ຂ່າວສານຈາກຝ່າຍປະທານສູງສຸດ, ເດືອນມິນາ 2018
ພຣະຄຳຂອງພຣະເຈົ້າຕໍ່ລູກໆຂອງພຣະອົງອົງ
ໂດຍ ປະທານດີເດີ ແອັຟ ອຸກດອບ
ທີ່ປຶກສາທີສອງໃນຝ່າຍປະທານສູງສຸດ
ພຣະຄຳພີບອກເຮົາວ່າ ສິ່ງທຳອິດທີ່ພຣະເຈົ້າໄດ້ກະທຳ ຫລັງຈາກໄດ້ສ້າງຊາຍ ແລະ ຍິງ ແມ່ນໄດ້ກ່າວກັບພວກເຂົາ.1 ພຣະອົງມີຂໍ້ມູນທີ່ສຳຄັນ ແລະ ຄຳແນະນຳທີ່ມີຄ່າ ທີ່ຈະມອບໃຫ້ພວກເຂົາ. ຈຸດປະສົງຂອງພຣະອົງ ບໍ່ແມ່ນເພື່ອໃຫ້ພວກເຂົາມີພາລະ ຫລື ໃຫ້ກັງວົນ ແຕ່ເພື່ອຊີ້ນຳພວກເຂົາໃຫ້ມີຄວາມສຸກ ແລະ ໃຫ້ມີລັດສະໝີພາບນິລັນດອນ.
ແລະ ນັ້ນເປັນພຽງຂັ້ນເລີ່ມຕົ້ນເທົ່ານັ້ນ. ຈາກວັນນັ້ນ ຈົນເຖິງວັນນີ້, ພຣະເຈົ້າໄດ້ສືບຕໍ່ສື່ສານກັບລູກໆຂອງພຣະອົງ. ພຣະຄຳຂອງພຣະອົງໄດ້ຖືກຮັກສາໄວ້, ໄດ້ຖືກທະນຸຖະໜອມ, ແລະ ໄດ້ຖືກສຶກສາ ໂດຍສານຸສິດຂອງຄົນທຸກລຸ້ນ. ພຣະຄຳຖືກເຄົາລົບໂດຍຜູ້ຄົນທີ່ສະແຫວງຫາຢາກຮູ້ຈັກພຣະປະສົງຂອງພຣະເຈົ້າ, ແລະ ພຣະຄຳໄດ້ເປັນພະຍານເຖິງຄວາມຈິງວ່າ “ອົງພຣະຜູ້ເປັນເຈົ້າບໍ່ໄດ້ເຮັດສິ່ງໃດ ໂດຍບໍ່ບອກແຈ້ງໃຫ້ຮູ້ລ່ວງໜ້າ ເຖິງແຜນການຂອງພຣະອົງແກ່ສາດສະດາ ຄືຜູ້ຮັບໃຊ້ຂອງພຣະອົງ.”2
ນີ້ຄືແບບແຜນນັບຕັ້ງແຕ່ດຶກດຳບັນເປັນຕົ້ນມາ, ແລະ ແບບແຜນນີ້ກໍຍັງມີຢູ່ໃນທຸກວັນນີ້. ມັນບໍ່ແມ່ນພຽງແຕ່ເລື່ອງພຣະຄຣິສຕະທຳຄຳພີທີ່ດີເທົ່ານັ້ນ, ມັນແມ່ນວິທີທີ່ພຣະເຈົ້າໄດ້ສ້າງຂຶ້ນ ເພື່ອສົ່ງຂ່າວສານທີ່ຈຳເປັນເຖິງລູກໆຂອງພຣະອົງ. ພຣະອົງໄດ້ຍົກບາງຄົນຂຶ້ນໃນທ່າມກາງພວກເຮົາ, ເອີ້ນພວກເພິ່ນໃຫ້ເປັນສາດສະດາ, ແລະ ມອບພຣະຄຳໃຫ້ພວກເພິ່ນກ່າວ, ຊຶ່ງພວກເຮົາໄດ້ຖືກເຊື້ອເຊີນໃຫ້ຮັບເອົາ, ຄືກັນກັບວ່າ ມັນມາຈາກພຣະໂອດຂອງພຣະອົງເອງ.3 ພຣະອົງໄດ້ປະກາດວ່າ ບໍ່ວ່າຈະເປັນໂດຍສຸລະສຽງຂອງພຣະອົງ ຫລື ໂດຍສຽງຂອງຜູ້ຮັບໃຊ້ຂອງພຣະອົງ, ມັນກໍເໝືອນກັນ.4
ນີ້ແມ່ນຂ່າວສານທີ່ປະເສີດ, ຊຸກຍູ້, ແລະ ໃຫ້ຄວາມຫວັງຫລາຍທີ່ສຸດແຫ່ງການຟື້ນຟູ—ພຣະເຈົ້າບໍ່ໄດ້ມິດງຽບຢູ່! ພຣະອົງຮັກລູກໆຂອງພຣະອົງ. ພຣະອົງບໍ່ໄດ້ປ່ອຍເຮົາໃຫ້ເດີນໄປໃນຄວາມມືດ.
