ຫລັກທຳຂອງຂ່າວສານການຢ້ຽມສອນ, ເດືອນກຸມພາ 2018
ຫາວິທີຮູ້ຈັກນາງ ແລະ ຄອບຄົວຂອງນາງ
ການຢ້ຽມສອນ ແມ່ນກ່ຽວກັບການມາຮູ້ຈັກ ແລະ ຮັກເອື້ອຍນ້ອງແຕ່ລະຄົນດ້ວຍຄວາມຈິງໃຈ ເພື່ອວ່າເຮົາຈະສາມາດຊ່ວຍເພີ່ມສັດທາໃຫ້ນາງ ແລະ ຮັບໃຊ້ນາງ.
ສັດທາ, ຄອບຄົວ, ສົງເຄາະ
ຣິຕາ ແຈັບສັນ ແລະ ຄູຢ້ຽມສອນຂອງນາງ ໄດ້ກາຍເປັນເພື່ອນທີ່ດີຕໍ່ກັນ ເມື່ອພວກນາງຢ້ຽມຢາມ ແລະ ແບ່ງປັນຫລັກທຳພຣະກິດຕິຄຸນໃຫ້ກັນ. ແຕ່ການຢ້ຽມຢາມຂອງພວກນາງ ແມ່ນຮ່ວມດ້ວຍການຫລິ້ນເກມຄຳສັບນຳກັນ. ມັນເປັນສິ່ງທີ່ນາງຣິຕາມັກຫລາຍ ກ່ຽວກັບຄູຢ້ຽມສອນຂອງນາງ ເພາະນາງຮູ້ວ່າ ພວກນາງເປັນໝູ່ເພື່ອນກັນ ແລະ ການຢ້ຽມຢາມ ບໍ່ໄດ້ເປັນພຽງ “ພາລະ” ທີ່ຕ້ອງເຮັດໃຫ້ສຳເລັດເທົ່ານັ້ນ. ມີຫລາຍສິ່ງຫລາຍຢ່າງທີ່ເອື້ອຍນ້ອງສາມາດເຮັດໄດ້ ລະຫວ່າງການຢ້ຽມຢາມ, ດັ່ງເຊັ່ນການໄປຍ່າງຫລິ້ນນຳກັນ ຫລື ເສຍຫຍ້າຢູ່ໃນສວນຄົວນຳກັນ ໃນຂະນະທີ່ລູກໆຫລິ້ນຢູ່ນຳກັນ.
ແອວເດີ ແຈັບຟະຣີ ອາ ຮໍແລນ ແຫ່ງກຸ່ມອັກຄະສາວົກສິບສອງ ໄດ້ກ່າວວ່າ, “ໃຫ້ເຫັນຕົວເອງ ເປັນຜູ້ຕາງໜ້າຂອງພຣະຜູ້ເປັນເຈົ້າ ຕໍ່ລູກໆຂອງພຣະອົງ. … ພວກເຮົາຫວັງ … ວ່າ ທ່ານຈະຕັ້ງແບບແຜນທີ່ຈິງໃຈ, ມີຄວາມເປັນຫ່ວງເປັນໃຍຕໍ່ສະມາຊິກ, ດູແລ, ຊ່ວຍເຫລືອກັນແລະກັນ, ສະໜອງຄວາມຕ້ອງການທາງວິນຍານ ແລະ ທາງໂລກ ໃນທາງທີ່ເປັນປະໂຫຍດ.”1
ຜ່ານທາງໂມເຊ ພຣະຜູ້ເປັນເຈົ້າ ໄດ້ບັນຊາລູກຫລານອິດສະຣາເອນວ່າ “ຄົນຕ່າງດ້າວທີ່ອາໄສຢູ່ໃນດິນແດນຂອງພວກເຈົ້າ ຈົ່ງເຮັດກັບເຂົາ ເໝືອນເຮັດກັບພີ່ນ້ອງຄົນອື່ນໆໃນພວກເຈົ້າ, ແລະ ເຈົ້າຕ້ອງຮັກ [ນາງ] ເໝືອນຮັກພວກເຈົ້າເອງ” (ລະບຽບພວກເລວີ 19:34). ເອື້ອຍນ້ອງທີ່ເຮົາໄປຢ້ຽມຢາມ ອາດເປັນ “ຄົນຕ່າງດ້າວ” ໃນຕອນທີ່ເຮົາເລີ່ມຕົ້ນຮັບໃຊ້, ແຕ່ເມື່ອເຮົາຮູ້ຈັກນາງ ແລະ ຄອບຄົວຂອງນາງຫລາຍຂຶ້ນ, ເຮົາຈະມີຄວາມປາດຖະໜາ ຫລາຍຂຶ້ນ “ທີ່ຈະແບກຫາບພາລະຂອງກັນແລະກັນ, ເພື່ອຈະໄດ້ແບ່ງເບົາ” ແລະ ໃຫ້ “ໃຈຂອງພວກເຮົາຜູກພັນກັນໄວ້ ໃນຄວາມເປັນອັນໜຶ່ງອັນດຽວ ແລະ ໃນຄວາມຮັກທີ່ມີຕໍ່ກັນ” (ໂມໄຊຢາ 18:8, 21).
ເຣນາ ໄອ ອາເບີໂຕ, ທີ່ປຶກສາທີສອງໃນຝ່າຍປະທານສະມາຄົມສະຕີສົງເຄາະສາມັນ, ຈື່ຈຳຕອນທີ່ເພິ່ນຫາກໍໄດ້ຢ່າຮ້າງ ແລະ ເປັນສະມາຊິກໃໝ່ຂອງສາດສະໜາຈັກ. “ຄູຢ້ຽມສອນຂອງຂ້າພະເຈົ້າ ໄດ້ມາບ້ານຂອງຂ້າພະເຈົ້າ,” ເພິ່ນໄດ້ກ່າວ, “ແລະ ເຂົາເຈົ້າໄດ້ນຳຄວາມຮູ້ສຶກທີ່ເປັນສະມາຊິກ ແລະ ຄວາມຮັກອັນອົບອຸ່ນ ມາສູ່ຈິດໃຈຂອງຂ້າພະເຈົ້າ.”2
ໃຫ້ພິຈາລະນາສິ່ງນີ້
ພາຍໃນຄອບຄົວຂອງເອື້ອຍນ້ອງທີ່ທ່ານໄປຢ້ຽມຢາມ, ມີກິດຈະກຳມໍ່ໆໃດແດ່ ທີ່ທ່ານຄວນຮູ້ຈັກ ແລະ ຈື່ຈຳ?
© 2018 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Visiting Teaching Principles, February 2018. Laotian. 15046 331