Pweng sin Prestuhnsi Se Met, Mahs 2018
Kahs luhn God nuh sin Tuhlihk Nahtuhl
Sel Prestuhn Dieter F. Uchtdorf
Mwet in Kahsruh Ahkluo ke Prestuhnsi Se Met
Ma suhmuhslah fahk nuh sesr lah ma se met God El oruh tukun orwaclah mukul ac muhtwacn pa sramsram nuh selos.1 Oasr mwe fahkwack yohk srihpac Lal ac mwe luti sacohk in sang nuh selos. Srihpac Lal tiac ma in ahktoasr kuh elyah elos tuh in kohlohlos nuh ke engan ac wolacna ma pahtpaht.
Ac pa ingacn muhtwacwackiyac ah. Ke lwen sac nuh inge, God El kalweni in sramsram nuh sin tuhlihk Nahtuhl. Kahs lal sihmlac, sacohk, ac lutlutkihnyuck sin mwet tuhmal lutlut ke fihl nuh kwewa. Elos yohk srihpac nuh selos suc suk in etuh kena luhn God, ac elos fahkwack lohoh ke ma pwacye lah “Leum God Fulat El tia ku in oru kutena ma El fin tia akkalemye meet nu sin mwet kulansap lal, mwet palu.”2
Pa inge atac nuh ke muhtwacwacack luhn pacl uh, ac atac sacn kalweniyuck mihsenge. Tiac na sramsram sun se ke Pwacpuhl muhkwena; el inkacnek akwucki luhn God in sruhmuhn pweng yohk srihpac nuh sin tuhlihk Nahtuhl. El tuhfahlah kais sie inmahsrlosr, pahnglolos in mwet pahluh, ac sang kahs nuh selos in fahk, ma kwacfeyuck sesr in eis oacna in mana ke Inwacluhl sifacna.3 El fahk lah puhsrwek sifacna kuh puhsrwen mwet kuhlwacnsap Lal, el oacna sie.4
Pa inge sie mwe engan yohk, pwacr, ac pweng wo ke Fohlohkyak sac—God El tiac wihklac! El luhngse tuhlihk Nahtuhl. El tiacna fihlikuhtlac in muhta in lohsr.
Pacl luo ke yac nuh kwewa, ke Eprel ac Ohktohpa, kuht eis pacl wo in lohng puhsrwen Leum sin mwet kuhlwacnsap Lal ke toeni luhlahp wolacna lasr uh.
Nga usot mwe lohoh luhk sifacna lah pacl loes se met liki sie mwet sramsram ke toeni luhlahp el oruh fahsr loes lal nuh ke podium uh, mukul se kuh muhtwacn sacn sang kuh, pruhe, ac lutlut yohk in oraclah sramsram lalos. Pweng ke toeni nuh kwewa eis ao puhkantwen in ahkoeyucklac ac inse pwacye in etuh mac Leum El finsraki Mwet Luhlahlfongi Lal in lohng.
Mac ac sikyak fin kuht, oacna mwet porongo uh sifacna ahkolah oacna mwet sramsram uh? Ahkolah lasr nuh ke toeni luhlahp uh ac siena fuhkah fin kuht liye toeni uh oacna sie pacl wowo in eis pweng sin Leum Sifacna? Ke kahs ac on ke toeni luhlahp uh, kuht kuh in tuhpan in eis top fal ke oacna sie kihsensiyuck kuh elyah kuht puhlakihn.
Fin kom kena nuhnkuh lah Pahpah Lucng El fah sramsram nuh sum, nga fah ahkacsmakihnye kom ke puhsrwen on wowo ma U luhn Tuhlihk Srihsrihk nahtuhsr uh yuck: “[Kom pa] sie tuhlihk nuhtin God, ac el suhpwe[kom]me nuh inge.” Srihpac lal pa in kahsrwe kom in fohlohk “in muhta yohrohl sie lwen.”
Fin kom fototo nuh sin Pahpah Lucng oacna tuhlihk se Nahtuhl, kom kuh in siyuck Sel ke inse pwacye, “Kol yuc, luti yuc, fahsr siskuck, kahsrweyuc in suk innek pwacye. Luti kwewa ngan oruh.” El fah sramsram nuh sum ke Nguhn Muhtahl Lal, ac ma nuh sum “in oruh kena lal.” Nga olwelah lah fin kom oruh, “mwe insewowo yohk tuhkuh kac.”5
Kolyuck luhn Leum yohk enenweyac mihsenge oacna ke ma mahtuh luhn facluh. Ke kuht ahkolah in lohng kahs luhn Leum, lwelah kuht in oaru in suk ma pwacye luhn Nguhn tuh ke pacl Leum El sramsram sin mwet kuhlwacnsap Lal, kuht kuh in kahlwem, etwaclah, ac tuhkweni engan.6
Nga fahkwack lah ke kuht oruh ma inge, sruhnguhl luhn hell fah tiac ahkkahlwemyeyuck nuh sesr, ac Leum God El fah ahkwacngihnyelah kuh luhn lohsr met liki kuht, ac oruh inkuhsrao in mukwikwi ke wo lasr, ac ke ine kuhlwacna lal.7
© 2018 sin Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn First Presidency Message, March 2018. Kosraean. 15049 868