ປີລະສອງເທື່ອ, ໃນເດືອນເມສາ ແລະ ເດືອນຕຸລາ, ເຮົາໄດ້ມີໂອກາດທີ່ຈະໄດ້ຍິນສຸລະສຽງຂອງພຣະຜູ້ເປັນເຈົ້າ ຜ່ານທາງຜູ້ຮັບໃຊ້ຂອງພຣະອົງ ໃນກອງປະຊຸມໃຫຍ່ສາມັນທີ່ດີເລີດ.
ຂ້າພະເຈົ້າເປັນພະຍານໄດ້ວ່າ ກ່ອນຜູ້ກ່າວປາໄສຢູ່ໃນກອງປະຊຸມໃຫຍ່ສາມັນ ຈະຍ່າງຂຶ້ນໄປຫາແທ່ນປາໄສນັ້ນ, ເພິ່ນໄດ້ໃຊ້ຄວາມພະຍາຍາມຢ່າງຫລວງຫລາຍ, ທັງອະທິຖານ, ແລະ ສຶກສາ ໃນການຕອບຮັບຕໍ່ການມອບໝາຍທີ່ຈະໃຫ້ກ່າວປາໄສ. ແຕ່ລະຂ່າວສານໃນກອງປະຊຸມໃຫຍ່ ປະກອບດ້ວຍຫລາຍຊົ່ວໂມງຈົນນັບບໍ່ຖ້ວນ ໃນການຕຽມ ແລະ ອ້ອນວອນດ້ວຍຄວາມຈິງຈິງ ເພື່ອຂໍຄວາມເຂົ້າໃຈ ເຖິງສິ່ງທີ່ພຣະຜູ້ເປັນເຈົ້າປະສົງໃຫ້ໄພ່ພົນຂອງພຣະອົງໄດ້ຍິນ.
ອາດມີຫຍັງເກີດຂຶ້ນ ຖ້າຫາກເຮົາຜູ້ຮັບຊົມຮັບຟັງ ຕຽມຕົວຂອງເຮົາເອງເພື່ອຮັບຟັງ ຄືກັນກັບຜູ້ປາໄສໄດ້ຕຽມກ່າວ? ເຮົາອາດຈະຮູ້ສຶກແຕກຕ່າງແນວໃດກ່ຽວກັບກອງປະຊຸມໃຫຍ່ສາມັນ ຖ້າຫາກເຮົາເຫັນກອງປະຊຸມໃຫຍ່ວ່າ ເປັນໂອກາດທີ່ຈະໄດ້ຮັບຂ່າວສານຈາກພຣະຜູ້ເປັນເຈົ້າເອງ? ຜ່ານທາງຖ້ອຍຄຳ ແລະ ເພງໃນກອງປະຊຸມໃຫຍ່ສາມັນ, ເຮົາສາມາດຄາດໝາຍໄດ້ວ່າ ຈະໄດ້ຮັບຄຳຕອບໂດຍສະເພາະ ຕໍ່ຄຳຖາມ ຫລື ບັນຫາໃດໆກໍຕາມ ທີ່ເຮົາປະເຊີນຢູ່.
