យុវវ័យ
រៀបចំខ្លួនស្ដាប់ព្រះសូរសៀងរបស់ព្រះ
ប្រធាន អុជដូហ្វ ពន្យល់អំពីកិច្ចការដំបូងដែលព្រះបានធ្វើបន្ទាប់ពីទ្រង់បានបង្កើតមនុស្សប្រុស និង ស្រី ដែលជាការមានបន្ទូលទៅពួកគេ ហើយប្រទានឲ្យពួកគេនូវដំណឹង និង ការណែនាំនានាដ៏មានតម្លៃ ។ យើងទទួលបានពរជ័យដូចគ្នានោះនៅក្នុងសន្និសីទទូទៅខែមេសា និង ខែតុលា ជាពេលដែលថ្នាក់ដឹកនាំសាសនាចក្រថ្លែងមកកាន់យើង ហើយផ្ដល់ដំបូន្មានដែលព្រះអម្ចាស់សព្វព្រះទ័យឲ្យយើងស្តាប់ឮ ។
តើអ្នកធ្លាប់ឮព្រះសូរសៀងរបស់ព្រះអម្ចាស់ តាមរយៈអ្នកបម្រើរបស់ទ្រង់អំឡុងសន្និសីទទូទៅដែរឬទេ ? តើអ្នកធ្លាប់ទទួលអារម្មណ៍ថា សារលិខិតជាក់លាក់មួយបានផ្ដល់ចម្លើយដែលអ្នកបានស្វែងរកដែរឬទេ ? អ្នកអាចសរសេរបទពិសោធន៍នោះនៅក្នុងកំណត់ហេតុ និងរបៀបដែលវាបានជួយអ្នក ។ បន្ទាប់មក រៀបចំខ្លួនស្ដាប់ព្រះសូរសៀងរបស់ព្រះអម្ចាស់នៅក្នុងសន្និសីទដែលនឹងមកដល់ តាមរយៈការសរសេរសំណួរដែលអ្នកមាន និង ការសិក្សាអំពីសំណួរទាំងនោះអំឡុងការសិក្សាព្រះគម្ពីររបស់អ្នក ។ សូមអធិស្ឋានទៅព្រះវរបិតាសួគ៌ ដោយទូលសូមចម្លើយ និង ការយល់ដឹងអំឡុងសន្និសីទ ។ នៅពេលអ្នកស្ដាប់អ្នកបម្រើរបស់ព្រះអម្ចាស់ សូមផ្ដោតអារម្មណ៍ទៅលើការបំផុសគំនិតផ្ទាល់ខ្លួន ។ តើអ្នកបានរៀនអ្វីខ្លះ ? តើអ្នកបានមានអារម្មណ៍បំផុសគំនិតឲ្យផ្លាស់ប្ដូរដូចម្ដេចខ្លះ ? សូមសរសេរការបំផុសគំនិតទាំងនោះ ព្រោះព្រះវិញ្ញាណកំពុងតែមានបន្ទូលមកកាន់អ្នកហើយ !
សូមចងចាំជានិច្ចថា ព្រះវរបិតាសួគ៌ស្រឡាញ់អ្នក ហើយទ្រង់នឹងដឹកនាំអ្នកទៅតាមទិសដៅត្រឹមត្រូវ ។ នៅពេលអ្នកព្យាយាមស្ដាប់ព្រះសូរសៀងរបស់ព្រះអម្ចាស់តាមរយៈអ្នកបម្រើទ្រង់ អ្នកនឹងមានពរ ហើយត្រូវបានស្អាងឡើង ។