សារលិខិតបង្រៀនសួរសុខទុក្ខ ខែ មីនា ឆ្នាំ ២០១៨
អធិស្ឋានសម្រាប់បងប្អូនស្រីម្នាក់ៗតាមឈ្មោះ
ក្ដីស្រឡាញ់ និង ការបំផុសគំនិតដែលយើងមានចំពោះពួកគេនឹងកើនឡើង នៅពេលយើងអធិស្ឋានដោយរាបសាសម្រាប់បងប្អូនស្រីម្នាក់ៗតាមឈ្មោះជាក់លាក់ ។
សេចក្ដីជំនឿ ក្រុមគ្រួសារ ការសង្គ្រោះ
ព្រះគម្ពីរមាននូវគំរូនៃបុរស និង ស្ត្រីដែលបានអធិស្ឋានសម្រាប់មនុស្សដទៃតាមឈ្មោះ ។ ក្នុងចំណោមមនុស្សដែលត្រូវការជំនួយបំផុត គឺឪពុករបស់អាលម៉ាកូន ។ ទេវតាមួយអង្គបានមានបន្ទូលទៅកាន់អាលម៉ាកូនថា ឪពុករបស់គាត់ « បានអធិស្ឋានដោយសេចក្ដីជំនឿដ៏ជោគជាំអំពីអ្នក … ហេតុដូច្នេះហើយ ដោយគោលបំណងនេះហើយដែលខ្ញុំបានមកបរិវត្តអ្នកអំពីព្រះចេស្ដា និងសិទ្ធិអំណាចនៃព្រះ ដើម្បីឲ្យពាក្យអធិស្ឋានទាំងឡាយរបស់ពួកអ្នកបម្រើរបស់ទ្រង់ អាចបានឆ្លើយតបស្របតាមសេចក្ដីជំនឿរបស់គេ » ( ម៉ូសាយ ២៧:១៤ ) ។
ការអធិស្ឋានសម្រាប់គ្នាទៅវិញទៅមក បើកដួងចិត្តយើងឲ្យទទួលពរជ័យ ដែលព្រះអម្ចាស់សព្វព្រះទ័យប្រទានឲ្យយើង ។ « គោលបំណងនៃការអធិស្ឋាន គឺមិនមែនដើម្បីផ្លាស់ប្តូរព្រះហឫទ័យរបស់ព្រះឡើយ ប៉ុន្តែដើម្បីនឹងទទួលសម្រាប់ខ្លួនយើង និង សម្រាប់អ្នកដទៃនូវព្រះពរនានា ដែលព្រះពិតជាប្រទានឲ្យ ប៉ុន្តែគឺយើងត្រូវតែសូមដើម្បីឲ្យបានទទួល » ។១
បងប្អូនស្រីម្នាក់បានប្រាប់ថា អំឡុងគ្រាដ៏លំបាកក្នុងជីវិត ជាញឹកញាប់មានការទូរសព្ទ ឬ ផ្ញើសារមកពីគ្រូបង្រៀនសួរសុខទុក្ខរបស់គាត់នៅ « ថ្ងៃនៃទុក្ខវេទនា » ។ ពួកគេហាក់ដូចជាដឹងនៅពេលដែលគាត់ត្រូវការការលើកស្ទួយ ។ នាងបានដឹងថា ពួកគេបានអធិស្ឋានសម្រាប់គាត់ ទាំងអំឡុងពេលមកសួរសុខទុក្ខ និង ដោយខ្លួនពួកគេផ្ទាល់ ។
ជូលី ប៊ី ប៊េក ជាអតីតប្រធានសមាគសង្គ្រោះទូទៅ បានមានប្រសាសន៍ថា « សូមគិតអំពីអំណាចរួមគ្នា នៅពេលបងប្អូនស្រីគ្រប់រូបអធិស្ឋានដោយចិត្តស្មោះសរាល់ព្រឹក និង រាល់រាត្រី ហើយកាន់តែប្រសើរទៅទៀតនោះអធិស្ឋានដោយឥតឈប់ឈរ ព្រោះព្រះអម្ចាស់បានត្រាស់បង្គាប់ដូច្នោះ » ។២ ការអធិស្ឋានសម្រាប់មនុស្សដែលយើងបង្រៀន នឹងពង្រឹងយើងជាបុគ្គល និង ជាស្ត្រីពួកបរិសុទ្ធថ្ងៃចុងក្រោយ ។
ប្រធាន ហិនរី ប៊ី អាវរិង ជាទីប្រឹក្សាទីមួយក្នុងគណៈប្រធានទីមួយ បានមានប្រសាសន៍ថា « អធិស្ឋានដើម្បីដឹងរបៀបស្គាល់ដួងចិត្តរបស់ពួកគេ ។ … អ្នកនឹងត្រូវដឹងថាតើព្រះសព្វព្រះទ័យឲ្យអ្នកធ្វើដូចម្ដេច ដើម្បីជួយពួកគេ ហើយធ្វើកិច្ចការនោះទាំងអស់ តាមដែលអ្នកអាចធ្វើទៅបាន ដោយទទួលអារម្មណ៍ក្ដីស្រឡាញ់នៃព្រះមានចំពោះពួកគេ » ។៣
© 2018 by Intellectual Reserve, Inc. All rights reserved . បានបោះពុម្ពនៅ ស.រ.អា. ។ អនុមតិជាភាសាអង់គ្លេស ៖ ៦/១៧ ។ អនុមតិឲ្យបកប្រែ ៖ ៦/១៧ ។ ការបកប្រែនៃ Visiting Teaching Principles, March 2018. Cambodian. 15049 258