Ni’a noa i te rorouira : Feiā ’Āpī Pa’ari
I te misiōnare tei taui-tā’ue-hia te vāhi tāvinira’a
’Ua taui tā’ue ānei tā ’oe misiōni ? Teie te tahi mana’o mai roto i te hō’ē ta’ata tei ta’a ri’i i tā ’outou e fa’aruru nei.
Tē ora nei te ta’ata pāpa’i i Utah, i Marite.
E rave rahi o ’outou te mau misiōnare, te vāhi tei reira ’outou i teienei, e ’ere te vāhi tā ’outou i mana’o—tē tīa’i ra e aha tā ’outou tonora’a misiōni ’āpī, ’aore rā i te ho’i ānei i te fare. I te ’itera’a vau i te mau ’ohipa e tupu ra, ’ua ho’i mai te mau ha’amana’ora’a nō tā’u iho nei misiōni, e rave rahi matahiti i teienei. ’Ua mana’o vau, penei a’e e nehenehe tā’u e fa’a’ite i te tahi ma’a hi’ora’a ’o tē nehenehe e tauturu ia ’outou, terā ’e terā misiōnare tei taui-tā’ue-hia te vāhi tāvinira’a.
Fa’ahaere-’ē-ra’a i rāpae i te fenua Alabania
I te ’ōmuara’a o te matahiti 1997, e misiōnare au i Alabania. E mea au nā mātou tō’u mau hoa te mata’eina’a o terā fenua, te mau pai pata pa’ari ’e te fāfā papa’ā, ’e te ta’i ato’a o te reo tā mātou i fa’aitoito i te ha’api’i. Hau atu, e mea au nā mātou ’ia ’ohipa ’e te ta’ata i reira.
’Ua tae i te hō’ē taime, ’ua ’ū’ana roa te fifi i te pae poritita. ’Ua tāmata mātou i te rōtahi noa i ni’a i te fa’a’itera’a i te ’evanelia, ’ua fa’aro’o noa rā mātou i te parau ’āpī nō ni’a i te mau ’ōrurehau, tē rahi noa atu ra i roto i te fenua. Ha’amau a’era te fa’aterera’a hau i te tūpohera’a mōrī, ’e ’ua ’ino roa atu te ’ohipa. Tē haere ra i te tama’i tīvira.
’E i te 14 nō Māti, ’ua fa’ahaerehia te misiōni tā’āto’a i rāpae i te fenua. E’ita roa atu e mo’e iā’u te niuniura’ahia mai nō te parau mai ē, ’ua tae te taime nō te putuputu ’e nō te horo i rāpae i te fenua. Titotito haere te mau mana’o i roto i te ferurira’a ’e te ’ā’au. ’Ua hina’aro iho ā ïa vau e pāruru iā’u, ’ua ’oto rā tō’u ’ā’au i te mana’o e vaiiho i teie mau ’utuāfare tā mātou i mātau ’e i here, i roto iho ā i teie ’ārepurepura’a rahi. E’ita ho’i tā mātou e nehenehe e fa’atae atu i te tāpa’o aroha.
Nō te horo i rāpae i te fenua, ’ua nā ni’a mātou i te manureva tautau, ’e nā ni’a i te tahi atu manureva nō te haere i te fenua ’Ītāria hou ’a tonohia ai mātou i te tahi atu misiōni. I te fenua Peretāne au i te tāpaera’a. ’Aita i maoro, e vāhi iti ’ana’anatae, e ’ere roa rā i te mea ’ōhie i te rahira’a taime. Hō’ē ha’amana’ora’a hope’a nō’u nō Alabania, ’o te hi’ora’a i te fenua i te āteara’a i tō mātou manureva tautau, ’e te ferurira’a e aha pa’i tē tupu nō te ta’ata tā mātou i vaiiho.
Te ’itera’a i te hau
E mea ta’a ’ē paha te ’ohipa i tupu nō ’outou, ’ia mana’o rā vau, e tupu ato’a tō ’outou mana’o ’āhuehue mai tā’u nei. Nō reira, te mea tā’u e hōhora atu i teienei, maita’i ē, e tauturu ato’a te reira ia ’outou. Teie e ono parau tumu tei tauturu i te fa’ahau iā’u i muri mai i teie tauira’a tā’ue i roto i tā’u misiōni rave tāmau.
