Fas Presidensi Mesej, Maj 2018
Tok blong God I Go long Ol Pikinini blong Hem
I Kam long Presiden Dieter F. Uchtdorf
Seken Kaonsela long Fas Presidensi
Ol skripja oli talem yumi se fas samting we God i bin mekem afta we Hem i mekem man mo woman, hem i blong toktok long tufala.1 Hem i bin gat ol impoten infomesen mo ol instraksen we i nid tumas blong givimaot long tufala. Stamba tingting blong Hem i no blong givim hevi wok, o mekem tufala i wari, be i blong lidim tufala blong kasem hapines mo glori we i no save finis.
Mo hemia i jes stat blong hem nomo. Stat long taem ia i go kasem naoia, God i bin stap gohed blong toktok wetem ol pikinini blong Hem. Ol toktok blong Hem, oli holemtaet gud i stap, oli putum gud i stap mo ol disaepol blong evri jeneresen oli bin stadi long olgeta. Olgeta we oli wantem save tingting blong God, oli lukluk long ol toktok ia se oli impoten tumas, mo oli serem witnes blong olgeta abaot trutok ia se “Lod God bambae i no mekem wan samting moa, be bae i talemaot sikret blong Hem long ol wokman blong Hem we oli ol profet.”2
Hemia i bin paten stat long stat blong taem, mo paten ia i stap gohed tedei. Hem i no jes wan naes stori blong Baebol; hem i rod we God i putum i stap blong talemaot ol mesej blong Hem long ol pikinini blong Hem. Hem i resemap ol man long medel blong yumi, i singaotem olgeta blong kam profet, mo i givim olgeta ol toktok blong talem, we Hem i invaetem yumi blong kasem olsem se i kamaot long stret maot blong Hem.3 Lod i talemaot se: “I nomata oli kamaot tru long voes blong miwan o tru long voes blong ol wokman blong mi, i semmak.”4
Hemia i wan long ol mesej blong Restoresen we i gat moa glori, i leftemap tingting mo i givim hop—!God i stap toktok long yumi! Mo Hem i lavem ol pikinini blong Hem. Hem i no lego yumi stap wokbaot long tudak.
Tu taem long wan yia, long manis Epril mo Oktoba, yumi gat janis blong harem voes blong Lod tru long ol wokman blong Hem, long taem blong gudfala jeneral konfrens blong yumi.
Mi mi wan witnes se, longtaem bifo we wan spika i mekem longfala wokbaot ia i go long pulpit long taem blong jeneral konfrens, hem i mekem wan bigfala wok finis blong prea, mo stadi folem wok we hem i bin kasem, we i blong toktok long jeneral konfrens. Evri konfrens blong jeneral konfrens i ripresentem ol fulap mo fulap aoa blong stap rere, blong askem long prea wetem hat blong save andastanem wanem we Lod i wantem olgeta Sent blong Hem blong harem.
?Wanem bae i save hapen sapos yumi, we yumi kam blong lisin, yumi rere long semfala wei ia blong olgeta we oli givim toktok? Bae hao yumi kam long jeneral konfrens bae i defren sapos yumi stap luk konfrens olsem wan janis blong kasem ol mesej we oli kam long Lod Hemwan. Tru long ol toktok mo miusik blong jeneral konfrens, yumi save se bambae yumi kasem ol ansa we i blong yumiwan; hemia ol ansa long eni kaen kwestin o problem we yumi save gat o fesem.
Sapos yu stap askem yuwan se Papa long Heven bae i toktok tru long yu, bae mi rimaenem yu simpol, be paoa toktok we ol Praemeri pikinini blong mifala oli singsing long hem: “Yu yu wan pikinini blong God, mo Hem i sendem yu i kam long ples ia.” Stamba tingting blong Hem i blong helpem yu blong “gobak long ples blong God.”
Sapos yu kam kolosap long Papa long Heven olsem pikinini blong Hem, yu save askem Hem wetem wan tru hat: “Lidim mi, tekem mi, plis givhan long mi, mi wantem save rod. Tijim mi olgeta samting ia.” Bambae Hem i toktok long yu tru long Tabu Spirit blong Hem, mo afta, i stap long yu nao blong mekem “tingting blong Hem.” Mi promesem long yu se sapos yu mekem, “bae God i blesem yu.”5
Yumi nidim Lod blong i lidim yumi tedei, semmak olsem oli bin nidim long histri blong wol. Taem yumi stap rere blong harem toktok blong Lod, bae yumi wok strong blong lukaotem Spirit blong trutok blong mekem se, taem Lod i stap toktok tru long ol wokman blong Hem, yumi save andastanem, yumi save kam antap, mo save stap glad tugeta.6
Mi testifae se “taem bae yufala i mekem olgeta samting ia, ol get blong hel bae oli no save win agensem yufala; yes, mo Lod God bae i ronemaot ol paoa blong tudak long fored blong yufala, mo bae i mekem ol heven oli seksek blong gud blong yufala, mo blong glori blong nem blong hem.”7
© 2018 i kam long Intellectual Reserve, Inc. Oli holem evri raet. Oli printim long USA. Oli letem long Inglis lanwis: 6/17 Oli letem translesen: 6/17 Translesen blong First Presidency Message, March 2018. Bislama. 15049 852