សារលិខិតគណៈប្រធានទីមួយ ខែ មីនា ឆ្នាំ ២០១៨
ព្រះបន្ទូលនៃព្រះចំពោះបុត្រាបុត្រីទ្រង់
បទគម្ពីរប្រាប់យើងថា កិច្ចការដំបូងដែលព្រះបានធ្វើបន្ទាប់ពីទ្រង់បានបង្កើតបុរស និង ស្ត្រី នោះគឺការមានបន្ទូលទៅកាន់ពួកគេ ។១ ទ្រង់មានដំណឹងដ៏សំខាន់ និង ការណែនាំដ៏មានតម្លៃ ដែលត្រូវប្រទានដល់ពួកគេ ។ ទ្រង់គ្មានព្រះរាជបំណងធ្វើឲ្យពួកគេទទួលបន្ទុក ឬ ព្រួយបារម្ភនោះទេ ប៉ុន្តែទ្រង់ដឹកនាំពួកគេទៅរកសុភមង្គល និង សិរីល្អអស់កល្បជានិច្ចវិញ ។
ហើយនោះគ្រាន់តែជាការចាប់ផ្ដើមប៉ុណ្ណោះ ។ តាំងពីពេលនោះមកដល់ពេលនេះ ព្រះបានបន្តទំនាក់ទំនងរបស់ទ្រង់ជាមួយនឹងបុត្រាបុត្រីទ្រង់ ។ ព្រះបន្ទូលទ្រង់ត្រូវបានរក្សាទុក ឲ្យតម្លៃ និង សិក្សាដោយពួកសិស្សគ្រប់ជំនាន់ ។ វាត្រូវបានទទួលស្គាល់ដោយអស់អ្នកទាំងឡាយណា ដែលព្យាយាមស្គាល់ព្រះឆន្ទៈរបស់ព្រះ ហើយបន្ទូលទាំងនោះធ្វើជាសាក្សីអំពីសេចក្ដីពិតថា « ព្រះយេហូវ៉ា ទ្រង់នឹងមិនធ្វើអ្វីដូច្នោះឡើយ លើកតែទ្រង់សម្ដែងឲ្យពួកហោរា ជាអ្នកបម្រើទ្រង់ ឃើញគំនិតលាក់កំបាំងរបស់ទ្រង់ » ។២
ការណ៍នេះបានក្លាយជារបៀបមួយតាំងពីគ្រាដំបូងមកម៉្លេះ ហើយបន្តមករៀងដរាបមកដល់សព្វថ្ងៃនេះ ។ វាមិនគ្រាន់តែជាដំណើររឿងគួរឲ្យចាប់អារម្មណ៍ក្នុងព្រះគម្ពីរប៊ីបនោះទេ វាថែមទាំងជារបៀបដែលបានបង្កើតដោយព្រះក្នុងការប្រទានសារលិខិតដ៏ចាំបាច់ៗដល់បុត្រាបុត្រីទ្រង់ ។ ទ្រង់បានលើកបុគ្គលទាំងឡាយចេញពីចំណោមពួកយើង ត្រាស់ហៅពួកលោកឲ្យធ្វើជាព្យាការី ហើយប្រទានបន្ទូលឲ្យពួកលោកថ្លែង ជាព្រះបន្ទូលដែលអញ្ជើញយើងឲ្យ « ទទួលហាក់ដូចជាបានមកពីព្រះឱស្ឋ [ របស់ទ្រង់ ] ផ្ទាល់ » ។៣ ទ្រង់បានមានបន្ទូលថា « ទោះជាដោយសំឡេងរបស់យើងផ្ទាល់ ឬក៏ដោយសំឡេងនៃពួកអ្នកបម្រើរបស់យើងក្ដី គឺដូចតែគ្នា » ។៤
នេះគឺជាសារលិខិតដ៏រុងរឿងបំផុត ដែលមានការលើកទឹកចិត្ត និង ពេញដោយក្ដីសង្ឃឹមនៃការស្ដារឡើងវិញថា—ព្រះទ្រង់មិនគង់នៅស្ងៀមឡើយ ! ទ្រង់ស្រឡាញ់បុត្រាបុត្រីរបស់ទ្រង់ ។ ទ្រង់មិនទុកយើងឲ្យវង្វេងនៅក្នុងភាពងងឹតឡើយ ។
ពីរដងក្នុងមួយឆ្នាំ ក្នុងខែមេសា និង ខែតុលា យើងមានឱកាសស្ដាប់ព្រះសូរសៀងរបស់ព្រះអម្ចាស់ តាមរយៈពួកអ្នកបម្រើទ្រង់នៅក្នុងសន្និសីទទូទៅដ៏អស្ចារ្យរបស់យើង ។
ខ្ញុំសូមធ្វើជាសាក្សីថា ពីមុនអ្នកថ្លែងសុន្ទរកថាម្នាក់ក្នុងសន្និសីទទូទៅដើរទៅឯវេទិកានិយាយ នោះគាត់បានចំណាយពេលជាយូរក្នុងការខិតខំ ការអធិស្ឋាន និង ការសិក្សាយ៉ាងសស្រាក់សស្រាំ ដើម្បីឆ្លើយតបទៅនឹងការចាត់តាំងឲ្យឡើងថ្លែងសុន្ទរកថា ។ រាល់សារលិខិតសន្និសីទទូទៅ បង្ហាញឲ្យឃើញចំនួនម៉ោងនៃការរៀបចំដែលមិនអាចគណនាបាន និង ការទូលអង្វរអស់ពីដួងចិត្ត ដើម្បីយល់អំពីសេចក្ដីដែលព្រះអម្ចាស់សព្វព្រះទ័យឲ្យពួកបរិសុទ្ធរបស់ទ្រង់ស្ដាប់ឮ ។
