“வெளிப்படுத்தலின் கொள்கையில் வளருங்கள்,”லியஹோனா, ஜனுவரி 2021
லியஹோனா வாராந்தர செய்தி, ஜனுவரி 2021
வெளிப்படுத்தலின் கொள்கையில் வளருங்கள்
கர்த்தர் உங்களுக்குக் கொடுக்க விரும்பும் தெளிவை நீங்கள் பெறும்படி, மேலும் அடிக்கடி கர்த்தரைக் கேட்க தேவையான நடவடிக்கைகளை எடுக்க நான் உங்களை ஊக்குவிக்கிறேன்.
கெட்டி உருவங்களிலிருந்து நிழற்படம்
செப்டம்பர் 30, 2017 அன்று, பொது மாநாட்டின் பிற்பகலைத் தொடர்ந்து, எனது அன்பான குழும உறுப்பினர் மூப்பர் ராபர்ட் டி. ஹேல்ஸைப் பார்க்க மருத்துவமனையில் நின்றேன். சில நாட்களுக்கு முன்னர் மாரடைப்பால் பாதிக்கப்பட்ட அவர் மருத்துவமனையில் அனுமதிக்கப்பட்டிருந்தார்.
எங்கள் சந்திப்பு அற்புதமானதாக இருந்தது, அவர் முன்னேறி வருவதாகத் தோன்றியது. அவர் தாமாக சுவாசித்துக் கொண்டிருந்தார், அது ஒரு நல்ல அறிகுறி.
ஆயினும், நான் ஞாயிற்றுக்கிழமை மருத்துவமனைக்குத் திரும்ப வரவேண்டும் என்று அன்று மாலை, ஆவியானவர் என் இருதயத்துடனும் மனதுடனும் பேசினார். பொது மாநாட்டின் ஞாயிற்றுக்கிழமை காலை கூட்டத்தின் போது, அந்த வலுவான எண்ணம் திரும்ப வந்தது. நான் மதிய உணவைத் தவிர்த்துவிட்டு, காலை கூட்டம் முடிந்தவுடன் மூப்பர் ஹேல்ஸின் படுக்கை அருகில் செல்ல வேண்டும் என்று உணர்ந்தேன், அதை நான் செய்தேன்.
நான் வந்தபோது, மூப்பர் ஹேல்ஸ் மோசமான நிலைக்கு கடுமையாக திரும்பியிருப்பதைக் காண முடிந்தது. துரதிருஷ்டவசமாக, நான் வந்த 10 நிமிடங்களுக்குப் பிறகு அவர் காலமானார், ஆனால் அவர் இந்த வாழ்க்கையை விட்டு வெளியேறும்போது அவரது இனிமையான மனைவி மேரி மற்றும் அவர்களது இரண்டு மகன்களுடன் நான் அவரது பக்கத்தில் இருந்ததற்கு நன்றியுடையவனாயிருக்கிறேன்.
பரிசுத்த ஆவியின் கிசுகிசுக்கள் இல்லையெனில் நான் செய்திருக்க முடியாத ஒன்றைச் செய்யத் தூண்டியதற்கு நான் மிகவும் நன்றியுள்ளவனாக இருக்கிறேன். வெளிப்படுத்தலின் நிஜத்துக்கு நான் மிகவும் நன்றியுள்ளவனாக இருக்கிறேன், பரலோகங்கள் மீண்டும் திறக்கப்பட்டுள்ளன.
இந்த ஆண்டு தனிப்பட்ட மற்றும் வகுப்பறை படிப்புக்கான நமது கவனம் கோட்பாடு மற்றும் உடன்படிக்கைகளாக இருக்கும். இந்த “தெய்வீக வெளிப்படுத்தல்கள் மற்றும் உணர்த்தப்பட்ட அறிவிப்புகள்” அவற்றைப் படித்து, அவற்றின் தெய்வீக வழிநடத்துதலைச் செயல்படுத்தும் அனைவரையும் ஆசீர்வதிக்கும். அவர்கள் “கர்த்தராகிய இயேசு கிறிஸ்துவின் குரலைக் கேட்க எல்லா இடங்களிலும் உள்ள எல்லா ஜனங்களையும்” அழைக்கிறார்கள்.1 உண்மையிலேயே “கர்த்தருடைய குரல் எல்லா மனிதர்களுக்குமானது”(கோட்பாடும் உடன்படிக்கைகளும் 1:2).
