ຫລັກທຳຂອງຂ່າວສານການຢ້ຽມສອນ, ເດືອນມິນາ 2018
ອະທິຖານເພື່ອເອື້ອຍນ້ອງແຕ່ລະຄົນ ໂດຍການເອີ່ຍຊື່ຂອງນາງ
ເຮົາຈະມີຄວາມຮັກ ແລະ ເປັນຫ່ວງເປັນໃຍຕໍ່ຄົນທີ່ເຮົາໄປຢ້ຽມສອນຫລາຍຂຶ້ນ ເມື່ອເຮົາອະທິຖານຢ່າງຖ່ອມຕົວເພື່ອເອື້ອຍນ້ອງແຕ່ລະຄົນໂດຍສະເພາະ ໂດຍການເອີ່ຍຊື່ຂອງນາງ.
ສັດທາ, ຄອບຄົວ, ສົງເຄາະ
ພຣະຄຳພີມີຫລາຍຕົວຢ່າງກ່ຽວກັບຊາຍ ແລະ ຍິງ ຜູ້ໄດ້ອະທິຖານເພື່ອຄົນອື່ນໂດຍການເອີ່ຍຊື່ຂອງເຂົາເຈົ້າ. ໃນບັນດາຕົວຢ່າງທີ່ເຫັນໄດ້ງ່າຍ ແມ່ນບິດາຂອງແອວມາຜູ້ເປັນລູກ. ທູດອົງໜຶ່ງໄດ້ກ່າວກັບແອວມາຜູ້ເປັນລູກ, ບອກໃຫ້ເພິ່ນຮູ້ວ່າ ບິດາຂອງເພິ່ນ “ໄດ້ອະທິຖານດ້ວຍສັດທາກ່ຽວກັບເຈົ້າ … ; ສະນັ້ນ, ເພື່ອຈຸດປະສົງນີ້ ເຮົາຈຶ່ງມາເຮັດໃຫ້ເຈົ້າສຳນຶກເຖິງອຳນາດ ແລະ ສິດອຳນາດຂອງພຣະເຈົ້າ, ເພື່ອໃຫ້ຄຳອະທິຖານຂອງຜູ້ຮັບໃຊ້ຂອງພຣະອົງໄດ້ຮັບຄຳຕອບຕາມສັດທາຂອງພວກເຂົາ” (ໂມໄຊຢາ 27:14).
ການອະທິຖານເພື່ອກັນແລະກັນ ເປີດໃຈເຮົາໃຫ້ຮັບເອົາພອນທີ່ພຣະຜູ້ເປັນເຈົ້າປະສົງທີ່ຈະມອບໃຫ້ເຮົາ. “ຈຸດປະສົງຂອງການອະທິຖານ ບໍ່ແມ່ນເພື່ອປ່ຽນພຣະປະສົງຂອງພຣະເຈົ້າ, ແຕ່ເພື່ອຮັບປະກັນໃຫ້ຕົວເຮົາເອງ ແລະ ເພື່ອຄົນອື່ນ ໃນພອນຕ່າງໆທີ່ພຣະເຈົ້າເຕັມພຣະໄທທີ່ຈະປະທານໃຫ້, ແຕ່ເຮົາຕ້ອງທູນຂໍກ່ອນຈະໄດ້ຮັບມັນ.”1
ນາງຄົນໜຶ່ງໄດ້ບອກວ່າ ລະຫວ່າງຕອນທີ່ຊີວິດຂອງນາງມີຄວາມຫຍຸ້ງຍາກຫລາຍ, ໂທລະສັບ ແລະ ຂໍ້ຄວາມສັ້ນໆໃນມືຖື ຈາກຄູຢ້ຽມສອນຂອງນາງ ສ່ວນຫລາຍແລ້ວມັກຈະໄດ້ຮັບໃນ “ມື້ທີ່ມືດມົວໂດຍສະເພາະ.” ເຂົາເຈົ້າຄືວ່າຮູ້ສຶກໄດ້ ຕອນທີ່ນາງຕ້ອງການກຳລັງໃຈ. ນາງຮູ້ວ່າ ເຂົາເຈົ້າໄດ້ອະທິຖານເພື່ອນາງ, ທັງລະຫວ່າງການມາຢ້ຽມສອນ ແລະ ໃນເວລາສ່ວນຕົວຂອງເຂົາເຈົ້າ.
“ໃຫ້ຄິດເບິ່ງດູວ່າ ພະລັງຂອງພວກເຮົາຈະໃຫຍ່ໂຕພຽງໃດ ຖ້າເອື້ອຍນ້ອງແຕ່ລະຄົນອະທິຖານດ້ວຍຄວາມຈິງໃຈ ທັງເຊົ້າ ແລະ ແລງ, ຫລື ຍິ່ງໄປກວ່ານັ້ນ, ອະທິຖານຢ່າງບໍ່ລົດລະ ຕາມທີ່ພຣະຜູ້ເປັນເຈົ້າບັນຊາ,” ຈູລີ ບີ ແບັກ, ອະດີດປະທານສະມາຄົມສະຕີສົງເຄາະສາມັນ ໄດ້ກ່າວ.2 ການອະທິຖານເພື່ອຄົນທີ່ເຮົາໄປຢ້ຽມສອນ ຈະເພີ່ມຄວາມເຂັ້ມແຂງໃຫ້ເຮົາເປັນສ່ວນບຸກຄົນ ແລະ ໃຫ້ສະຕີໄພ່ພົນຍຸກສຸດທ້າຍເປັນກຸ່ມກ້ອນດ້ວຍ.
ປະທານເຮັນຣີ ບີ ໄອຣິງ, ທີ່ປຶກສາທີໜຶ່ງໃນຝ່າຍປະທານສູງສຸດ, ໄດ້ກ່າວວ່າ: “ຕ້ອງອະທິຖານເພື່ອຈະໄດ້ຮູ້ຈັກຄວາມໃນໃຈຂອງເຂົາເຈົ້າ. … ທ່ານຈະຕ້ອງຮູ້ຈັກສິ່ງທີ່ພຣະເຈົ້າປະສົງໃຫ້ທ່ານເຮັດ ເພື່ອຊ່ວຍເຫລືອເຂົາເຈົ້າ ແລະ ເຮັດຈົນສຸດຄວາມສາມາດຂອງທ່ານ, ໂດຍມີຄວາມຮັກຂອງພຣະເຈົ້າຕໍ່ເຂົາເຈົ້າ.”3
© 2018 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Visiting Teaching Principles, March 2018. Laotian. 15049 331