សារលិខិតបង្រៀនសួរសុខទុក្ខ ខែ កុម្ភៈ ឆ្នាំ ២០១៨

រៀនស្គាល់គាត់ និងក្រុមគ្រួសារគាត់

ការបង្រៀនសួរសុខទុក្ខ គឺអំពីការស្គាល់ និងស្រឡាញ់បងប្អូនស្រីម្នាក់ៗដោយស្មោះត្រង់ ដើម្បីយើងអាចជួយពង្រឹងសេចក្តីជំនឿរបស់គាត់ និងផ្តល់ការបម្រើ ។

សេចក្ដីជំនឿ ក្រុមគ្រួសារ ការសង្គ្រោះ

រីតា ជិបសុន និងគ្រូបង្រៀនសួរសុខទុក្ខរបស់នាង បានក្លាយជាមិត្តល្អនៅពេលពួកគេមកជួបនិងចែកចាយគោលការណ៍នៃដំណឹងល្អ ។ ប៉ុន្តែការមកសួរសុខទុក្ខរបស់ពួកគេក៏រាប់បញ្ចូលទាំងការលេងល្បែងផ្គុំពាក្យជាមួយគ្នាផងដែរ ។ វាជាអ្វីដែល រីតា ចូលចិត្តធ្វើក្នុងនាមជាគ្រូបង្រៀនសួរសុខទុក្ខ ដោយសារគាត់ដឹងថាពួកគេគឺជាមិត្ត ដូច្នោះការមកសុខទុក្ខពុំគ្រាន់តែធ្វើឲ្យតែ« បង្រ្គប់ចំនួន » នៅក្នុងបញ្ជីនោះទេ ។ មានអ្វីៗជាច្រើនដែលបងប្អូនស្រីអាចធ្វើអំឡុងពេលចុះសួរសុខទុក្ខ ដូចជា ការដើរជាមួយគ្នា ឬ ការដកស្មៅនៅសួនបន្លែនៅពេលដែលកូនៗរត់លេង ។

អែលឌើរ ជែហ្វ្រី អ័រ ហូឡិន នៃកូរ៉ុមនៃពួកសាវកដប់ពីរនាក់បានមានប្រសាសន៍ថា « សូមមើលខ្លួនអ្នកជាអ្នកនាំសារនៃព្រះអម្ចាស់ទៅកាន់កូនចៅទ្រង់ ។… យើងសង្ឃឹម… ថាអ្នកនឹងបង្កើតទម្លាប់ថ្មី ដែលខ្វល់ខ្វាយក្នុងការប្រាប់ដំណឹងល្អដល់សមាជិក មើលថែ ហើយថែទាំគ្នាទៅវិញទៅមកដោះស្រាយតម្រូវការខាងវិញ្ញាណ និងខាងសាច់ឈាមតាមគ្រប់មធ្យោបាយដែលអាចជួយ ។ »^១

តាមរយៈម៉ូសេ ព្រះអម្ចាស់បានបញ្ជាដល់កូនចៅនៃអ៊ីស្រាអែលថា « ឯអ្នកប្រទេសក្រៅដែលមកស្នាក់នៅក្នុងពួកឯងរាល់គ្នា នោះត្រូវទុកដូចជាកើតនៅស្រុកឯងវិញ ហើយត្រូវស្រឡាញ់ [ នាង ] ដូចជាខ្លួនឯងដែរ » ( លេវីវិន័យ ១៩:៣៤ ) ។ បងប្អូនស្រីដែលយើងបង្រៀនសួរសុខទុក្ខអាចជា «អ្នកប្រទេសក្រៅ» នៅពេលយើងចាប់ផ្តើមការបម្រើរបស់យើង ប៉ុន្តែនៅពេលយើងស្គាល់គាត់ និងគ្រួសារគាត់ នោះបំណងប្រាថ្នារបស់យើងដើម្បី « ព្រមទទួលបន្ទុកគ្នាទៅវិញទៅមក ដើម្បីឲ្យបន្ទុកនោះបានស្រាល » ហើយមាន « ចិត្តចងក្រងរួមគ្នាដោយសាមគ្គី ហើយស្រឡាញ់គ្នាទៅវិញទៅមក » នឹងរីកចម្រើនឡើង ( ម៉ូសាយ ១៨:៨, ២១ ) ។

រីណា អាយ អាប៊ឺតូ ទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅ រំឭកពីគ្រាដែលគាត់ទើបក្លាយជាសមាជិកថ្មីក្នុងសាសនាចក្រ ជាគ្រាដែលគាត់ទើបតែលែងលះគ្នា ។ គាត់បាននិយាយថា « គ្រូបង្រៀនសួរសុខទុក្ខរបស់ខ្ញុំបានមកផ្ទះខ្ញុំ ហើយពួកគេបាននាំមកនូវអារម្មណ៍ដ៏កក់ក្តៅមួយនៃភាពស្និទស្នាល និងសេចក្តីស្រឡាញ់មកដល់ដួងចិត្តរបស់ខ្ញុំ ។ » ^២

សូមពិចារណាអំពីសំណួរនេះ

នៅក្នុងក្រុមគ្រួសារនៃបងប្អូនស្រីដែលអ្នកបង្រៀនសួរសុខទុក្ខ តើព្រឹត្តិការណ៍ថ្មីៗអ្វីខ្លះដែលអ្នកគួរដឹងនិងចងចាំ ?

© 2017 by Intellectual Reserve, Inc. All rights reserved. បានបោះពុម្ពនៅ ស.រ.អា. ។ អនុមតិជាភាសាអង់គ្លេស ៖ ៦/១៧ ។ អនុមតិឲ្យបកប្រែ ៖ ៦/១៧ ។ ការបកប្រែនៃ Visiting Teaching Principles, February 2018 ។ Cambodian.15046 258