តើអ្វីដែលអាចនឹងកើតឡើង ប្រសិនបើការរៀបចំរបស់យើងក្នុងនាមជាអ្នកស្ដាប់ ដូចនឹងការរៀបចំរបស់អ្នកឡើងនិយាយ ? តើការឆ្ពោះទៅរកសន្និសីទទូទៅ អាចមានសភាពខុសគ្នាដូចម្ដេច ប្រសិនបើយើងចាត់ទុកវាជាឱកាសមួយដើម្បីទទួលបានសារលិខិតពីព្រះអម្ចាស់ផ្ទាល់ ? តាមរយៈទំនុកបទ និង ទំនុកភ្លេងក្នុងសន្និសីទទូទៅ យើងអាចរំពឹងថានឹងទទួលបានចម្លើយផ្ទាល់ខ្លួនសម្រាប់រាល់សំណួរ ឬ បញ្ហាដែលយើងអាចនឹងកំពុងប្រឈមមុខ ។
ប្រសិនបើអ្នកធ្លាប់ឆ្ងល់ថា តើព្រះវរបិតាសួគ៌នឹងមានបន្ទូលទៅកាន់អ្នកឬអត់នោះ ខ្ញុំសូមរំឭកអ្នកអំពីទំនុកបទដ៏សាមញ្ញ ប៉ុន្តែមានន័យជ្រៅ ដែលកុមាររបស់យើងច្រៀងថា « [ អ្នកជា ] កូនរបស់ព្រះ ហើយទ្រង់បានចាត់ [ អ្នក ] មក » ។ ព្រះរាជបំណងទ្រង់គឺដើម្បីជួយអ្នកឲ្យត្រឡប់ទៅ « រស់នៅនឹងទ្រង់ » ។
ប្រសិនបើអ្នកទៅរកព្រះវរបិតាសួគ៌ក្នុងនាមជាបុត្ររបស់ទ្រង់ អ្នកអាចទូលសូមទ្រង់ដោយចិត្តស្មោះសថា « នាំខ្ញុំ ដឹកខ្ញុំ ដើរនៅក្បែរខ្ញុំ ជួយខ្ញុំឲ្យរកផ្លូវ ។ បង្រៀនខ្ញុំអ្វីដែលត្រូវធ្វើ » ។ ទ្រង់នឹងមានបន្ទូលទៅកាន់អ្នកតាមរយៈព្រះវិញ្ញាណបរិសុទ្ធរបស់ទ្រង់ បន្ទាប់មក វាអាស្រ័យទៅលើអ្នកដើម្បី « ធ្វើតាមព្រះហឫទ័យទ្រង់ » ។ ខ្ញុំសូមសន្យាថា ប្រសិនបើអ្នកធ្វើដូចនេះ « ទ្រង់នឹងប្រទានពរ » ។៥
ការដឹកនាំរបស់ព្រះអម្ចាស់គឺចាំបាច់ណាស់ក្នុងពេលបច្ចុប្បន្ននេះ ដូចដែលវាធ្លាប់មានក្នុងប្រវត្តិសាស្ត្រពិភពលោកដែរ ។ នៅពេលយើងត្រៀមខ្លួនស្ដាប់ព្រះបន្ទូលរបស់ព្រះអម្ចាស់ សូមឲ្យយើងស្វែងរកដោយឧស្សាហ៍នូវស្មារតីនៃសេចក្ដីពិត ប្រយោជន៍ឲ្យនៅពេលព្រះអម្ចាស់មានព្រះបន្ទូលតាមរយៈអ្នកបម្រើទ្រង់ នោះយើងអាចយល់ ត្រូវបានស្អាងឡើង ហើយត្រេកអរជាមួយគ្នា ។៦
ខ្ញុំសូមថ្លែងទីបន្ទាល់ថា « ដោយសារការធ្វើការទាំងនេះហើយ ទ្វារស្ថាននរកនឹងពុំដែលឈ្នះ [ យើង ] ឡើយ មែនហើយ ហើយព្រះអម្ចាស់ដ៏ជាព្រះ ទ្រង់នឹងកម្ចាត់អំណាចនៃសេចក្ដីងងឹតចេញពី [ យើង ] ទៅ ហើយនឹងបណ្ដាលឲ្យផ្ទៃមេឃញាប់ញ័រ ដើម្បីសេចក្ដីល្អដល់ [ យើង ] និងសិរីល្អដល់ព្រះនាមរបស់ទ្រង់ » ។៧
© 2018 by Intellectual Reserve, Inc. All rights reserved. បានបោះពុម្ពនៅ ស.រ.អា. ។ អនុមតិជាភាសាអង់គ្លេស ៖ ៦/១-៧ ។ អនុមតិឲ្យបកប្រែ ៖ ៦/១៧ ។ ការបកប្រែនៃ First Presidency Message, March 2018. Cambodian. 15049 258