ຊາວໜຸ່ມ

ສາມຢ່າງທີ່ຄວນຈື່ຈຳ

ຄຳວ່າ ຈື່ຈຳ ປະກົດຫລາຍເທື່ອ ຢູ່ໃນພຣະຄຳພີມໍມອນ. ນີໄຟໄດ້ຊຸກຍູ້ອ້າຍນ້ອງຂອງເພິ່ນໃຫ້ຈື່ຈຳ ສິ່ງທີ່ພຣະເຈົ້າໄດ້ໂຜດບັນພະບຸລຸດຂອງເຂົາເຈົ້າ. ກະສັດເບັນຢາມິນ ໄດ້ຂໍໃຫ້ຜູ້ຄົນຂອງເພິ່ນ ຈື່ຈຳຄວາມຍິ່ງໃຫຍ່ຂອງພຣະເຈົ້າ. ແລະ ໂມໂຣໄນໄດ້ແນະນຳຜູ້ອ່ານຂອງເພິ່ນ ໃຫ້ຈື່ຈຳວ່າ ພຣະຜູ້ເປັນເຈົ້າມີຄວາມເມດຕາຫລາຍຂະໜາດໃດ.

ການຈື່ຈຳພຣະຜູ້ຊ່ວຍໃຫ້ລອດ ເປັນສິ່ງສຳຄັນ—ເຮົາຍັງໄດ້ເຮັດພັນທະສັນຍາ ທີ່ຈະລະນຶກເຖິງພຣະອົງ ທຸກເທື່ອທີ່ເຮົາຮັບສ່ວນສິນລະລຶກ. ປະທານໄອຣິງ ເຊື້ອເຊີນເຮົາໃຫ້ຈື່ຈຳສິ່ງເຫລົ່ານີ້ ລະຫວ່າງພິທີສິນລະລຶກ:

ລະນຶກເຖິງພຣະເຢຊູຄຣິດ: ອ່ານພຣະຄຳພີ ເຖິງວິທີທີ່ພຣະຜູ້ຊ່ວຍໃຫ້ລອດຮັບໃຊ້ ແລະ ສະແດງຄວາມຮັກຕໍ່ຄົນອື່ນແນວໃດ. ເຈົ້າຮູ້ສຶກເຖິງຄວາມຮັກຂອງພຣະອົງແນວໃດ? ເຈົ້າສາມາດຮັບໃຊ້ ແລະ ສະແດງຄວາມຮັກຕໍ່ຄົນອື່ນ ຢ່າງທີ່ພຣະຜູ້ຊ່ວຍໃຫ້ລອດໄດ້ກະທຳແນວໃດ?
ຈື່ຈຳສິ່ງທີ່ເຈົ້າຕ້ອງເຮັດໃຫ້ດີກວ່າເກົ່າ: ຄິດກ່ຽວກັບອາທິດທີ່ຜ່ານມາຂອງເຈົ້າ ດ້ວຍການກັບໃຈ. ເລືອກເອົາສິ່ງໜຶ່ງທີ່ເຈົ້າສາມາດປ່ຽນ, ແລະ ໃຫ້ຂຽນສິ່ງທີ່ເຈົ້າຈະເຮັດ ເພື່ອດັດແປງມັນໃຫ້ດີກວ່າເກົ່າ. ໃຫ້ເກັບເຈ້ຍເປົ້າໝາຍໄວ້ໃນບ່ອນທີ່ເຈົ້າຈະຫລຽວເຫັນເລື້ອຍໆ.
ຈື່ຈຳຄວາມກ້າວໜ້າທີ່ເຈົ້າກຳລັງເຮັດຢູ່: ທູນຂໍໃຫ້ພຣະເຈົ້າຊ່ວຍເຫລືອເຈົ້າ ໃຫ້ເຫັນຄວາມກ້າວໜ້າທີ່ດີ ທີ່ເຈົ້າກຳລັງເຮັດຢູ່. ບັນທຶກສິ່ງທີ່ເຈົ້າຮູ້ສຶກ.

ເຮົາບໍ່ດີພ້ອມທຸກຢ່າງ, ແຕ່ພຣະຜູ້ຊ່ວຍໃຫ້ລອດຮູ້ຢູ່ແລ້ວ. ສະນັ້ນ ພຣະອົງຈຶ່ງຂໍໃຫ້ເຮົາລະນຶກເຖິງພຣະອົງ. ການລະນຶກເຖິງພຣະອົງໃຫ້ຄວາມຫວັງແກ່ເຮົາ ແລະ ຊ່ວຍເຮົາໃຫ້ຢາກພັດທະນາຕົນ. ເຖິງແມ່ນໃນເວລາເຮົາລືມທີ່ຈະລະນຶກເຖິງພຣະອົງ, ປະທານໄອຣິງ ກ່າວວ່າ, “ພຣະອົງຈະລະນຶກເຖິງທ່ານຕະຫລອດເວລາ.”