ຖ້າຫາກທ່ານເຄີຍສົງໄສວ່າ ພຣະບິດາເທິງສະຫວັນຈະກ່າວກັບທ່ານແທ້ໆບໍ, ຂ້າພະເຈົ້າຂໍເຕືອນທ່ານເຖິງຂໍ້ຄວາມທີ່ລຽບງ່າຍ ແຕ່ເລິກຊຶ້ງຂອງເພງຊັ້ນປະຖົມໄວ ທີ່ວ່າ: “[ທ່ານເປັນ] ລູກຂອງພຣະເຈົ້າ, ພຣະອົງສົ່ງ [ທ່ານ] ມານີ້.” ຈຸດປະສົງຂອງພຣະອົງ ຄືທີ່ຈະຊ່ວຍທ່ານກັບຄືນໄປ “ເພື່ອຢູ່ກັບພຣະອົງອີກ.”
ຖ້າຫາກທ່ານເຂົ້າຫາພຣະບິດາເທິງສະຫວັນໃນຖານະທີ່ເປັນລູກຂອງພຣະອົງ, ແລ້ວທ່ານຈະສາມາດທູນຖາມພຣະອົງດ້ວຍໃຈຈິງ ໃຫ້, “ພາເຮົາ, ນຳເຮົາ, ຍ່າງຄຽງຂ້າງເຮົາ, ຊ່ວຍເຮົາໃຫ້ພົບທາງ. ສອນເຮົາທຸກຢ່າງທີ່ຕ້ອງເຮັດ.” ພຣະອົງຈະກ່າວກັບທ່ານຜ່ານທາງພຣະວິນຍານບໍລິສຸດຂອງພຣະອົງ, ແລະ ເມື່ອນັ້ນ ທ່ານ “ຈະເຮັດຕາມພຣະປະສົງຂອງພຣະອົງ.” ຂ້າພະເຈົ້າສັນຍາວ່າ ຖ້າຫາກທ່ານເຮັດ, “ພຣະພອນຈະເຝົ້າຄອຍລໍຖ້າ.”5
ການຊີ້ນຳຂອງພຣະຜູ້ເປັນເຈົ້າ ແມ່ນຈຳເປັນຫລາຍໃນທຸກວັນນີ້ ເທົ່າກັບທີ່ຜ່ານມາ ໃນປະຫວັດສາດຂອງໂລກ. ເມື່ອເຮົາຕຽມພ້ອມທີ່ຈະຮັບຟັງພຣະຄຳຂອງພຣະຜູ້ເປັນເຈົ້າ, ຂໍໃຫ້ເຮົາຈົ່ງສະແຫວງຫາພຣະວິນຍານແຫ່ງຄວາມຈິງຢ່າງພາກພຽນ ເພື່ອວ່າເມື່ອພຣະຜູ້ເປັນເຈົ້າກ່າວຜ່ານທາງຜູ້ຮັບໃຊ້ຂອງພຣະອົງ, ເຮົາຈະສາມາດເຂົ້າໃຈ, ໄດ້ຮັບການຮຽນຮູ້, ແລະ ປິຕິຍິນດີນຳກັນ.6
ຂ້າພະເຈົ້າເປັນພະຍານວ່າ ໂດຍການເຮັດສິ່ງເຫລົ່ານີ້ ປະຕູນະລົກຈະເອົາຊະນະເຮົາບໍ່ໄດ້; ແລະ ອົງພຣະຜູ້ເປັນເຈົ້າຈະເຮັດໃຫ້ອຳນາດແຫ່ງຄວາມມືດກະຈາຍໄປຕໍ່ໜ້າເຮົາ, ແລະ ເຮັດໃຫ້ຟ້າສະຫວັນສັ່ນສະເທືອນເພື່ອຄວາມດີຂອງເຮົາ ແລະ ລັດສະໝີພາບຂອງພຣະນາມຂອງພຣະອົງ.7
© 2018 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ First Presidency Message, March 2018. Laotian. 15049 331