iTukutuku ni Mataveiliutaki Taumada, Maji 2018

Na Vosa ni Kalou kivei Ira na Luvena

Mai vei Peresitedi Dieter F. Uchtdorf

Karua ni Daunivakasala ena Mataveiliutaki Taumada

iVakatakilakila

Peresitedi Dieter F. Uchtdorf

Sa tukuna vei keda na ivolanikalou ni matai ni ka a cakava na Kalou ni bulia oti na tagane kei na yalewa oya e vosa vei rau.¹ A tiko Vua na itukutuku momona kei na ivakasala vakasakiti me solia vei rau. Sa sega ni Nona inaki me vakaogai se vakayalolailaitaki rau ia me tuberi rau ki na bula marau kei na lagilagi tawamudu.

Ia e se qai itekitekivu ga oya. Mai na siga oya ki na gauna oqo, sa tomana tikoga na Kalou me veivosaki vata kei ira na Luvena. Na Nona vosa sa maroroi tu, vakamareqeti, ka vulici mai vei ira na tisaipeli ni veitabagauna. Era sa rokovi mai vei ira ka vakasaqara mera kila na loma ni Kalou, ka ra vakadinadinataka na ka dina ni “na sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nonai talatala na parofita.”²

Oqo e sa ituvatuva tu mai na ivakatekivu ni gauna, ka sa tomani voli na ituvatuva edaidai. E sa sega walega ni dua na italanoa ni iVola Tabu totoka; sai koya na sala tauyavutaki ni Kalou ni vakau itukutuku vakamareqeti kivei ira na Luvena. Sa vakatura cake o Koya na tamata mai na keda maliwa, kacivi ira mera parofita, ka solia vei ira na vosa mera tukuna, ka da sa sureti meda “rogoca, me vaka ga ni [da] rogoca mai [Gusuna].”³ Sa cauraka o Koya, “Se mai na domoqu ga se mai na domodra na noqu tamata, e sa tautauvata ga.”⁴

Oqo sa dua na itukutuku lagilagi, veivakayaloqaqataki, ka nuitaki levu sara ni Veivakalesuimai—Sa sega ni tiko lo na Kalou! Sa lomani ira na Luvena o Koya. Sa sega ni laivi keda tu o Koya meda cumuwaqara ena butobuto.

Vakarua ena veiyabaki, ena Epereli kei na Okotova, sa noda na madigi meda rogoca na domo ni Turaga mai vei ira na Nona italai ena noda koniferedi raraba totoka.

Au solia vei kemuni na noqu ivakadinadina ni se bera taumada ni vakayacora na ilakolako balavu oya o koya me vosa ki na itutu ni vunau, e sa levu sara na nona vakayagataki gauna, masumasu, kei na vuli ni sausaumi ki na ilesilesi me vosa. Na itukutuku ni koniferedi kecega sa vakaraitaka na levu ni auwa ni vakavakarau kei na vakamamasu vakilaiyalo meda kila deivaki na ka e gadreva na Turaga mera rogoca na Nona Yalododonu.

Na cava ena rairai yaco kevaka e tautauvata na noda vakavakarau na dauvakarorogo ki na nona o koya e vosa? Ena rairai duidui vakacava na noda torova na koniferedi raraba kevaka eda raica na koniferedi me dua na madigi meda ciqoma kina na itukutuku eso mai vua na Turaga Vakaikoya? Mai na vosa kei na sereivakatagi ni koniferedi raraba, sa rawa ni da namaka meda ciqoma na noda dui isaunitaro ki na taro se leqa cavaga eso eda rairai sotava voli.

Kevaka o vakananuma tu de na vosa vakaidina vei iko na Tamada Vakalomalagi, au via vakananumi iko ena veivosa rawarawa ka momona era dau lagata na noda gone ena Lalai: “[Ko] luve ni Kalou, ka sa talai [iko] mai.” Sa Nona inaki me vukei iko ni lesu ki “na bula vou ko ya.”

Kevaka o torova na Tamada Vakalomalagi vaka na Luvena, sa rawa ni o kerei Koya ena yalo malua, “Meu tuberi, ka liutaki, tiko tiko ga. Meu vulica rawa tu.” Ena vosa vei iko o Koya mai na Nona Yalo Tabu, ka sa na qai vakatau vei iko “ni cakava na lomana.” Au yalataka ni kevaka o cakava, “na veivakalougatataki levu sa nomu.”⁵

Na veituberi ni Turaga sa gadrevi vakalevu edaidai mai na kena sa vaka tu kina ena itukutuku ni veigauna kei vuravura. Ni da vakavakarau ni rogoca na vosa ni Turaga, meda sa vakasaqara vagumatua na Yalo ni ka dina ka ni gauna e vosa kina na Turaga mai vei ira na Nona italai, sa rawa ni da kila deivaki, vakacegui tu, ka marau vakatautauvata.⁶

Au vakadinadinataka ni “kena vakayacori na veika oqo, ena sega kina ni rawai [keda] na matamata mai eli; ia na Turaga na Kalou ena vakatalabusesetaka na kaukauwa ni butobuto e [matada]; ka na vakavuna me yavavala ko lomalagi ena [vukuda], me vakalagilagi kina na yacana.”⁷

© 2018 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/17. Vakadonui me vakadewa: 6/17. Vakadewa ni First Presidency Message, March 2018. Fijian. 15049 858

Veivakavulici mai na iTukutuku Oqo

Sa rawa ni da ciqoma na noda isaunitaro vakaikeda ki na taro kei na leqa eso ena gauna ni koniferedi raraba ni da vakarorogo kivei ira na italai lesi ni Kalou. Navuca ni veivosakitaka na ka oqo vata kei ira o vakatavulica: O rawa vakacava ni vakavakarau ni ciqoma na isaunitaro vakaoya ena gauna ni koniferedi raraba? Sa vakauqeti keda o Peresitedi Uchtdorf meda “vakasaqara vagumatua na Yalo ni ka dina.” Na cava o nanuma ni kena ibalebale, ka rawa ni o biuta vata vakacava oqo ki na nomu vakavakarau? Me ikuri ki na veivakalougatataki e tukuni ena Vunau kei na Veiyalayalati 21:6, na veivakalougatataki cava tale e basika mai ni o vakavakarau ni rogoca na vosa ni Turaga mai vei ira na Nona italai? Sa rawa ni o sureti ira o vakatavulica mera vola ki na dua na ivolaniveisiga na ka e vakatavulica vei ira na Yalotabu ena koniferedi raraba oqo.