அபாயம், இருள், ஏமாற்றுதல்
கோவிட்-19 தொற்றுநோய் நமக்கு நினைவூட்டியுள்ளபடி, சரீர மற்றும் ஆவிக்குரிய சோதனைகள் பூலோக வாழ்க்கையின் ஒரு பகுதியாகும். அவரது இரண்டாம் வருகைக்கு முந்தைய காலங்களில், இரட்சகர் மிகுந்த உபத்திரவத்தின் நாட்களை முன்னறிவித்தார். அவர் கூறினார், “பஞ்சங்கள், கொள்ளைநோய்கள் மற்றும் பூகம்பங்கள் பல இடங்களில் இருக்கும்”(Joseph Smith—Matthew 1:29).
இத்தகைய உபத்திரவங்களை அதிகரிப்பது நம்மைச் சுற்றிலும் அதிகரித்து வரும் இருளும் ஏமாற்றுதலும் ஆகும். இயேசு தம்முடைய சீஷர்களிடம் சொன்னது போல, அவர் திரும்புவதற்கு முன்பு “அக்கிரமம் பெருகும்”(Joseph Smith—Matthew 1:30).
சாத்தான் தனது படைகளை ஒழுங்கு செய்திருக்கிறான், கர்த்தருடைய பணிக்கும், அதில் ஈடுபட்டுள்ளவர்களுக்கும் எதிராக பொங்கி எழுகிறான். நாம் எதிர்கொள்ளும், அதிகரித்து வரும் ஆபத்துக்களால், தெய்வீக வழிகாட்டுதலுக்கான நமது தேவை ஒருபோதும் பெரிதாக இருக்கவில்லை, நம்முடைய மத்தியஸ்தர், இரட்சகர் மற்றும் மீட்பர் இயேசு கிறிஸ்துவின் குரலைக் கேட்பதற்கான முயற்சிகள் ஒருபோதும் அவசரமாக இருந்ததில்லை.
நான் சபையின் தலைவராக அழைக்கப்பட்ட சிறிது நேரத்திலேயே நான் சொன்னது போல், கர்த்தர் தனது மனதை நமக்கு வெளிப்படுத்தத் தயாராக உள்ளார். அது நமக்கு அவர் அளித்த மிகப்பெரிய ஆசீர்வாதங்களில் ஒன்றாகும்.2
நம் நாளில், அவர் வாக்குறுதி அளித்துள்ளார், “நீங்கள் கேட்டால், நீங்கள் வெளிப்படுத்தல் மேல் வெளிப்படுத்தலையும், அறிவின் மேல் அறிவையும் பெறுவீர்கள்” (கோட்பாடும் உடன்படிக்கைகளும் 42:61).
நமது வேண்டுகோள்களுக்கு அவர் பதிலளிப்பார் என்று எனக்குத் தெரியும்.
நாம் எவ்வாறு அவர் சொல்வதைக் கேட்கிறோம்
ஆவியானவர் எவ்வாறு பேசுகிறார் என்பதை அறிவது இன்று அவசியம். தனிப்பட்ட வெளிப்பாட்டைப் பெறுவதற்கும், பதில்களைக் கண்டுபிடிப்பதற்கும், பாதுகாப்பையும் வழிநடத்துதலையும் பெறுவதற்கும், தீர்க்கதரிசி ஜோசப் ஸ்மித் நமக்காக அமைத்த மாதிரியை நினைவில் கொள்கிறோம்.
முதலில், நாம் வேதங்களில் மூழ்கி விடுகிறோம். அவ்வாறு செய்வது இரட்சகரின் போதனைகள் மற்றும் சத்தியங்களுக்கு நம் மனதையும் இருதயத்தையும் திறக்கிறது. கிறிஸ்துவின் வார்த்தைகள் “[நாம்] செய்ய வேண்டிய அனைத்தையும் [நமக்கு] சொல்கிறது” ( 2 நேபி 32: 3 ), குறிப்பாக நிச்சயமற்ற மற்றும் எழுச்சியின் இந்த நாட்களில்.
