Ni’a noa i te rorouira : Feiā ’Āpī Pa’ari
’Ite i te tīa’ira’a i te pū ’āueuera’a
I te tupura’a te COVID-19 i ’Ītāria, ’ua ’itehia mai iā’u te tahi tumu nō te tīa’ira’a.
Tē ora nei te ta’ata pāpa’i i Catanzaro, ’Ītāria.
E mea au nā’u te mau parau tāmāhanahana a Iesu i tāna mau pipi i muri iho i tōna ti’afa’ahoura’a : « ’Ia ora na ’outou » (Ioane 20:19). E ’ere ānei i te ’ohipa māere ’ua fafau noa tō tātou Fa’aora i te feiā ’āpe’e iāna i te hau ? E ’ohipa ta’a ’ē tei tupu a’enei nō’u tei fa’aha’amana’o iā’u i teie parau mau.
Te mana’o hepohepo ’e te ’ōpanira’a e haere i rāpae
I te hō’ē pō ’a māta’ita’i ai au i te ’āfata teata, tē paraparau ra te mau rauti nō ni’a i te COVID-19 ’e te ’ino o te reira i ’Ītāria nei. ’Ua paraparau rātou nō ni’a i te mau ta’ata e rave rahi tei pohe i te tirotiro, nā reira ato’a te mau ta’ata i ro’ohia i te ma’i, ’o tē rahi noa atu ra. Noa atu ē e fifi iti rahi, ’aita vau i ha’ape’ape’a roa i terā taime. E piti rā hepetoma i muri iho, ’ua ’ino roa atu terā ’ohipa, ’ua rahi atu ra tō’u hepohepo.
’Ua tae mai te mana’o ’oto ’e te ri’ari’a ato’a i roto i te reira. ’Ua mata’u roa vau e ro’ohia vau i te ma’i. ’E ’a tahi ra i roto i tō’u orara’a vau i ri’ari’a ai e haere i te ’ohipa. E mea ’ō’omo i te rimarima ’e te tāpo’i vaha i te mau taime ato’a e haere au nā rāpae. Hō’ē hepetoma i muri mai, ’ua ’ōpanihia tō mātou fenua ato’a ’ia haere nā rāpae i te fare, ’aita e ta’ata e haere rāpae.
I terā taime, ’aita mātou i fa’ati’ahia ’ia haere i rāpae i te fare maori rā nō te ho’o mai i te tahi mā’a, hō’ē taime i roto i te hepetoma. E mea fifi roa ’ia fa’aea noa i roto i te fare. ’Ua fa’ataimehia te mau rurura’a ato’a a te ’Ēkālesia nō te hō’ē tau, ’e noa atu tō’u ’oto i te reira, ’ua ’āehu roa vau i te ’ōpanira’ahia te mau hiero nō te mea tē ’ōpua ra vau e haere i te tā’atira’a o te hō’ē ’utuāfare tā’u i ha’api’i i roto i tā’u misiōni. ’Ua fāfati roa tō’u ’ā’au ’e te tapineva ato’a nō te vaira’a o teie nei ao.
Putapū i te pehe
I te hō’ē po’ipo’i, ’a tai’o ai au i te mau pāpa’ira’a mo’a ’e ’a fa’aro’o ai i te hīmene ra « Te hau i roto i te Mesia », ’ua pure au ’e ’ua ani au i te Metua i te Ao ra : « Nāhea i te tāpe’a noa i te tīa’ira’a i roto i te mau taime fifi ? »
I reira vau i te tāu’ara’a i te parau o terā hīmene :
Hōro’a ’oia i te tīa’ira’a
I te taime ’aita e tīa’ira’a.
Hōro’a ’oia i te pūai
I te taime ’aita e haere fa’ahou.
Hōro’a ’oia i te ha’apūra’a
I roto i te mau vero o te orara’a.
’Aita ana’e e hau i ni’a i te fenua nei,
E hau i roto i te Mesia.1
’Ua putapū vau i te Vārua i te ha’apāpūra’a iā’u ē, e parau mau te reira. ’Ua hi’o vau i tā’u tāreta misiōnare ’e ’ua fa’aro’o vau i teie mau parau i roto i tō’u ferurira’a : « E Romina, ’ua hina’aro vau ’ia vai terā hau tā ’oe i hōro’a ia vetahi ’ē i roto i tā ’oe misiōni maoti tō ’oe fa’a’itera’a i tā’u poro’i nō te tīa’ira’a. E maita’i mai te mau mea. E’ita vau e fa’aru’e ia ’oe ».
I teienei, ’ua hina’aro vau e fa’a’ite i terā poro’i nō te tīa’ira’a ! Noa atu ā te mata’u ’e te hepohepo i roto i terā taime fifi o te ao nei, ’ua ’ite mau vau ē, ia Iesu Mesia ra te tīa’ira’a ! ’A fāriu iāna ra. ’A fa’aro’o iāna. ’A pe’e iāna. E ti’a ia tātou ’ia ’ite i te hau iāna ra. E mana e vai ra i roto i te ti’aturira’a iāna, ’e ’ia nā reira tātou, e hōro’a mai ’oia i te pūai nō te tāpe’a noa i te tīa’ira’a (hi’o Etera 12:4).
’A mau papu i ni’a i te tīa’ira’a
Nō ni’a i te tīa’ira’a, ’ua ha’api’i mai Elder Dieter F. Uchtdorf nō te pupu nō te Tino ’Ahuru Ma Piti ’āpōsetolo : « Teie huru tīa’ira’a i roto i te Atua, tōna maita’i ’e tōna mana, nā te reira e hōro’a fa’ahou ia tātou i te itoito i roto i te mau tītaura’a fifi. »2 Ri’ari’a noa atu teie tau, e ti’a ia tātou ’ia mā’iti ’ia vai itoito ’e ’ia ti’aturi i te mau fafaura’a a te Fatu. I te taime e fifi te orara’a, ’aita e faufa’a e ani i te Metua i te Ao ra ’ia taui i tō tātou vaira’a, ’aita, e ani ra iāna ’ia taui i tō tātou huru. E nehenehe tātou e ha’api’i ’e e tupu i te rahi noa atu ā te vaira’a.
’Ua ’ite au ē, tei ia tātou nei te Atua ’e ’ua here ’oia i tāna mau tamari’i—’o tātou ato’a i te pū ’āueuera’a o te hō’ē pararera’a ma’i pohe. ’Ua ’ite au ē, nā roto iāna, e maita’i mai te mau mea ato’a. ’E ’ua ’ite au ē, e nehenehe noa vau e mau i tō’u rima i ni’a i te hau e tae mai nō tō’u ti’aturira’a ia Iesu Mesia. Maoti tāna tāra’ehara ’ōti’a ’ore, ’aita i tītauhia ’ia fa’aruru vau i te mau fifi ’o vau ana’e.