President a Odzi Kan na n’Apamfo Amandzɛɛbɔ, Ebɔw 2018
Nyankopɔn N’asɛm a Ɔdze ma Ne Mba
Kyerɛwsɛm no se hɛn dɛ Nyankopɔn bɔɔ ɔbarimba na ɔbaa ekyir no dza Odzii kan yɛe nye dɛ Ɔkasaa kyerɛɛ hɔn.1 Nna Ɔwɔ asɛm a ohia na nkyerɛkyerɛ a ɔsom bo ma hɔn. Nna ɔnnyɛ No botae dɛ Ɔbɛma hɔn adzesoadze anaa Ɔbɛhaw hɔn mbom ama Ɔaama hɔn enyigye na onnyiewiei enyimnyam ho kwankyerɛ.
Ɔno yɛ ahyɛse noara mpo no. Ofitsi dɛm da no besi ndɛ no, Nyankopɔn akɔdo nye Ne mba edzi nkitaho. Ebusuasantsen biara mu esũafo akora Ne nsɛm do, wɔasom hɔn bo na woesũa. Nsɛm no yɛ adze krɔnkrɔn ma hɔn a wɔrohwehwɛ ehu Nyankopɔn Ne pɛ, na wɔagye nokwar no ho dase dɛ “Ewuradze Nyankopɔn rennyɛ biribi, gyedɛ oeyi n’esumasɛm akyerɛ no nkowaa nkɔnhyɛfo no ansaana.”2
Iyi ayɛ nhwɛdo no fitsi mber ahyɛse no na nhwɛdo no kɔ do ndɛ. Ɔnnyɛ Bible mu asɛm dɛɛdɛw ara nko; ɔyɛ kwan a Nyankopɔn ahyehyɛ a Odua do dze nsɛm a ohia tsitsir ma Ne mba. Oyi ankorankor fi hɛn mu, Ɔfrɛ hɔn ma wɔbɛyɛ nkɔnhyɛfo, na Ɔdze nsɛm a wɔnkã ma hɔn, na wɔto nsa frɛ hɛn dɛ “[yɛn]gye, tse dɛ ma ofi [Nankasa] n’anomu.”3 Wɔapaa mu akã dɛ, “Dɛ ɔnam mankasa me ndze do anaa nkowaa ndze do, ne nyina yɛ kor.”4
Iyi nye Nsanananmu no nsɛm no mu kor a ɔyɛ enyimnyam, awerɛkyekye, na enyidado kɛse—Nyankopɔn nntaa tsinkonn! Ɔdɔ Ne mba. Onngyaa hɛn dɛ yɛnantsew-nantsew sum mu.
Mpɛn ebien wɔ afe biara mu no, Ebɔbira na Ɔbɛsɛ mu no, yenya kwan dɛ yedua No nkowaa mu tse Ewuradze Ne ndze wɔ hɛn wiadze mfɛndzanan ehyiadzi nwanwa ber no.
Mankasa midzi ho dase dɛ ansaana wiadze mfɛndzanan ehyiadzi ɔkasafo no botwa anamɔn tsentsen no ebegyina asɛnkãdaka n’enyim no, nna oedzi kan dze mpaabɔ, adzesũa na ɔayɛ mbɔdzembɔ ara yie wɔ dwumadzi dɛ ɔnkasa no ho. Ehyiadzi biara mu nsɛm no da ahoboaboa nye akoma mu ntotɔserɛ mpaabɔ mber pii edzi a, wɔdze aper ahwehwɛ dza Ewuradze pɛ dɛ N’ahotseweefo no bɛtse no ho ntseasee.
Ebɛnadze na ɔbɛba sɛ hɛn etsiefo yɛ hɛnankasa hɛn ahoboaboa a ɔnye hɔn a wɔkasa no dze no sɛ a? Sɛ yehu no dɛ ɔyɛ kwan a yebetsie nsɛm efi Ewuradze Nankasa hɔ a, hɛn wiadze mfɛndzanan ehyiadzi ahokekã besi dɛn asesã? Yebotum edua wiadze mfɛndzanan ehyiadzi mu nsɛm na ndwom no do enya enyidado dɛ yebenya hɛn nsɛmbisa anaa nkõdzen biara a yerihyia ho mbuae ankorankor.
Sɛ w’adwen yɛ wo kusuu dɛ Ɔsor Egya nye wo bɛkasa ampaara a, mebɛkaa wo ndwom a Primary mbofra tow no mu nsɛm tsiabaa a eso ɔyɛ dur: “Eyɛ Nyame Ne ba, na Ɔdze [wo] aba ha.” No botae nye dɛ Ɔbɔboa wo ma asan “enye n’atsena dabi.”
Sɛ ebɛn Ɔsor Egya dɛ N’abofra a, ibotum edze akoma a mu tsew ebisa No dɛ, “Dzi me kãn, weɔn me, nye me nnantsew, Boa ma munhu kwan. Kyerɛ dza ɔsɛ dɛ meyɛ.” Obodua No Sunsum Krɔnkrɔn no do akasa akyerɛ wo, na nkyii na ɔato ɔwo dɛ “ebɛyɛ ne pɛ.” Mobɔ hom anohoba dɛ sɛ hom yɛ a, Nhyira kɛse wɔ hɔ ma [hom].”5
Yehia Ewuradze no kwankyerɛ ndɛ tse dɛ mbrɛ woehia no wɔ wiadze abakɔsɛm ber biara mu no. Ber a yɛyɛ ahoboa dɛ yebetsie Ewuradze N’asɛm no, yenhwehwɛ nokwar Sunsum no enyiberdo ama ber a Ewuradze rudua No nkowaa mu akasa no, hɛn nyina enya ho ntseasee, na yenya ntowdo na yɛabɔ mu enya enyigye.6
Megye dase dɛ “sɛ [hom] yɛ dɛm ndzɛmba yinom a hɛl mbobow no nnkotum edzi hom do konyim; nyew, na Ewuradze Nyankopɔn bɔhwetse sum no tum efi hom enyim, na ɔama sor awosow ama hom yieyɛ, nye ne dzin n’enyimnyam ntsi.”7
© 2018 by Intellectual Reserve, Inc. Wɔakora do tumdzi nyina. USA na wotsintsimii. English approval: 6/17. Translation approval: 6/17. First Presidency Message, March 2018. ne Nkyerɛasee Fante 15049 502