அடுத்து நாம் ஜெபிக்கிறோம். ஜெபத்திற்கு முன்முயற்சி தேவை, எனவே நாம் தேவனுக்கு முன்பாக நம்மைத் தாழ்த்திக் கொள்கிறோம், நாம் தொடர்ந்து செல்லக்கூடிய அமைதியான இடத்தைக் கண்டுபிடித்து, நம்முடைய இருதயங்களை அவரிடம் ஊற்றுகிறோம்.
கர்த்தர் கூறுகிறார், “என்னிடம் நெருங்கி வாருங்கள், நான் உங்களிடம் நெருங்கி வருவேன்; என்னை கருத்தாய் தேடுங்கள், நீங்கள் என்னைக் கண்டுபிடிப்பீர்கள்; கேளுங்கள், நீங்கள் பெறுவீர்கள்; தட்டுங்கள், அது உங்களுக்கு திறக்கப்படும்” (கோட்பாடும் உடன்படிக்கைகளும் 88:63).
கர்த்தரிடம் நெருங்கி வருவது ஆறுதலையும் ஊக்கத்தையும் நம்பிக்கையையும் குணப்படுத்துதலையும் தருகிறது. எனவே, நம்முடைய கவலைகள் மற்றும் பலவீனங்கள், நம்முடைய ஏக்கங்கள் மற்றும் நம்முடைய எதிர்பார்ப்புக்கள், நமது அழைப்புகள் மற்றும் நமது கேள்விகள் குறித்து அவருடைய நாமத்தில் ஜெபிக்கிறோம்.
பின்னர் நாம் கேட்கிறோம்.
நம்முடைய ஜெபத்தை முடித்த பிறகு நாம் சிறிது நேரம் முழங்காலில் நின்றால், எண்ணங்கள், உணர்வுகள் மற்றும் வழிகாட்டுதல் ஆகியவை நம் மனதில் வரும். அந்த எண்ணங்களைப் பதிவு செய்வது, கர்த்தர் நாம் என்ன நடவடிக்கை எடுக்க வேண்டும் என்பதை நினைவில் கொள்ள உதவும்.
இந்த செயல்முறையை நாம் மீண்டும் செய்யும்போது, தீர்க்கதரிசி ஜோசப் ஸ்மித் வார்த்தைகளின்படி, நாம் “வெளிப்படுத்தலின் கொள்கையில் வளருவோம்.”3
வெளிப்படுத்துதலைப் பெற தகுதியானவர்
பரிசுத்த ஆவியின் கிசுகிசுப்புக்களை அடையாளம் காண்பதற்கான நமது திறனைச் செம்மைப்படுத்துவதற்கும், வெளிப்பாட்டைப் பெறுவதற்கான திறனை அதிகரிப்பதற்கும் தகுதி தேவைப்படுகிறது. தகுதிக்கு பரிபூரணம் தேவையில்லை, ஆனால் அதிகரித்த தூய்மைக்கு நாம் பாடுபட அது தேவைப்படுகிறது.
தினசரி முயற்சி, தினசரி முன்னேற்றம், தினசரி மனந்திரும்புதல் ஆகியவற்றை கர்த்தர் எதிர்பார்க்கிறார். தகுதி தூய்மையைக் கொண்டுவருகிறது, மேலும் தூய்மை பரிசுத்த ஆவியானவருக்கு நம்மைத் தகுதியாக்குகிறது. “[நமது]வழிகாட்டியாக பரிசுத்த ஆவியானவரை” ( கோட்பாடும் உடன்படிக்கைகளும் 45:57 ) நாம் கருதும்போது, தனிப்பட்ட வெளிப்பாட்டிற்கு நாம் தகுதி பெறுகிறோம்.
பரலோக வழிகாட்டுதலுக்கான கதவைத் திறப்பதில் இருந்து ஏதாவது நம்மைத் தடுக்கிறது என்றால், நாம் மனந்திரும்ப வேண்டியிருக்கலாம். மனந்திரும்புதல் கதவைத் திறக்க அனுமதிக்கிறது, இதனால் கர்த்தரின் குரலை அடிக்கடி தெளிவாக கேட்க முடியும்.
