iVakavuvuli ni Veisiko, Maji 2018

Masulaka na Marama Yadua ena Yacana

Ena vakalevutaki na noda loloma kei na veivakauqeti me baleti ira eda sikova ni da masulaki ira vakabibi ena yacadra na marama yadua ena yalomalumalumu.

Vakabauta, Matavuvale, Veivukei

iToko ni iSoqosoqo ni Veivukei

Sa vakaraitaka na ivolanikalou e vuqa na ivakaraitaki ni turaga kei na marama ka a masulaki ira tale eso ena yacadra. Dua vei ira na vakacakacakaikoya sara na tamai Alama Gone. A vosa vei Alama Gone e dua na agilosi, ka tukuna vua ni o tamana “[a] masulaki iko vagumatua ena vakabauta … ; o koya, ena inaki oqo au sa talai mai kina meu vakatakila vei iko na kaukauwa kei na lewa ni Kalou, me saumi kina na nodra masu na nona dauveiqaravi me vaka na nodra vakabauta” (Mosaia 27:14).

Na veimasulaki vakaikeda sa tadolava na lomada ni ciqoma na veivakalougatataki e sa gadreva tu na Turaga me solia vei keda. “Na inaki ni masu e sega ni mai veisautaka na lewa ni Kalou, ia me tau mai vei keda kei na so tale na veivakalougatataki sa gadreva tu mai na Kalou me solia, ia sa lavaki kina eso na ka ni da sa kerea vakakina.”¹

A tukuna e dua na marama ni donuya na veigauna dredre ni nona bula, e dau basika mai e dua na qiri se itukutuku ni tex mai vei ira na nona dauveisiko ena “siga drakidrakita vakatabakidua eso.” Sa vaka mera kila tu na gauna saraga e gadreva tu kina o koya me vakacegui. Sa kila o koya ni ra masulaki koya, ena gauna ni nodra veisiko ka vakaiira.

“Vakasamataka na cokoti vata ni noda kaukauwa kevaka era masumasu ena yalomalua na marama kecega ena vei mataka kei na bogi se, vinaka sara, masu vagumatua me vaka e sa vakarota na Turaga,” a kaya o Julie B. Beck, na Peresitedi Raraba ni iSoqosoqo ni Veivukei vakacegu.² Na nodra masulaki o ira eda sikova sa vakaukauwataki keda vakayadua vakakina vaka marama Yalododonu Edaidai

A kaya o Peresitedi Henry B. Eyring, na Matai ni Daunivakasala ena Mataveiliutaki Taumada: “Masulaka na sala mo kila kina na lomadra. … O na gadreva mo kila na ka e vinakata na Kalou mo cakava mo vukei ira, ka cakava kece ena kena vinaka duadua o rawata, ka vakila tiko na loloma ni Kalou ena vukudra.”³

© 2018 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/17. Vakadonui me vakadewa: 6/17. Vakadewa ni Visiting Teaching Principles, March 2018. Fijian. 15049 858

iDusidusi

1. iDusidusi ki na iVolanikalou, “Masu.”

2. Julie B. Beck, “Na Veika Era Uasivi Kina na Marama Yalododonu Edaidai: Tudei ka Dredre ni Yavalati,” Liaona, Nove. 2007, 110.

3. Henry B. Eyring, “Matabete kei na Masu Yadua,” Liaona, Me 2015, 85.

Vakasamataka Oqo

Na veivakauqeti kei na vakasama cava soti sa basika mai vei iko walega oqo ni o masulaki ira tu na marama yadua o sikova?

Veiqaravi

Mai na masulaki ni marama yadua ena yacana, eda na ciqoma na noda veivakauqeti meda kila na iwalewale ni sausaumi ki na nodra gagadre yadua na marama eda sikova.