-
Paraparau ia vetahi ’ē. Penei a’e e mau mana’o ’oto ’e te ’āhuehue tei tae mai ’e ’ua hina’aro ’outou e fa’aātea mai ia ’outou. E mea faufa’a rā ’ia paraparau ia vetahi ’ē, i roto iho ā rā i terā ārea taime e fa’atano fa’ahou i te orara’a. ’A toro i te rima i te feiā aupuru tei tauturu ’e tei fa’aitoito ia ’outou. Tē vai nei te rāve’a ’āpī i teie mahana, e’ita e nehenehe parau e’ita e haere ! Penei a’e e nehenehe e hi’o mai i te hō’ē ta’ata tē nehenehe e paraparau ia ’oe i te reo tā ’oe i ha’api’i. Penei a’e e nehenehe e paraparau i te ta’ata tā ’oe i tāvini ’e i ha’api’i. Noa atu ā te mana’o mo’emo’e i teienei, e ’ere ’oe i te ta’ata ’ōtahi. Noa atu ā ’aita tō ’oe ’utuāfare ’e te mau hoa i ’ite roa nāhea i te tauturu ia ’oe, tē mana’o nei rā vau ē, tē māna’ona’o pāpū ra rātou ia ’oe, ’ua hina’aro rātou ’ia maita’i ’oe.
-
Fa’a’ite noa i tō ’oe ’itera’a pāpū. Noa atu ā te vāhi tei reira ’oe i te tai’ora’a i teie parau, ’aita e hape ē, e mau ta’ata ’ati a’e ia ’oe e ha’amaita’ihia e tā ’oe mau parau ta’a ’ē. ’Eiaha e ha’amā ’ia fa’a’ite i te mea tā ’oe i ha’api’i ’e i putapū ’ei misiōnare rave tāmau—noa atu ā te roa ’aore rā te poto o te taime ’oe « i roto i te ’āua ». ’A rātere ai ’oe nā roto i teie mau ’ohipa ’e ’a ’ite ai i te rima o te Atua i roto i tō ’oe orara’a, ’a fa’a’ite i te reira ’e te feiā herehia. Penei a’e te mea tā ’oe i ’apo mai i roto i teie ’ohipa ta’a ’ē, ’o tā te tahi ïa ta’ata e hina’aro e fa’aro’o.
-
’A ti’aturi ē, ’ua ’ite te Metua i te ao ra ia ’oe. ’Ua ’ite ’oe ē, eaha ? I ’ite te Atua ē, e tupu te reira ! ’Ua ’ite ’oia i te mau mea ato’a e tupu i roto i tō ’oe orara’a. ’E ’ua ta’a pāpū tō ’oe Fa’aora, ’o Iesu Mesia, i tō ’oe mau mana’o. Tei pīha’i iho rāua ia ’oe ’a haere ai ’oe i ni’a i teie ’ē’a, ’e e ti’a ia rāua ’ia tāmāhanahana ia ’oe maoti te Vārua Maita’i. E nehenehe te mana’o māuiui i te ’ā’au e vai maoro, ’aita rā e fifi. ’A ti’aturi noa i te Fatu ’ia parau mai ’oia : « E vai ho’i au i tō ’outou pae ’atau ’e i tō ’outou pae ’aui, ’e i roto ho’i tō’u Vārua i tō ’outou mau ’ā’au, ʼe tā’u mau melahi ho’i e ’ati noa a’e ia ’outou na, ’ia ha’amara’a mai ia ’outou i ni’a » (Te Parau Ha’api’ira’a ’e te mau Parau Fafau 84:88).
