Ni’a noa i te rorouira : Feiā ’Āpī Pa’ari
Tā te purera’a i te fare i ha’api’i iā’u nō ni’a i te putuputu-’āmui-ra’a
’Ua ’oto ri’i au i te fa’ataimera’ahia te mau rurura’a a te ’Ēkālesia nō te hō’ē tau, nō terā pararera’a ma’i pohe. I teienei rā, ’ua māuruuru vau nō te mea tā’u i ’apo mai.
Tē ora nei te ta’ata pāpa’i i Scania, Suede.
’Ua riro noa na te haerera’a i te purera’a ’ei taime rahi nō’u i roto i te hepetoma. E mea au nā’u ’ia putuputu ’e te mau hoa ’e te ’utuāfare, ’ia vaiiho i te mau pe’ape’a o te orara’a ’a ha’amori ’āmui ai mātou.
Taui roa a’era te mau mea nō teie pararera’a ma’i pohe. I taua taime ra, ’aore re’a ta’ata tei ro’ohia i te tirotiro corona i Suede, ’e ’ua matara noa te mau fare ha’api’ira’a, nō reira ’aita vau i ta’a maita’i nō te aha te feiā fa’atere o te ’Ēkālesia i mana’o ai e fa’ataime i te mau rurura’a. Nō te ’ārepurepu rahi e tupu ra ’ati a’e i te ao nei, ’ua hina’aro roa vau e fārerei i tō’u mau hoa i te sābati. Fa’aro’o a’era vau ē, ’ua fa’ataimehia te mau rurura’a a te ’Ēkālesia nō te hō’ē tau, ’e e riro mātou i te fa’atupu i te purera’a i te fare. ’Ua ’oto vau ’e te ’ino’ino ri’i ato’a.
I te taera’a mai te mahana sābati, ’ua ’ō’omo vau i tō’u ’ahu roa ’e ’ua fa’anehenehe i tō’u mata, ’ua tāmā’a i terā po’ipo’i ’e ’ua pārahi ’e tō’u nā metua. ’Ua hi’o vau i tō’u metua tāne tē fa’aineine māite ra i te ’ōro’a ma te tahi ’ahu ’uo’uo nā ni’a i te faraoa ’e te pape, ’e ’ua ’īriti i tāna mau pāpa’ira’a mo’a i ni’a i nā pure o te ’ōro’a.
Tae a’era te taime nō te hīmene i te hīmene ’ōro’a. I te ’ōfatira’a tō’u metua tāne i te pāne, ’ua putapū pūai au i te Vārua. E au ra ē, tē parau ta’a ’ē mai ra ’oia ē, nō’u te tāra’ehara a Iesu Mesia. ’Ua ha’amata vau i te ta’i, ’e i te hi’ora’a vau i tō’u metua vahine, tē ta’i ato’a ra ’oia ma te mata ’ata’ata—’ua putapū ato’a ’oia i te Vārua.
Noa atu ā tō’u fē’a’a nā mua atu, ’ua ’ite au i teienei ē, e ’ohipa huru ’ōmo’e te ’ōro’a i te fare, e ’ohipa nehenehe mau. I roto i te mau hepetoma i ma’iri, ’ua putapū hau atu vau i te māuruuru nō te autahu’ara’a ’e nō te ’evanelia i fa’aho’ihia mai, ’o tē hōro’a nei ia tātou i te tāmāhanahanara’a ’e te hau i roto i te mau tau fifi. ’Ua putapū ato’a vau i te here o te Metua i te Ao ra nō tāna mau tamari’i ato’a. ’E ’ua māuruuru ta’a ’ē au nō te peropheta, ’o tē tauturu nei ia tātou ’ia ’ite e aha tē rave, noa atu ā ’aita tātou i māramarama maita’i nō te aha.
Mai terā taime ’a fa’aue-mātāmua-hia ai tātou ’ia fa’atupu i te purera’a i te fare, ’ua parare roa te COVID-19 ’e e tauasinira’a ta’ata i Suede tei ro’ohia i te ma’i ’e tē tupu nei te reira i roto i te rahira’a o te mau fenua ’ati a’e i te ao nei. ’E noa atu ā tō’u au i te ’ōmo’e o te purera’a i te fare i pīha’i iho i te tahi ri’i noa feiā herehia, ’ua ’ite ato’a mai au ē, e ’ere mai te haerera’a i te purera’a ’e te ha’amori-’āmui-ra’a ’ei pāroita ’e ’ei ’āma’a. ’Aita e fa’aaura’a te maita’i nō te ’āmuira’a i te ta’ata nō te purera’a ’ōro’a ’e te tahi atu mau rurura’a.
Mai tā Elder D. Todd Christofferson nō te pupu nō te Tino ’Ahuru Ma Piti ’āpōsetolo i ha’api’i : « Te tumu rahi nō te ’Ēkālesia a te Fatu ’o te ha’amaura’a ïa i te ’āmuira’a Feiā Mo’a nō te turu i te tahi ’e te tahi i ni’a i ‘te ’ē’a tītī’aifaro ’e te piriha’o ē tae roa atu ai i te ora mure ’ore ra’ [2 Nephi 31:18] ».1
’Ua ’ite mai au ē, ’ua hau atu te haerera’a purera’a i te fārerei-noa-ra’a i te mau hoa i te hepetoma tāta’itahi. ’O te ravera’a i te ’ōro’a rā, ’o terā mana’o tā’amura’a ’e te turu i te tahi ’e te tahi, ’e ’o te patura’a i te hō’ē ’āmuira’a fa’aro’o i roto i te bāsileia o te Atua. E vai noa tō’u māuruuru nō te ha’amaita’ira’a ’ia fa’atupu i te purera’a i te fare i te taime nō te COVID-19, nā reira ato’a nō te hi’ora’a ’āpī tā’u i ’apo mai nō te faufa’a rahi nō te putuputu-’āmui-ra’a. E riro te purera’a ’ōro’a i te ha’aputapū ta’a ’ē roa ia tātou i te taime e putuputu ’āmui fa’ahou ai tātou.