Yut

Stap Rere blong Harem Voes blong God

Presiden Uchtdorf i stap eksplenem olsem wanem nao we fas samting we God i bin mekem afta we Hem i mekem man mo woman, hem i blong toktok long tufala, mo givim tufala ol impoten infomesen mo instraksen. Yumi stap kasem semfala blesing ia long Epril mo Oktoba, long taem blong jeneral konfrens, taem ol lida blong Jos oli toktok long yumi mo oli givim ol kaonsel we Lod i wantem yumi blong harem.

?Yu yu bin harem voes blong God tru long ol wokman blong Hem long taem blong jeneral konfrens? ?Yu yu harem finis se wan spesel mesej ia i givim ansa ia we yu bin stap lukaotem? Insaed long wan jenol, yu save raetemdaon eksperiens ia, mo olsem wanem hemia i bin helpem yu. Afta, rere blong harem voes blong Lod long konfrens we i stap kam, taem yu raetemdaon ol kwestin we yu gat, mo stadi long olgeta long taem blong skripja stadi blong yu. Prea long Papa long Heven, askem Hem blong kasem ol ansa ia mo ol niu tingting long taem blong konfrens. Taem yu stap lisin long ol wokman blong Lod, lukluk o lisin gud long Spirit i toktok long yuwan. ?Wanem nao yu bin lanem? ?Wanem insperesen nao yu bin filim we i givim tingting long yu blong jenis? Raetemdaon ol toktok blong Spirit ia, !from se Spirit i stap toktok long yu!

Oltaem tingbaot se Papa long Heven i lavem yu mo bambae i lidim yu long raet wei. Taem yu traehad blong harem voes blong Hem tru long ol wokman blong Hem, bambae yu gat blesing mo kam antap.