolbedebek er Ngii, e a blak el reng er kid el mo oltirakl er Ngii a mukeroul. Ng soad el muut el mo bekokeuii, muut el mo ousubes, e lmuut el mo blak a rengud losiik ra soal a Dios e oltirakl er ngii.

Molbedebek A Kirem el Meruul el Muut el mo Ungil

Ng meringel a domdasou ra Osobel— er sel klikiid e cherrungel el klengar Ngii— e lak dolatk el kirel a mekngit el doruul ma diak el cherrungel el klengar kid. Kid a mla nguu a telbiil el mo oltirakl a Llechul, eng di kid a blechoel ruebet ra ikal ngarbab el llach. Ng di Osobel a mle medengei el kmo tia mo uaisei, seikid a uchul e Ngii a milskid a chedaol ruoll ra sakrament.

A sakrament a di mla uldelid el teletael ra Chuodel Renged loruul a uldars, luldimukl a kombesar a klengit (mesa Leviticus 5:5). Ng mla mo diak doruul a uldars lousbech a charm, ng di ng sebeched el chemoit a kngtid. A chedaol llechukl omekedong er tial teletael el kmo “ouchel reng er a klengit” (3 Nephi 9:20). Mei e molai ra sakrament loba ouchel reng (mesa D&C 59:12; Moroni 6:2). Sel bom uaisei, e ke mo nguu a klausubes ra kngtim e diak bom cheroid ra rael el muut el mora Dios.

Molbedebek a Teletael el Kau a Meruul

Sel momtab ra klengar kau ra temel a sakrament, a kureng el diak molatk aikel mekngit el kau a meruul ng bai ikel ungil tekoi el kau a meruul—aikel taem el kau a mle melchesuar el kmo a Chedam ra Babeluades ma Osobel a ungil a rengrir el kirem. Ng dirrek el sebechem el mo melatk ra temel a sakrament e olengit ra Dios mel ngesukau el mes aikal tekoi. Sel bom uaisei, ak yaksok er kemiu el kmo ngarngii a bo momelchesiu er ngii. Ke mo melchesuar a urungulem.

Sel kuruul el uaisei, a Chedaol Reng a meketeklii er ngak el kmo ng uaisei el ngak a cheroid ra mo cherrungel, eng di a kuk telkib lungil ra chelechang ra chelii. E tiang a meskak a ungil reng, le okiu Osobel, a kuk mo ungil ra klukuk.

Blechoel a meketeketang el taem, e melekoi el kirel a blak el reng. Ko medengei el uase ng meringel sel denguu a uldesued el kirel a chimol tekoi ra bek el taem. Ng di ng diak el iior ra kmo ke uangerang omeletkem el Kirel, le Ngii a di blechoel melatk er kau.

A Osobel a medengei a ringel el omngarngii. Ngii a medengelii a berredel a tekoi ra klengar el kau a chellungel. Ngii a medengei a rechedel a klengeltengat el kau ousbech sel sekum e ke melbedebek er Ngii e oltirakl er Ngii—“me [kau] bo blechoel melchesuar a Reng er ngii [lobengkem]” (D&C 20:77; smisichii a belkul).

A leuaisei, e Ngii a mengemedaol er kau el muut el mei e melai ra sakrament ra bek el sandei, el muut el meskau a techall el mo sioning er medal el kmo ke mo blechoel melbedebek er Ngii.

© 2018 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/17. Kengei er a oidel: 6/17.Oidel a First Presidency Message, February 2018. Palauan. 15046 881