“தரம் தெளிவாக உள்ளது,” என்று பன்னிரு அப்போஸ்தலர்களின் குழுமத்தின் மூப்பர் டேவிட் ஏ. பெட்னார் போதித்தார். “நாம் நினைப்பது, பார்ப்பது, கேட்பது அல்லது செய்வது பரிசுத்த ஆவியிலிருந்து நம்மைத் தூர விலக்குகிறது என்றால், நாம் நினைப்பது, பார்ப்பது, கேட்பது அல்லது செய்வதை நிறுத்த வேண்டும். உதாரணமாக, மகிழ்விக்கும் நோக்கமுடையது, பரிசுத்த ஆவியிலிருந்து நம்மை அந்நியப்படுத்துகிறது என்றால், நிச்சயமாக அந்த வகை பொழுதுபோக்கு நமக்கானது இல்லை. ஏனென்றால், மோசமான, கரடுமுரடான, அல்லது அடக்கமற்றவற்றில் ஆவியானவர் தரித்திருக்க முடியாது என்பதால், இதுபோன்ற விஷயங்கள் நமக்கானது இல்லை.”4
உபவாசத்தோடும், கருத்தாய் தேடுவதாலும், வேதங்களையும், தீர்க்கதரிசிகளின் வார்த்தைகளையும் படித்து, ஆலய மற்றும் குடும்ப வரலாற்றுப் பணிகளையும் நாம் அதிக தூய்மையோடும் கீழ்ப்படிதலோடும் சேர்க்கும் போது, பரலோகங்கள் திறக்கும். கர்த்தர் தம்முடைய வாக்குறுதியை நிறைவேற்றுவார்: “என் ஆவியிலிருந்து நான் உங்களுக்கு வழங்குவேன், அது உங்கள் மனதை தெளிவாக்கும்” (கோட்பாடும் உடன்படிக்கைகளும் 11:13).
நாம் பொறுமையாக இருக்க வேண்டியிருக்கலாம், ஆனால் தேவன் தம்முடைய வழியிலும் அவருடைய நேரத்திலும் நம்மிடம் பேசுவார்.
புரிந்துகொள்ளும் ஆவி
யோபு அறிவித்தான், “ஆனாலும் மனுஷரில் ஒரு ஆவியுண்டு, சர்வ வல்லவருடைய சுவாசமே அவர்களை உணர்வுள்ளவர்களாக்கும்” (யோபு 32:8). இந்த புதிய ஆண்டில், அவர் உங்களுக்கு வழங்க விரும்பும் தெளிவை நீங்கள் பெறும்படிக்கு, கர்த்தரை சிறப்பாக அடிக்கடி கேட்க தேவையான நடவடிக்கைகளை எடுக்க நான் உங்களை ஊக்குவிக்கிறேன்.
2017 ஆம் ஆண்டு அக்டோபர் நாளில் மூப்பர் ஹேல்ஸ் மறைந்து போவதற்கு முன்பு, அவர் கொடுக்க முடியாத ஒரு சிறு செய்தியை பொது மாநாட்டிற்காக ஆயத்தம் செய்தார். அந்த செய்தியில், “நம்முடைய விசுவாசம் கர்த்தருடைய சந்நிதியில் இருக்க நம்மை ஆயத்தப்படுத்துகிறது” என்று எழுதினார்.5
நாம் வெளிப்படுத்தலைப் பெறும்போது, தேவனின் மனதையும், விருப்பத்தையும், குரலையும் நமக்கு வெளிப்படுத்துவதால், அவர் சமூகத்தில் நேரத்தைச் செலவிடுகிறோம் (கோட்பாடும் உடன்படிக்கைகளும் 68:4 பார்க்கவும்). அவரை அழைத்து, அவருடைய வாக்குறுதியளிக்கப்பட்ட உணர்த்துதலுக்குத் தகுதியுள்ளவர்களாக வாழ்ந்து, நாம் பெறும் வழிகாட்டுதலின் பேரில் செயல்பட்டு, நம்முடைய விசுவாசத்தை செயல்படுத்துவோமாக,
© 2020 by Intellectual Reserve, Inc. எல்லா உரிமைகளும் ஒதுக்கப்பட்டுள்ளன அ.ஐ.நாடுகளில் அச்சிடப்பட்டது. ஆங்கில அங்கீகாரம்: 6/19. மொழிபெயர்ப்பு அங்கீகாரம்: 6/19. Monthly Liahona Message, January 2021 மொழிபெயர்ப்பு. Tamil. 17463 418.