-
E fa’a’oroma’i noa atu te māuiui. E mana’o riri ānei tō ’oe ? E mana’o ’oto ? E mana’o ’ino’ino ? ’Aita rā tē mana’o ra ’oe ē : « ’Aita i tano mai te reira ! » ? Penei a’e e mana’o ’ē roa tō ’oe ? ’Ia ’ite ’oe ē, noa atu ā tō ’oe mana’o i teienei, ’ua tano te reira. Tē māuiui ra ’oe i te hō’ē mo’era’a, ’e e mea faufa’a rahi ’ia fa’a’oroma’i ia ’oe iho ’a fa’aitoito ai ’oe i roto i terā ’ohipa. I te hō’ē ā taime, ’a hi’o maita’i ’eiaha e fa’arahi roa i teie mau ’ohipa e tupu ra, ’aore rā ’eiaha e amuamu rahi roa i te ’ohipa i tupu ’e e’ita atu ra e nehenehe e rave i te hō’ē mea i teienei. Mai te mea e tupu mai te mana’o ē, tē tāfifi ra ’oe nō te fa’a’oroma’i maita’i i te reira, ’a ani i tō ’oe ’episekōpo ’aore rā te peresideni misiōni ’ia tauturu mai ia ’oe, ’ia paraparau ’oe i te tahi ta’ata tōro’a fa’aa’o. ’Eiaha e ha’amā ’ia ani i te tauturu.
-
Fa’aitoito e tītau manihini i te Vārua. Tāmau noa i te utuhi ia ’oe i roto i te ’ohipa o te ’evanelia. Mai te mea ’ua tauihia tā ’oe tonora’a, ’a ha’apa’o noa i te mau ture misiōni. E ’imi i te mau rāve’a i te mau mahana ato’a nō te fa’a’ite i te Vārua ē, ’ua hina’aro ’oe iāna ’ia pārahi mai i roto ia ’oe, ’e ’a pāpa’i i te fa’aurura’a tā ’oe e fāri’i mai iāna ra. Fa’aea noa i pīha’i iho i te Vārua, e tauturu te reira ia ’oe ’ia rave i te mau fa’aotira’a nō ananahi, nā reira ato’a, e ’itehia mai ia ’oe te tāmāhanahanara’a i roto i te mea e tupu ra.
-
’A ti’aturi pāpū ē, ’ua « parauhia ’oe i roto i te ohipa » i teienei ā. Nō te hō’ē tau maoro ’ua mana’o vau ē, « tō’u pi’ira’a », ’o te vāhi ïa vau i pi’ihia ’ia tāvini ’ei misiōnare. ’Āhani pa’i au i māramarama ’oi’oi ē, tō’u pi’ira’a mau, ’o te tāvinira’a i te mau tamari’i a te Atua i te mau vāhi ato’a tei reira vau. I muri iho ato’a vau i te tātarara’a i tā’u tāreta i’oa misiōnare, tē vai noa nei ā ta’u fafaura’a bāpetizora’a e rave i ni’a iā’u nei te i’oa o Iesu Mesia ’e ’ia rave i te mau ta’ata mai tāna e rave ia rātou, i te mahana tāta’itahi. E tonora’a misiōni ’āpī ānei tā ’oe, ’aore rā ’ua ha’amāuruuruhia ’oe ’ei misiōnare rave tāmau, ’a fa’afa’aea ma te mana’o pāpū ē, e nehenehe tā ’oe mau tārēni e fa’a’ohipahia nō te patu i te bāsileia o te Atua, noa atu ā te vāhi e haere ’oe.
I roto i tōna rima
I tō’u mana’o, hō’ē mea teimaha roa i te fa’aru’era’a mātou ia Alabania, ’o te fa’aru’era’a ïa i te feiā mo’a tei bāpetizo-noa-hia, ’e i teienei e haere rātou i roto i te ’evanelia, ’aita mātou nō te tauturu ia rātou. ’Ua ’ite rā ’outou ? E ’ohipa māere tā rātou i rave. Noa atu ā ’aita mātou i reira nō te tauturu ia rātou, tei ia rātou ra te Atua. Mai te taime ā vau ’a fa’aru’e ai i reira, ’a 20 matahiti i teienei, ’ua haere noa te ’ohipa i mua i roto i terā fenua, e mea pūai te feiā mo’a.
Nō reira, e au mau misiōnare, ’a tāmau i te ’imi i te hāmanira’a a te rima a te Atua i roto i te mau mea e hōhora ra i mua ia ’outou. Tē vai nei ā te ta’ata tei hina’aro i tō ’outou reo, ’e tē vai nei ā te ’oa’oa rahi nō ’outou i reira. ’A fa’ariro i te reira ’ohipa ta’a ’ē ’ei rāve’a nō te fa’ahōhonu atu ā i tō ’outou tā’amura’a ’e te Atua. ’Ia ha’amaita’i mai ’oia ia ’outou ’a tāmau ai ’outou i te haere i mua ma te fa’aro’o.